2
Niamhmei khou Khrista ta Nzeic o
1 Khrista khou katiuloumei, nzianmei khou rui swmloumei, Bumaengh khou laa nchamcmei, nzianthaymei khatni nzianloumei nai e thei, 2 mi lungning kahak tei nai nchamcna, mi ramzian kahak tei rui khat khat ta nzianna, lungh khat chwn khat swna aram neihla tipadiklou khang zaenghuay e. 3 Nangniw kakhang khang na ningna gaeng makmei tuang daic niimei chwn khou rui ramh khat sini taanh rio; tiki niamh o. Meickai ta nang khang suangc mbumei dyng e twna ning o. 4 Khat khat khang zauclou thay o; kakhang khang na zauc rio. 5 Khrista Jisu tuang lungning hei nangniw khou ni nai nina e.
6 Kakhou Ravguangc lwnlung nai bam sini,
kamei Ravguangc lev nchamc ni dec twna ning mak khwan e.
7 Tiki kachwnphuakh khou rui,
katuang guay ganclouna bangh lwnlung laa the,
kamei maansei guanhna lungc guang the.
8 Kamei niamh keyna maansei pumc swna lat piulou the,
theihchouc khou theicloumei nganv piulou the.
9 Mi zaeng rui Ravguangc rui kata
kauh liangmei bamv khou tikulou the,
zanh guay pang khou daic liangmei zanc kakhou tiilou the.
10 Kum thena, tingkauh, kandih khatni
kandih bangc khou bammeid katana,
kazanc ta chakhwang swna khuksun key puni,
11 khatni Pu Ravguangc tuang hymdaihmei khou,
meic katana rui Jisu Khrista hei Poubauhmei e twna sa puni.
Mbaanv khou hei Gaanc Bam o
12 Nzianmei thiu, ai bam khou nangniw lat piuna bammei tei kumcna, ai bam mak khou ni lat piu chuy diangcna bam o. Nangniw ta guloumei tei ti-nthuihlou khang, ping kadunhna karamc bam o. 13 Kalam thu Ravguangc kamei rui ningmei tei piu nii khang khatni piu ngam khang kamei nangniw khou taanv taanclou bam e. 14 Nangniw ramh guayna khou khat khat ta khanc lanc tuang, hamh e thei khat khat ta agay agi tuang maekna taanc o. 15 Kum pwkhou nkhuai mbamei khatni simei mei kin khou hei, nangniw khuay maekmei khatni nthanmei swna nthuihmei Ravguangc nac nunc sw khang e. Gaanchuangcna kumc nangniw mbaanv khou gaanc o. 16 Ringhmei lat tei sin ntip bam o. Kum pwkhou ataanv hei nsa hamh the twna Khrista tingmik nungc kiu ai gaengh sw khang e. 17 Nangniw ramlum tei Ravguangc khang katlou khang apanty zei hei ravcha swna bunlou e thei, ai neihla e, kumna nangniw lev neihla nchamc e. 18 Mi tei kumcna, nangniw ni neihla nina e, kumna ata ni tineihlalou o.
Timothi khatni Epaphroditas
19 Ravguangc rui chwnmei e thei, asaanh makmei lungc khou Timothi ta nangniw daeng khou ndiu khang lwmgay e, kumna kamei rui nangniw chamv phungc guang datna ata tineihla thaulou khang e. 20 Ai lev lungh tamzuanmei khatni nangniw khang kadan changh bammei Timothi kumhmei meic baihmei maek e. 21 Baihmei guay thu kakhang khang na phuna, Jisu Khrista khang thu ninglou mak khe. 22 Timothi ramgai tei nangniw thay e. Gaychamv siamruai taanv khou aney hei punav kumcna taanc nchamc bammei tei nangniw thay e. 23 Ai akumhmei lwnlung khou bam dat puni cho twmei thaypuilev Timothi ta nangniw daeng khou ndiu guang khang lwmgay bam e. 24 Ai kahak ni asaanh mak khou nangniw daeng khou guang khang Poubauhmei khou lwmgay bam e.
25 Ai lev taanv taanc nchamcmei, rihmei sw nchamcmei, nangniw tuang latdiumei, ata siamruai swloumei achana Epaphroditas ta nangniw daeng khou ndiu guang khang kage nai e twna ning the. 26 Kamei nangniw ta how dat niina bam e khatni kamei mpeyna lungc katuakcna bam e. Kalam thu kamei nnau kanmei tei nangniw chu kan the. 27 Kamei nnauna theic ni kumclou the. Tiki Ravguangc rui kata na hamhna ata ni nzianlouna zaengsimei khou rui tizaengsi katynlou nimei khou rui tiduaklou the. 28 Kumna ai rui kata nangniw daeng thangc ndiulou nii ranv the. Kalam thu nangniw kata how e thei neihla puni the, kumna alung ryanramei ni kuak puni the. 29 Kumna nangniw kata Khrista khou neihlana laalou o. Mi kumhmei mei nunc ta hei chakhwang swlou o. 30 Kamei Khrista tuang taanv khou rui, nangniw taanc tangc ngam makmei ata nkhavloumei taanv khou rui kamei theic duaklou the.