30
अब म भन्दा जवानहरूले मेरो ठट्टा गर्नुबाहेक अरू केही गर्दैनन् । यी जवान मानिसहरूका बाबुहरूलाई आफ्नो बगाल रुँग्ने कुकुरहरूको छेउमा काम गर्न पनि म इन्कार गर्थें ।2 वास्तवमा तिनीहरूका बाबुहरूका हातको तागतले, अर्थात् तन्नेरी उमेरको बल नष्ट भएका मानिसहरूका तागतले मलाई कसरी मदत गर्न सक्थ्यो र ?3 गरीबी र भोकले तिनीहरू दुब्लो थिए । उजाडस्थान र मरुभूमिको अँध्यारोमा सुक्खा भुइँमा तिनीहरू कुटुकुटु टोक्थे ।4 तिनीहरूले नुनिलो झार र झाडीका पातहरू उखेल्थे । झ्याउका जराहरू तिनीहरूका खानेकुरा थिए ।5 तिनीहरू मानिसहरूका बीचबाट खेदिएका थिए, जो चिच्च्याउँदै चोरको पछि लागेझैँ तिनीहरूको पछि लाग्थे ।6 त्यसैले तिनीहरू नदीका मैदानहरू, जमिन र चट्टानका गुफाहरूमा बस्नुपरेको थियो ।7 झाडीहरूका बीचमा तिनीहरू गधाझैँ कराउँथे, र तिनीहरू झाडीमुनि एकसाथ जम्मा हुन्थे ।8 तिनीहरू मूर्खहरूका छोराहरू थिए, वास्तवमा नाम नभएका मानिसहरूका छोराहरू थिए । कोर्रा लगाएर तिनीहरूलाई देशबाट लखेटियो ।9 तर अहिले म तिनीहरूको गिल्लाको गीतको विषय बनेको छु । म तिनीहरूका लागि उखान भएको छु ।10 तिनीहरू मलाई घृणा गर्छन्, र मबाट टाढा रहन्छन् । मेरो मुखमा थुक्नबाट तिनीहरू रोकिँदैनन् ।11 किनकि परमेश्वरले मेरो धनुको डोरी फुकाउनुभएको छ र मलाई कष्ट दिनुभएको छ, अनि मलाई गिल्ला गर्नेहरूले मेरो अनुहारकै सामु आफ्नो रीस पोखाउँछन् ।12 मेरो दाहिने हातमा हुल्याहाहरू खडा हुन्छन् । तिनीहरूले मलाई टाढा लखेट्छन् र मेरो विरुद्धमा आफ्ना घेरा-मचान बनाउँछन् ।13 तिनीहरूले मेरो मार्ग नष्ट गर्छन् । तिनीहरूले ममाथि विपत्ति ल्याउँछन्, र ती मानिसहरूलाई रोक्ने कोही छैन ।14 सहरको पर्खालमा भएको ठूलो प्वालबाट आउने फौजझैँ तिनीहरू मेरो विरुद्धमा आउँछन् । विनाशको बीचमा तिनीहरू ममाथि लडिबडि खेल्छन् ।15 त्रासहरू ममाथि परेका छन् । बतासले उडाएर लगेझैँ मेरो आदरलाई लगिएको छ । मेरो समृद्धि बादलझैँ बितेर जान्छ ।16 अब मेरो जीवन मभित्रै सकिँदैछ । कष्टका धेरै दिनहरूले मलाई समातेका छन् ।17 रातमा मभित्र भएका हड्डीहरूले मलाई घोच्छन् । मलाई सताउने मेरा पीडाले आराम लिँदैनन् ।18 परमेश्वरको महान् शक्तिले मेरो वस्त्र समातेको छ । मेरो कमीजको कठालोझैँ यसले मेरो चारैतिर बेर्छ ।19 उहाँले मलाई हिलोमा फाल्नुभएको छ । म धूलो र खरानीझैँ भएको छु ।20 हे परमेश्वर, म तपाईंमा पुकार्छु, तर तपाईंले मलाई जवाफ दिनुहुन्न । म खडा हुन्छु, तर तपाईंले हेर्नु मात्र हुन्छ ।21 तपाईं बदलिनुभएको छ र मप्रति क्रूर बन्नुभएको छ । आफ्नो हातको तागतले तपाईंले मलाई सताउनुहुन्छ ।22 तपाईंले मलाई बतासमा उचाल्नुहुन्छ र त्यसले मलाई उडाउने बनाउनुहुन्छ । तपाईंले मलाई आँधीमा यताउता हुत्याउनुहुन्छ ।23 किनकि म जान्दछु, कि तपाईंले मलाई मृत्युमा पुर्याउनुहुन्छ, सबै जीवितहरूका लागि नियुक्त गरिएको घरमा लानुहुन्छ ।24 तापनि जब कोही लड्छ, तब के त्यसले मदतको लागि आफ्नो हात उठाउँदैन र ? के सङ्कष्टमा भएको कसैले पनि मदतको लागि पुकार्दैन र ?25 कष्टमा भएको व्यक्तिको लागि म रोइनँ र ? खाँचोमा परेको मानिसको लागि मैले शोक गरिनँ र ?26 जब मैले भलाइको आशा गरेँ, तब खराबी आयो । जब मैले ज्योतिको आशा गरेँ, त्यसको साटो अन्धकार आयो ।27 मेरो हृदय कष्टमा छ र यसले विश्राम लिँदैन । कष्टका दिनहरू ममाथि आएका छन् ।28 अन्धकारमा बसिरहेको मानिसझैँ म हिँडेको छु, तर सूर्यको कारणले होइन । म सभामा खडा हुन्छु र मदतको लागि पुकार्छु ।29 म स्यालहरूको भाइ, अस्ट्रिचहरूको मित्र भएको छु ।30 मेरो छाला कालो छ, र पत्रै-पत्र भएर झर्छ । मेरा हड्डीहरू रापले जलेका छन् ।31 त्यसकारण मेरो वीणाले शोकका गीतहरू गाउँछ, र मेरो बाँसुरीले रुनेहरूको निम्ति गाउँछ ।