Philipimei
KHOU Paul RUI HYMEI TATDYN
1
Chaengriw Lat
1 Khrista Jisu tuang taanvruaimei nunc Paul khatni Timothi rui—
Philippi khou bammei Khrista Jisu khou nthanmei nunc, phwamling kapy nunc khatni diken nunc khou hymei:
2 Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu.
Paul rui Huayneyloumei
3 Ai nangniw ta ningtowpui kathuic aRacguangc ta thuancku bam e; 4 khatni ai nangniw khang huayneymei kathuic, ai neihlana huayney e. 5 Mi kiu thu, reymei nungc tei rui thauna ntaw nganv nangniw ai lev gaychamv taanv khou taanc kariu guangmei khang hei rui e. 6 Kumna mi gaytaanv hei nangniw khou kahouhloumei Racguangc rui, Khrista Jisu tuang Tingmik nganv mi taanv hei taanc suaklou puni twmei ai lwm e. 7 Nangniw hei alung khou nai tanh tan bam e. Ai nangniw ta mi kumna ning bammei hei nchumh e. Tabui cho tiki, ntaw ai kangkai khou bam khou ni, gaychamv dinggaekna khatni sw ntiplouna tat bam khou ni, Ravguangc zauzian khou kadam laa nchamcmei nunc e. 8 Khrista Jisu tuang nzianmei rui ai nangniw ta mi kumcna ning bam e twmei Ravguangc thay e.
9 Nangniw ramzian hei, nchumhmei ta thaymei lev si gay thaymei kazauhna mbu hay hay thau khang ai huayney bam e. 10 Kum pwkhou tabui tei gay liangmei cho twmei kakhanh thayna Khrista tuang Tingmik nungc nangniw nthanmei khatni khuay maekmei sw khang, 11 khatni nangniw panty khou Khrista khou rui guangmei ravchaptatmei thay rui padikna Ravguangc tuang hymdaihmei thuanh khang e.
Ringc Bammei hei Khrista Khang e
12 Chana thiu, aruc khou patlou bammei hei rui gaychamv hei mbuna thay lik pat kan the twmei nangniw thaymei ta laa nii e. 13 Ai kangkai khou bammei hei Khrista khang e twmei guanghkai rigaanv nunc khatni mi khou tei bammei guay thay kan the. 14 Ai kangkai khou bammei hei rui aniu chana nunc geihmei ta Poubauhmei khou lwmmei ti-ntiplou kan e, kumna kaniw bauc mbu hay hay thauna ping tuang maekna Ravguangc tuang chamva dinc the.
15 Ngguay, kaniw gaanv saekc thu mamavmeii zaeng rui khatni agay niipui zaeng rui Khrista lam khou dinc e; tiki gaanv saekc rui gay kan tu laa nii changhna dinc e. 16 Kaniw hei thu nzianpui zaeng rui dinh tuang e. Kalam thu gaychamv ta hei dinggaek khang Ravguangc rui ata lou bam tuang e twmei kaniw thay e. 17 Tiki baihmei guay tei thu Khrista ta dinc bam changh tu hamh e; kaniw khang ningna kangkai khou bammei ata hei tiryanra katyn khang sw bam tuang de. 18 Lungning nkhuaina ny, nchumhna ny Khrista ta dinclou kan e thei kiuc di the twna ai thu neihla e. Ai neihla bam puni. 19 Kalam thu nangniw rui huayneymei paan rui khatni Jisu Khrista tuang Bumaengc rui nkhavloumei paan rui ata mpat patlou dat puni de twmei ai thay e. 20 Ai rui kahawmei khatni lwmgaymei kiu thu, ai zak zat ni tu hamh e; kaganv kathuic, nkunna ntaw hei, ringc pwni, theic pwni baucna ai Khrista hym tidaiclou puni de twmei hei e. 21 Kalam thu, akhang thu, ringhmei hei Khrista khang e, theihmei rui akhang gaeng e. 22 Tiki ringc bam e thei, gaengmei taanv taanclou mbu nuh e. Mi khou hei tabui tei kapah nina cho ai sa khang thay mak khe. 23 Khat ta ni, khat ta ni ai kahawmei rana di the. Ai mi panty hei mpatlouna Khrista khou bam kan nii the; mi tei akhang swna thu gaengmei di the. 24 Tiki nangniw khang swna ai ringc bammei hei kage nai ranv e. 25 Mi hei kage nai changh e, kumna ai ringc bam puni di he twmei ai nthanna thay e. Nangniw lwmmei khou daicthau bam khang khatni neihla bam khang ai nangniw lev lungc bam kanak puni di he twmei ai lwm e. 26 Mi hei ai nangniw lev bam nchamc dat pwkhou, nangniw azaeng rui Khrista khou gaengh sw mbu hay hay bam khang e. 27 Ntaw nthukmei thu, nangniw tuang panty lwnlung tei Khrista tuang gaychamv rui samei kumcna lungc nina e. Kum pwkhou, ai guangna nangniw zaw how dat pwni, how dat mak pwni, nangniw lungc khat swna ding ntip bam e khatni gaychamv tuang lwmmei khang tei kahawmei akhat na naina adow nchamc bam e twmei ai chu puni. 28 Nangniw tuang zauczihmei nunc ta tei ping rio; bauc bam o. Mi bauhmei hei rui kaniw ngam ni tu hamh e, nangniw ngam puni twmei lyan tuang e. Kalam thu rihngammei hei Ravguangc rui tiilou tuang e. 29 Kalam thu Khrista khou nangniw khang tiiloumei zauzian hei kakhou lwm khang na hamhna, kakhang ryanra khaengvlou khang ni kadouchamei tiilou the. 30 Kalam thu ai adow kanmei ta nangniw how kanmei khatni ai ntaw adow bammei ta nangniw chu bammei ric hei, nangniw ni ai lev adow nchamc bam the.