Kolossiamei
KHOU Paul RUI HYMEI TATDYN
1
Chaengriw Lat
1 Ravguangc rui ningmei thei layna Khrista Jisu tuang Latdiutatmei Paul khatni aniu chana Timothi rui—
2 Kolossiamei Ravguangc mei nunc, Khrista Jisu khou lwmnuhmei chana punav guay khou hymei:
Aniu Pu Ravguangc rui nangniw khou zauzian khatni chuzaenghmei tiilou diu!
Thuanckuna Huayneymei
3 Aniw rui nangniw khang huayneymei kathuic, aniu Poubauhmei Jisu Khrista Pu, Ravguangc ta thuancku tanh tan bam e. 4 Kalam thu nangniw Khrista Jisu khou lwmmei lam khatni nangniw rui Ravguangc mei nunc ta nzianmei lam tei aniw chu the. 5 Mi tei kahunungc nangniw chu kanmei nchumhmei Gaychamv rui tii guangmei tingkauh thangc nangniw khang nai bammei rigwnmei khou tei rui guangmei lwmmei khatni nzianmei tei e. 6 Nangniw mi nchumhmei Ravguangc zauzian chamv hei chu lana kabah thaylou nungc tei rui thauna, nangniw khou swlou bammei kumcna, mbaanv kapwm khou ni mi gaychamv hei kathai nthai bam e khatni baanc lik pat bam e. 7 Aniw lev siamruai taanv taanc nchamcmei nzianmei, Khrista khang lwmnuhmei taanvruaimei, aniw phaana gaychamv dincloumeipu Epaphras khou rui nangniw Ravguangc zauzian lam tei thay kan the. 8 Bumaengh rui nangniw khou tiiloumei nangniw ramzian lam tei kamei rui aniw khou dinclou the.
9 Mi zaeng rui, nangniw lam khou chu rap khou rui thauna aniw rui nangniw khang taek makna huayney bam e. Bumaengh rui tiiloumei kabah thaymei khatni ningting paan rui Ravguangc rui ningmei ta thaymei hei nangniw khou padikna nai khang huayney bam e. 10 Kum pwkhou nangniw Poubauhmei rui ningmei khou lungc ngam puni khatni kamei rui kahawmei taanc ngam puni. Nangniw panty khou gaymei taanv guay taanc pat puni khatni nangniw Ravguangc ta thaymei mbu thau puni. 11 Nangniw ramh lam katana khou neihlana khaengv ngam khang, katuang hymdaihmei pumtan nangniw khou tiilou diu o. 12 Ravguangc rui kamei nunc khang gaanhmei guangcdic khou chamdaanvloumei tei lay laa biuhpui mei nangniw ta tiswloumei aniu Pu ta thuancku o. 13 Kamei rui aniu ta zinghmei pumtan khou rui gulouna, kamei rui nzianmei kaNac Mpouh tuang guangcdic khou phungc guanglou the. 14 Khrista rui aniu ta thuak patlou the, aniu paap guay kuaklou the. 1.14: Eph 1.7
Khrista khatni Katuang Taanv
15 Khrista hei mik rui how makmei Racguangc lwnlung e. Kamei hei damcloumei katana ruc khou nareimei e. 16 Kalam thu, tingpuk kandih khou nai bammei howmei, how makmei ramh katana, guanghbamvpaeng guay, kaipouc guay, dihsinmei guay, khatni ngamv guay kazauhna kapaan rui khatni kakhang rui damclou the. 17 Ramh khat na sini nai mak khou rui kamei nai bam khwan the, kumna kakhou ramh guayna bangc kariulou the. 18 Kamei hei kapumc phwamling tuang py e; kapumc hei ringc khang kakhou rui tii guang e khatni kamei hei nareimei, theihmei khou rui ringcthau datmeipu e. Mi hei kamei ramh kaguayna ruc khou kapysinghmei sw khang e. 19 Ka Nac Mpouh khou Ravguangc lwnlung kapwmna naimei hei Ravguangc rui ningmei e. 20 Kumna Ka Nac Mpouh paan rui mbaanv kapwm ta kakhou phungc guanglou datmei hei Ravguangc kamei rui ningmei e. Katuang theihchouc zei paan rui tingpuk kandih khou naimei ramh katana ta kakhou zaykariulou dat the. 21 Nangniw tuang simei lungning khatni simei taanv guay zaeng rui, nangniw Ravguangc tuang zauczihmei swna kakhou rui ntamv ducna bam khwan e. 22 Tiki ntaw thu, kanac mpouh theicloupui paan rui, nangniw ta Ravguangc rui kakhou zaykariulou dat the. Mi hei nangniw nthanmei, chagey makmei khatni khuay maekmei swna kahu khou guang khang e. 23 Mi zaeng rui, nangniw gaychamv chuna lwmlou kanmei tei pat pat gut gut tuang sw makna, nangniw lwmmei khou tei ntipna khatni chalingc dingna bam tanh tan nina e. Mi gaychamv kiu thu mbaanv khou meic katana khou dinc bammei, Paul ai mi tuang taanvruaimei sw bammei gaychamv hei e.
Phwamling tuang Siamruaimei Paul tuang Taanv
24 Ai nangniw khang ryanra khaengv bammei hei ai neihla e. Kalam thu apumc ryanramei hei rui, Khrista rui kapumc phwamling khang ryanra nimei dam naimei tei ai tiguang nthuihlou khang nkhav bam tuang e. 25 Ravguangc rui ata phwamling tuang siamruaimei tiswlou the. Mi kiu thu, Ravguangc lat hei nangniw khou dinc ntanghna dinclou khang e. 26 Mi kiu thu, reydouc dinclou makna lou bammei, ntaw kamei nunc khou ndauhloumei lat hei e. 27 Ravguangc kamei rui meic guay khang chamdaanvloumei daihmei khatni hymdaihmei meic thay makmei raeng hei Jentailmei pang khou tithaylou khang kamei rui ningmei e. Mi meic thay makmei lat kiu thu Khrista nangniw khou bam e twmei hei e. Mi kabac kiu thu nangniw Ravguangc hym lay laa puni twmei lwmgaymei e. 28 Mi zaeng rui, aniw meic katana khou Khrista ta dinclou e. Khrista khou meicphamei akhat swna kaniw kathuic ta Ravguangc khou phungc guanglou nuh khang ningting naimei guay sinswna kaniw ta pingthay khang dinclou e khatni thay khang nchamlou e. 29 Kumna akhou tiilou bammei ngammei pumtan hei sinswna, mi khang ai taanc ranvna karamc bam e.