2
1 Nangniw khang, Laudikiamei nunc khang khatni ata zawthay zaw how makmei baihmei guay khang ni adih ranvna karamc bam cho twmei nangniw thay kanmei ta laa nii e. 2 Mi kiu meic guay ta katiuthaulou khang khatni nzianmei rui bang kariulouna kamanv kungc kanmei lwmsimei nai dat makmei tei meic guay khou nai khang, mi kumna meic thay makmei Ravguangc raeng,a Khrista ta thay khang e. 3 Ningting khatni thaymei tuang lanv hei kakhou nai e.
4 Meic nunc tuangc lat sa thaymei tei rui nangniw ta guat mak khang ai mi hei sa tuang e. 5 Ai nangniw pang khou apumc kahak bam mak sini, abumaengc bamna, nangniw maniatna Khrista khou lwmmei khou chalingc dingna ntipna ding bammei ta howna ai neihla e.
Khrista khou Nthuihmei Ringcpaan
6 Nangniw Khrista Jisu ta kaipouc swna laaloupui thei layna, kakhou lungc bam o. 7 Nangniw khou nchamlou kanmei tei kumcna, nangniw maan kakhou zangc nthuk key o, nangniw panty kakhou kasiamh thau o, khatni lwmmei khou ntip bam o. Thuanckumei rui padikna bam o.
8 Khrista khou rui hamhna, maansei tuang rac kadai keymei pary khou rui khatni mbaanv sinmei bumaengc nunc khou rui guangmei tuang nsakaraeng meicguatmei maansei tuang ningting tei rui nangniw ta bangh tisw dat mak khang ramhthay o. 9 Maansei swmei Khrista khou Ravguangc lwnlung kapwm nai e. 10 Kumna Khrista khou nangniw khang nthuihmei ringcpaan tiilou the. Kamei hei bumaengh tuang dihsinmei khatni ngamvsinmei guayna tuang kapy e.
11 Khrista khou nangniw hei gihruamhmei nunc the. Mi tei maansei baanc rui gihruamhmei tuang hamh e; Khrista rui paapc tuang lwnlung tei luak gancloumei tuang gihruamhmei e. 12 Nangniw duilup khou tei Khrista thei tarou khou lay mbeihlou the, khatni Khrista ta tiringcthauloumeipu Ravguangc pumtan khou lwmmei paan rui nangniw ta Khrista thei tiringcthaulou dat the. 13 Nangniw gihruamc makmei khatni twanlyampui mei swna theicna bam khwanmei nangniw ta, ntaw thu Ravguangc rui Khrista thei tiringcthaulou dat the. Ravguangc rui aniu paap guay kuaklou the; 14 aniu tuang pow guay hy kaduailoumei, khatni mi lam khou hyloumei latzan latdanv guay tei kazauhna kamei rui thut maanlou kan the, khatni mi tei theihchouc khou hian binlouna laa ganclou kan the. 15 Khrista rui theihchouc khou bumaengh tuang dihsinmei nunc khatni ngamv sinmei nunc tuang pumtan guay tei luak ganc lanad rihngamna kaniw ta kathei khou tilwan pat kanmei tei meic guay khou lyanlou kan the.
16 Mi zaeng rui, tu zangvmei lam khou, nthanmei tingmik lam khou, Bwthanh Ngai lam khou, khatni Sabbath lam khou meic gaanv khat na rui sini nangniw ruc khou latzan sw dat mak kan di tho. 17 Mi guay hei thu thei thangc guang punimei maengc de; kaling kiu thu Khrista hei the. 18 Kaniw tuang ndawman khou phaydyng swna, kaniw ta tikauhlouna, kandih chwn khou rui kalam cha makna gaenghswna, ramhkhe swna liwkeymei khatni kauh baanchara nunc ta kalummei hei sw nina de twna katiu bampui mei nunc tei rui nangniw ta nkhuaimei tiswlou mak khang sw o. 19 Mi kumhpui mei tei kapy Khrista khou alamv bam makpui mei e. Kalam thu kapumc kapwm tei kapy khou karyan karuc khatni thuriang rui duanc alamvlouna Ravguangc rui kahawpui thei layna daicthau bam tuang e.
Khrista lev Theic Nchamc Ringc Nchamcmei
20 Nangniw Khrista lev theic nchamc the, kumna mi mbaanv sinmei bumaengc guay khou rui theic the. Kum e thei nangniw tabui swna mi mbaanv tuang kumcna lungc bam tu cho? 21 "Mi hei sin rio", "mi tei mbap rio", "mi tei kahi rio", twmei riak guay hei tabui swna ngaek bam tu cho? 22 Mi guay hei kaganv akhat khou tat bam khwanmei, maan kanmei, maansei rui kasiamhmei riak khatni latdyn e. 23 Mi kumhmei riak guay hei kauh baanchara nunc ta kalum nina de twna sa khang, kachangc hamhmei liwkeymei khang, khatni meic pumc ta rai khang thu ningting kumcna ninglou e; tiki meic pumc rui kahawmei ta sinriap khang thu mi tei rui gaeng tuang maek e.