4
Chwnchamcna Lungc o
1 Mi zaeng rui, Poubauhmei khang kang bammei ai rui nangniw khou huaycha e: Ravguangc rui nangniw ta kawloumei panty lwnlung khou tei lungc o. 2 Kaganv katana niamhna, lungh zaenghna, khatni khaengvthayna bam o. Khat khat khou khaengvlou karyna nzianmei lyanlou o. 3 Chuzaenghmei paan rui nangniw ta bang kariulou bammei, Bumaengh rui tiimei akhat na swmei tei nai tanh tan bam khang ngammei kasang karamc o. 4 Nangniw ta kawloumei tuang rigwnmei hei akhat namei kumcna, pumh akhat de, Bumaengh ni akhat de. 5 Poubauhmei akhat de, lwmmei akhat de, duilupmei akhat de; 6 Ravguangc akhat de. Kamei hei aniu guayna pu e, aniu guayna kaipouc e, aniu guayna khou taanv taanclou e, khatni aniu guayna khou bam e.
7 Tiki Khrista rui aniu khou dam swna nzanhlouna aniu kathuic khou kaipat tiilou e. 8 Nthanmei latrik rui sa e:
"Kamei kauh thangc kupui ganv khou
kangmei mpeyna ta nduangh ku kan e;
kamei rui meicnunc khou kaipat tiilou the."
9 "Kamei ku kan e" twmei kiu tabui kabac cho? Mi kabac thu kamei kandih kabangc kasyng a thangc key the twmei tuang e. 10 Kumna key kanmeipu tei tingpuk kandih khou bam lik sik khang tingpuk ruc kauh thangc ku kan the. 11 Kaipat tiimeipu kiu kamei hei e. Gaanv saekc ta Latdiutatmei khang, gaanv saekc ta muhzwng khang, gaanv saekc ta gaychamv dinh khang, gaanv saekc ta gaenghpouc khatni dinhpouc khang kamei rui tiilou the. 12 Mi hei kaniw hei kaniw rui Ravguangc mei nunc ta siamruai taanv khang kasiamh thaulouna Khrista tuang pumc tidaic thau khang e. 13 Kum pwkhou, aniu lwmmei khou khatni Ravguangc Nac Mpouh ta thaymei khou akhat na swna nchamcna guang tangclou khang, aniu meicphamei swna Khrista tuang hyang ryan daic tangh khang e. 14 Kum pwkhou, kaniw rouc rui meicnunc ta nchumh makmei khou zay mbianghlou tat bammei meicguatmei nunc tuang latdyn rui dui kamuatc kumc, pwanzingh kumc, kaniw ta phungc pat, phungc gut tat bammei alauc nunc kumhmei tei aniu sw dat mak khang e. 15 Mi phaan tei, nzianna nchumhmei lat sana, aniu kalam katana khou kapy Khrista khou daicthau khang e. 16 Kapumc nanw guay tei kapy Khrista khou nsuk alamvlouna, nanw kathuic kathouc kathouc taancna, kapumc tei daicthau khang nzianmei paan rui kasiamh thau khang e.
Khrista khou Panty Kathanc
17 Poubauhmei zanc khou ai rui nangniw khou sa e: gaeng makmei chwn khou rui patmei thei layna lungc bammei Jentailmei nunc tei kumcna lungc dat ri tho. 18 Kaniw lungning zingc the; Ravguangc tuang ringhmei tei kaniw khou maek e. Kalam thu kaniw lungc tanhmei rui kaniw ramh khat sini thay mak khe. 19 Kaniw khou zakmei nai dat mak khe. Nthah boulahmei khou luplou lana kasut tuang nai dat makna simei, mphuammei taanv guay taanc the.
20 Khrista khou rui nangniw khou nchamloumei tei thu mi kumhmei tei hamh e! 21 Nangniw Khrista lam khou chu kan the khatni kakhou naimei nchumhmei tei nangniw khou dinclou kan the. 22 Guatmei tuang kahawmei rui swkasicloumei nangniw tuang meic raan tuang kheiliak tei luak ganc o. 23 Nangniw lungc khatni lungning tei tikalaic patna, 24 Ravguangc ta luicna kasiamhloumei, nchumhmei khou rui ravchaptatmei khatni nthanmei panty lungc ndauh patmei meic thanh tei pheybaan piu kumcna piu o. 25 Mi zaeng rui, saraemc dat ri tho! Khat khat khou nchumhmei sa o. Kalam thu aniu pumh akhat tuang nanw nchamc di the. 26 Nangniw lunghpuamc sini paapc taanh riu; neihmaryn puamc zingc riu. 27 Ravsic khang kadouchamei tii riu. 28 Kaihouh bammei nunc tei houc dat ri tho; maekmei nunc khang tii pat ngam khang, lungning nthanna kabaanc rui taanc dat kan di tho. 29 Nangniw mwang khou rui swkasic nimei lat sa pat rio; tiki chuloumei nunc khang suaihiam sw nimei, kaniw ta kasiamh thaulou nimei kage naimei lat tei sa o. 30 Nangniw hei Ravguangc tuang di the twna thuakloumei tingmik nganv khang nangniw khou tiiloumei Ravguangc tuang Bumaengh Nthanmei tuang lungc tikabiu rio. 31 Lungning nkhucmei, reihsimei khatni lungc puamhmei hei ganc o. Kaudu kaudangmei, sakasic karoucmei, karaengmei lungning, mi kumhmei guay hei ganc o. 32 Mi phaan tei khat khat khou nzianthayna, lungh niamhna, Ravguangc rui Khrista khou nangniw ta kuakloumei kumcna khat khat ta kuaklouna lungc o.