5
Gaanhmei khou Lunghmei
1 Nangniw hei Ravguangc rui heidikamv nzianmei nac nunc di thena, kata luih khang sw nina e. 2 Khrista rui aniu ta nzianna, Ravguangc ta tipianloumei namhgaymei agaw nteina katlou kumc, kapanty aniu khang tii patloumei tei kumcna, nangniw ni khat khat ta nzianna lungc o.
3 Nangniw Ravguangc mei nunc pang khou thu lungcmaanv lungcmowmei, mphuammei, agaemvmei; mi guay hei lat na sini satow bam lak nina e. 4 Nkhuc nroucpui lat samei, chapav swmei, mphuammei kiaula, mi guay hei kazi mak khe; mi hei sw lak nina e. Mi phaan tei Ravguangc ta thuancku bam nina e. 5 Lungcmaanvpui mei, mphuampui mei, agaemvpui mei (agaemvmei hei ravmaengc kalummei e) tei Khrista khatni Ravguangc guangcdic khou kadam maek e twmei nangniw thay nina e.
6 Nsakaraeng lat rui nangniw ta tiguat rio. Mi guay zaeng rui latliammei nunc ruc khou Ravguangc lungpuam keylou puni. 7 Mi zaeng rui, mi kumhmei nunc ta tei nangniw duang sw rio. 8 Nangniw ni kahunungc zinghmei sw bam khwan e; tiki ntaw thu Poubauhmei khou gaanhmei di thena, gaanhmei nac nunc kumcna lungc o. 9 Kalam thu, gaanhmeia thai thu gaymei, ravchaptatmei, khatni nchumhmei e. 10 Poubauhmei rui kahawmei tabui tei cho twmei thay khang karamc o. 11 Zinghmei tuang gaeng makmei taanv guay tei lay kazauh rio. Mi phaan tei, simei tuang simei taanv guay tei ndauh pat o. 12 Kaniw rui nkamhna taanc bammei taanv guay tei sa bam khang sini zakpui tuang e. 13 Gaanhmei rui tigaanclou pwkhou ramh guayna kalingmei tei how ngam e. 14 Kalam thu ramh guayna tihowlou kanmei tei gaanhmei e.b Mi zaeng rui mi kumcna sa e:
"Zip bammei nang, zipthau tho;
theihmei khou rui thau tho;
Khrista rui nang khou gaanclou puni the."
15 Nangniw akumhna lungc bam tu cho twmei zauc chuy o. Mpangmei nunc kumcna lungc rio, ningtyngmei nunc kumcna lungc o. 16 Kaganv hei gaytaanv khang asutna piu o; ntaw ganv hei sipui ganv e. 17 Mpang ri tho, Ravguangc rui ningmei tei phu tho.
18 Zouh mba riu; mi tei rui nang ta swkasic puni. Mi phaan tei Bumaengh rui padikna lungc o. 19 Nangniw khat khat khou kalumlu, hymthuanhlu khatni bumaengh tuang lu lat tei sa swan kary o; khatni nangniw lungsyng rui thuancna kalumlu khatni hymthuanhlu Poubauhmei khou suanlou o. 20 Aniu Poubauhmei Jisu Khrista zanc khou, ramh guayna khang kaganv katana Pu Ravguangc ta thuancku bam o.
Now lev Gaanv
21 Khrista ta chakhwang swna nangniw khat khat bangc bam o. 22 Now thiu, nangniw Poubauhmei bangc khou bammei kumcna, nangniw gaanv bangc bam o. 23 Khrista hei kamei rui gu patloumei kapumc phwamling tuang py swmei kumcna, gaanv hei ni now tuang py e. 24 Mi zaeng rui phwamling rui Khrista bangc bammei kumcna, now rui ni kalam katana khou gaanv bangc bam nina e.
25 Gaanv thiu, Khrista rui phwamling ta nzianna mi khang kapanty tii patmei kumcna nangniw now ta nzian o. 26 (Mi hei lat khatni dui rui sw-nthanlouna reic patlouna, 27 phwamling ta mi mphuam tanacmei, tarat taruaihmei, khatni nthuih makmei maekna, nthanmei, hiaksuimei, howgaymei swna kamei rui kakhang tiilou khang e.) 28 Gaanv rui now ta kapumc ta kumcna nzian nina e. Kanow ta nzianpui mei tei kata nzian tuang e. 29 Meic gaanv khat na sini kapumc ta karaeng mak e. Karaengmei phaan, Khrista rui kapumc swmei phwamling khang swloumei kumcna, kamei rui kakhang titu tizangv e khatni kadanlou e. 30 Kalam thu aniu hei kapumc nanw the 31 "Mi zaeng rui, nggaanvmei rui kapui kapu ta mpatlouna kanow khou kariu nina e, kumna kaney gaanv nei tei akhat na sw nina e." 32 Mi khou hei meic thay tangh makmei nthukmei kabac nai e, kumna mi hei Khrista lev phwamling lam khou sa tuang e. 33 Tiki mi hei nangniw khang ni sa tuang e: gaanv rui now ta kapumc ta kumcna nzian nina e, khatni now rui gaanv ta chakhwang sw nina e.