6
Nah nunc khatni Pui Pu
1 Alaucthiu, Poubauhmei khou nangniw pui pu lat piu o. Mi hei nchumh e. 2 "Nang pui nang pu ta chakhwang sw o," twmei hei rey liangmei latdanv e; kum pwkhou, 3 "Nang dwan gay puni khatni panty lungsing puni," twmei latryan nai e.
4 Pu thiu, nangniw nac nunc lungc tipuamclou rio. Mi phaan tei nchamlouna Poubauhmei khou makuat thau o.
Bangh khatni Kaipouc nunc
5 Bangh thiu, nangniw tuang kandih khou tuang kaipouc nunc ta ni ping kadunhna kaniw lat piu o; khatni Khrista tuang siamruai sw tu kumcna kalungc kapaengc nai makna taanc o. 6 Kaniw zauc bam khou na kaniw pian nuh khang swmei tei sw rio; tiki Khrista tuang bangc akhat swna nangniw lungc kapwm rui Ravguangc rui kahawmei tei taanc o. 7 Maansei siamruai na sw tuang e twna ning makna, Ravguangc siamruai sw tuang e twna ningna lunghgutna taanc o. 8 Bangh pwni, bangh hamhmei pwni, kamei kamei rui taancloumei gaymei taanv khang tei Poubauhmei rui swan tii puni twmei thay o.
9 Kaipouc thiu, nangniw ni kaniw ta mi kumcna sw o. Kaniw ta kadungna sw nthaekc tho. Nang ney tuang kaipouc tingkauh thangc nai e, kamei thu guhsw gahsw mak e twmei nangniw thay e.
Ravguangc tuang Ricpwan
10 Nkhamh khou, nangniw Poubauhmei khou bamna, katuang tanhmei pumtan tei laana, nangniw pumtan tanc thau o. 11 Ravsic tuang simei rouc guay khou tei rui ding ngam khang Ravguangc tuang rihpwan kapwm tei piu o. 12 Kalam thu aniu rui adow bammei hei zei lev zanh pumc ta hamh e; tiki tingpuk kauh bamv guay tuang kheihsimei ravsic nunc kaipouc nunc, ngamvsinmei nunc khatni mi zinghmei mbaanv tuang pumtan guay ta adow bam tuang e. 13 Mi zaeng rui, Ravguangc tuang ricpwan kapwm tei piu o. Kum e thei, simei ganv guang pwkhou zauczihmei rui adow guangmei ta nangniw akhangv ngam puni, khatni katwan nganv adowna nangniw ding ngam puni.
14 Mi zaeng rui, nchumhmei rui siangiat swna, ravchaptatmei rui ngaengvthuapc swna, 15 chuzaenghmei gaychamv rui phaythuapc swna ding ntip o. 16 Mi ruc khou rui, lwmmei rui nggih swna sin o. Kum pwkhou Simeipu rui kaep guangmei maibwang pailu guay tei sw amit ngam puni. 17 Ringhbamv rui rihpyrun sw o, khatni Bumaengh tuang baengsaeng—Ravguangc lat hei sin o. 18 Kum lana, huayney o, nkhavlou khang ney o. Kaganv kathuic Bumaengh paan rui huayney o. Ntak nrak bam o; khaengvthay o; Ravguangc mei nunc khang huayneylou tanh tan bam o. 19 Akhang ni huayneylou o: ai sa nipui ganv khou sa nimei lat tiilou khang, kumna baucna thay mak khwanmei gaychamv hei dinclou ngam khang huayneylou o. 20 Ai hei thu, ntaw kangriang ntalouna bam sini, mi gaychamv hei dinh khang ndiuloupui mei e. Gaychamv hei ai baucna dinc ngam khang huayneylou o.
Kady Kanavmei
21 Poubauhmei tuang siamruai taanv khou lwmnuhmei, aniu nzianmei chana Tukhikas rui ai akumh bam tu cho khatni ai tabui sw bam tu cho twmei nangniw khou raclou puni. 22 Aniw akumhna bam tu cho twmei nangniw khou dinclou khang khatni nangniw ta katiulou khang ai rui kata nangniw khou ndiulou tuang e.