4
1 Kaipouc thiu, nangniw tuang kaipouc ni tingkauh thangc nai e twmei ningtowna, nangniw bangc nunc khou kaniw khang swlou zypui tuang tei nchumhna swlou o.
Dincloumei
2 Taek makna huayney bam o; ntak nrakna huayney bam o. Ravguangc ta thuancku bam o. 3 Katuang rylou bam khwanmei Khrista chamv hei dinc ndauh khang Ravguangc rui chaeng laanclou khang aniw khang ni huayneylou o. Mi zaeng rui ntaw ata kangkai khou bangclou bam e. 4 Mi chamv hei dinc nimei athouc hei, chamv hei nthanna dinclouna taanc ngam khang huayneylou o.
5 Khristian hamhmei nunc hu khou tei nangniw ningtyngna lungc o. Kadouchamei ariwmei tei swmaan rio. 6 Nangniw latsav mangui puypui lat khatni meic nuh gaypui lat sa tanh tan o, kumna meic guayna khou kazipui lat daw thay o.
Kadymei
7 Poubauhmei taanv taanc nchamcmei, lwmnuhmei siamruaimei, nzianmei chana Tukhikas rui ai akumh bam tu cho twmei nangniw khou raclou puni e. 8 Aniw guayna akumh bam tu cho twmei nangniw khou raclouna, nangniw lung tineihlalou khang ai rui kata nangniw khou ndiulou tuang e. 9 Nangniw pang khou bammei, lwmnuhmei nzianmei chana Onesimas ni kamei lev tat nchamc kan e. Mi khou hei akumh bam tu cho twmei kaguayna kaney rui raclou puni e.
10 Ai lev kang bam nchamcmei Aristarkhas khatni Barnabas tanpui nac Mark rui nangniw khang dwangay kady e. (Kamei nangniw daeng khou guang pw e thei, kata laalou o twna nangniw khou salou kanmei Mark tei e.) 11 Jastas twna ni kawmei Joshua rui ni nangniw khang dwangay kady e. Jihudimei lwmloumei pang khou rui ai lev Ravguangc Guangcdic khang taanv taanc nchamcmei mi nunc gaanv thumh na hei de. Kumna kaniw rui ata mpeyna nkhavlou the.
12 Nangniw pang khou kazauhmei, Khrista Jisu bangc Epaphras rui ni dwangay kady e. Nangniw meicphamei swna ding ngam khang khatni Ravguangc rui ningmei nthanna thay ngam khang, kamei nangniw khang ranvna huayney bam e. 13 Kamei nangniw khang khatni Laudikiamei lev Hierapolismei khang taanc ranvna bammei tei ai thay e. 14 Nzianmei maipah Luk khatni Demas rui nangniw khang dwangay kady e.
15 Laudikia khou bammei chana nunc khou, Numpha khatni kakai khou kariu bammei phwamling khang aniw rui dwangay kady e. 16 Mi tatdyn hei nangniw pac tangv e thei, Laudikiamei phwamling ta tipac o. Kumna Laudikia khou rui tii guang nimei tatdyn tei ni nangniw pac o. 17 "Poubauhmei tuang taanv nang khou tiilou kanmei tei taanc luailou o," twna Arkhippas khou salou tio.
18 Mi hei abaanc kahak rui hy tuang e: Paul rui dwangay kady e. Atuang kangriang ta hei amuc rio!
Ravguangc zauzian nangniw khou naimei sw diu!