3
1 Nangniw Khrista lev ringcthau dat nchamc thena, Khrista Ravguangc baanzat thangc dungc bammei bamv tingkauh thangc naimei puat khou tei nangniw lungc lou o. 2 Nangniw lungning mi mbaanv tuang puat khou hamhna, tingkauh thangc naimei puat khou tei gutlou o. 3 Kalam thu nangniw theic tang the, nangniw tuang ringcpaan hei Khrista lev Ravguangc khou rylou bam the. 4 Nangniw tuang ringcpaan ling kiu thu Khrista hei the. Kumna kata ndauh patpui nungc kiu, nangniw ta ni ndauh patna kamei hymdaihmei kumcna hymdaic puni.
Panty Karaan khatni Kathanc
5 Mi zaeng rui, nangniw khou nai bammei mbaanv tuang kahawmei guay tei titheic o. Mi kiu: lungcmaanvmei, mphuammei, nthah boulahmei, simei ta kahawmei, khatni agaemvmei (mi hei ravmaengc kalummei e) mi guay hei e. 6 Mi guay zaeng ruie Ravguangc lungpuam key puni. 7 Nangniw ta mi guay hei rui zyn bampui ganv khou tei, nangniw mi guay hei taancna lungc bam khwan e.
8 Tiki ntaw thu, nangniw lungc puamhmei, lungnut naimei, khatni meickai ta karaengmei, mi guay hei ganc nina e. Meickai ta sakasicmei lat khatni nroucpui lat nangniw mwang khou rui pat lak nina e. 9 Nangniw khat khat khou saraemh rio. Kalam thu nangniw meic raan ta tei katuang kheiliak kazauhna luak ganc kan the, 10 kumna meic thanh tei nulou dat the. Mi hei nangniw kata thay nthan khang, Damcloumeipu Ravguangc rui kata luihmei khou tikathanclou dat bammei meic thanh e. 11 Mi zaeng rui, Grikmei khatni Jihudimei, gihruamhmei khatni gihruamh makmei, daicthaumei zaat khatni daicthau makmei zaat, bangh khatni nyngswmei twmei nai dat mak khe. Kadai thu Khrista hei di the, kumna kamei meic guayna khou bam e. 12 Nangniw hei Ravguangc mei nunc e; kamei rui nangniw ta nzianna kamei khang kapahlou the. Mi zaeng rui, nzianthaymei, nzianthaymei, niamhmei, nzaenghmei khatni khaengvthaymei rui pheybaan piu kumc piu o. 13 Khat khat ruc khou khaengvlou kary o khatni nangniw thowkumhmei ruc khou pian makmei tuang nai e thei, khat khat ta kuaklou kary o. Poubauhmei rui nangniw ta kuakloumei kumcna, nangniw khat khat ta kuaklou nina e. 14 Mi guay ruc khou rui, nangniw khat khat ta nzian o. Mi hei rui nangniw ta lungc khat swna bang kariulou puni. 15 Khrista tuang chuzaenghmei tei rui nangniw lungc ta chaeng zay bam kan di tho. Kalam thu nangniw ta pumh akhat khou kaw kariuloumei hei mi kumna chuzaenghna lungh khang e. Kumna thuancku o. 16 Khrista tuang lat nangniw lungc khou chingkhiuhna nai nina e. Ningting padikna khat khat ta ncham kary o. Kalumlu, hymthuanhlu khatni nthanmeilu swan o. Nangniw lungc khou thuanckuna Ravguangc khou swan o. 17 Taanv khou pwni, latsav khou pwni, nangniw samei, taanhmei guay tei Poubauhmei Jisu zanc khou sa o khatni taanc o. Kapaan rui Pu Ravguangc ta thuancku o.
Khristian Kaikhunc khou Tat Nimei Kheiliak
18 Now thiu, nangniw gaanv bangc khou bam o; mi hei Poubauhmei mei swna sw nipui zi e.
19 Gaanv thiu, nangniw now ta nzian o; kaniw ta bangh ta kumcna sw rio.
20 Alaucthiu, ramh lam katana khou nangniw pui pu lat piu o; mi hei Ravguangc rui kahawmei e.
21 Pu thiu, nangniw nac nunc ta tilunghpuamh rio; kaniw lungh tangkhyn pw ramc e.
22 Bangh thiu, nangniw kaipouc nunc lat kalam kaguayna khou piu o. Kaniw mikzaw khou tipianlou khang na hamhna, Poubauhmei ta pingna, lungning nthanna taanc o. 23 Maansei khang taanc bam tu e twna ning makna, Poubauhmei khang taanc bam tu kumcna nangniw taanhmei guay lunghgutna taanc o. 24 Poubauhmei rui kamei nunc khang chamdaanvlou bammei tei nangniw khang swan swna tii puni. Kalam thu nangniw rui siamruai sw bammei kaipouc ling kiu thu Khrista hei e. 25 Nkhuaimei taanhmei nunc tei nkhuaimei taancloumei phy laa puni; Ravguangc thu guhsw gahsw mak e.