3
Jentailmei nunc khang Paul rui Taancloumei
1 Mi zaeng rui, Jentailmei nangniw khang Khrista Jisu zaeng rui kangkai khou bammei Paul akhou, 2 mi Ravguangc zauzian taanv hei nangniw khang taanclou khang nsinlou the twmei nangniw chu kan the twna laa the. 3 Ravguangc rui katuang meic thay mak bam khwanmei raeng tei ndauh patna akhou tithaylou the. Mi lam khou tei samna ai hylou kan the. 4 Kumna ai rui hylou kanmei tei nangniw pac e thei Khrista tuang meic thay mak bam khwanmei, ai thaymei hei nangniw ni thay puni. 5 Kahunungc thu mi tei Maansei nac nunc khou tithaylou mak bam khwan e, tiki ntaw thu Ravguangc rui Bumaengh paan rui katuang nthanmei Latdiutatmei nunc khatni muhzwng nunc khou ndauhlou the. 6 Mi kiu thu, gaychamv paan rui Jentailmei nunc ni, Jihudimei lev Ravguangc suaihiam laa nchamc puni the. Kaniw hei ni pumh khat di the, kumna Khrista Jisu paan rui tiilou nimei nrianhloumei tei lay laa puni the.
7 Ravguangc rui katuang pumtan rui taanv swlouna akhou katuang kaipat tiilouna gaychamv tuang siamruai taanv hei akhou nsinlou the. 8 Ai hei Ravguangc mei nunc pang khou nthyammei khou rui nthyam liangmei bam khwan sini, kanganv nai dat makmei Khrista tuang lanv tuang gaychamv hei Jentailmei nunc khou dinc ndauh khang, 9 khatni Ravguangc rui taanclou nimei meic thay bam mak khwanmei raeng hei meic guay khou dinc ndauh khang akhou nsinlou the. Ramh katana damcloumeipu Ravguangc rui mi hei reydouc thu ndauh pat makna lou bam khwan e. 10 Mi kiu ntaw hei, phwamling paan rui, kalam katana thay ngammei Racguangc ningting tei tingkauh kandic tuang kaipouc nunc khatni ngamv sinmei nunc thay kan khang e. 11 Mi kiu Ravguangc rui reydouc rui raengc guangmei raeng thei layna, Poubauhmei Jisu Khrista paan rui taanc pat kanmei taanv e. 12 Khrista khou bammei paan rui khatni kakhou lwmmei paan rui, aniu baucna, rouh tuang maekna Ravguangc daeng khou guang nuh the. 13 Mi zaeng rui, ai nangniw khang ryanra khaengv bammei khou hei nangniw lungh tangkhyn mak khang huay e. Mi hei nangniw hymdaih khang e.
Khrista ramzian
14-15 Mi zaeng rui kandih khou ni, tingkauh thangc ni, kalingmei kaikhunc guay tuang zancphuakh tiiloumeipu, Pu hu khou ai khuksun key e. 16 Gaat tuang nai dat makmei katuang hymdaihmei khou rui, ka Bumaengc paan rui, nangniw khou pumtan tiilouna, nangniw tuang kalungcmei mei ta tei titanc thau khang ai Ravguangc khou ney e. 17 Lwmmei paan rui nangniw lungc khou Khrista lungclou bam khang ai huayney e. Nangniw nzianmei khou kamaan zangc ntip keyna ding ntipna, 18 Khrista ramzian kasaanv, kadiat, kathukh, kakau Ravguangc meic baihmei guay lev nangniw ni thay ngam khang ai huayney e. 19 Ngguay, kasyng thay tangc ngam makmei Khrista ramzian hei thay khang, kumna Ravguangc lwnlung nangniw khou padik sikh sik bam khang e.