2
Theihmei khou rui Ringhmei khou
1 Nangniw tuang twanlyammei khatni paapc guay zaeng rui, nangniw theic bam khwan e. 2 Mi douc tei, nangniw mi mbaanv tuang simei chaeng khou tat bam khwan e; tingpuk khou simei bumaengc guay guangc, Ravguangc lat liammei nunc ta ntaw sinsw bammei bumaengc lat piu bam khwan e. 3 Aniu ni kaniw kumcna meic pumc rui kahawmei kheiliak khou lungc bam khwan e; meic pumc rui khatni lungning rui kahawmei khou tat bam khwan e. Kaniw kumcna aniu ni kalwnlungh khou rui Ravguangc lungpuam keylou nimei nunc swna bammei tuang khwan e.
4 Tiki Ravguangc zauzian thu heidikamv daic e khatni kamei rui aniu ta heidikamv nzian e. 5 Twmei thu, aniw twanlyammei zaeng rui theic bam khou, kamei rui aniu ta Khrista lev tiringcthaulou dat nchamc the. Nangniw ta guloumei hei Ravguangc zauzian paan rui e. 6 Khrista Jisu khou aniu ta kamei lev tiringcthaulou dat nchamcna tingkauh kandic khou tidungc nchamclou the. 7 Mi hei, kamei rui aniu ta nzianmei Khrista Jisu paan rui ndauhloumei sa dat khang thay makmei kazauzian tei guang nimei ganv guay khou ndauh bam khang swlou tuang e. 8 Kalam thu zauzian rui nangniw ta lwmmei paan rui gulou the. Nangniw taanv paan rui hamh e; Ravguangc kaipat de. 9 Mi zaeng rui mi khang hei meic gaanv khat na sini gaengh sw khang maek e. 10 Mi zaeng rui, aniu hei, aniu taanh khang chamdaanvloumei gaymei taanv tei taanh khang Ravguangc rui Khrista Jisu khou kasiamhloumei mei nunc e.
Khrista khou Akhatna Sw the
11 "Gihruamhmei" (mi hei maansei rui kaniw pumc khou taanhmei taanv ta e) twna kawmei Jihudimei nunc rui "gihruamc makmei" twna kawmei Jentailmei swna puancloumei nangniw hei kahu nungc akumhmei mei nunc sw bam khwan cho twmei ningtow o. 12 Mi douc tei nangniw Khrista ta thay makna bam khwan e, Israelmei pang khou kazauh mak bam khwan e, khatni Ravguangc rui latryan swna nrianhloumei tei laa khang nangniw dam maekna mi mbaanv khou rigwnmei ni maek, Ravguangc ta ni thay mak twna bam khwan e. 13 Tiki ntaw thu Khrista Jisu khou guanglou khou rui, ducna bam khwanmei nangniw ta Khrista zei paan rui Ravguangc daeng khou zay guanglou the.
14 Tabui cho tiki, Khrista rui Jihudimei lev Jentailmei ta akhat na tiswlouna aniu khang chuzaenghmei phungc guanglou the. Jihudimei lev Jentailmei kak khou daengc langclou bammei zauczihmei raengc tei kamei theicloumei tei rui sw ra keyna aniu ta akhat na tiswlou the. 15 Kamei rui Riakdanv tei mi khou tei naimei latdanv guay khatni riak guay tei kazauhna swmaan lana, mi zaat kaney ta hei kakhou meic thanh akhat tiswlouna chuzaenghmei phungc guanglou the. 16 Zauczihmei sw bammei ta tei, kamei theihchouc khou theicloumei paan rui swmaanlou the; theihchouc paan rui mi kanei ta hei pumh akhat khou zaykariulouna Ravguangc khou tikariulou the. 17 Kumna Khrista guangna, Ravguangc khou rui ducna bammei Jentailmei khou ni, nnana bammei Jihudimei khou ni chuzaenghmei gaychamv hei dinclou the. 18 Mi zaeng rui, Khrista paan rui Jihudimei ni, Jentailmei ni Bumaengh akhat khou Pu khou guang nuh the.
19 Kum thena, Jentailmei nangniw ni guanghdic baihmei mei nunc hamh the, tasang tasiucmei hamh the; Ravguangc mei nunc lev dilung makaemv di the, Ravguangc kaikhunc khou kaikhunhmei nunc di the. 20 Nangniw hei ni Khrista rui kaikwntauc swna Latdiutatmei nunc khatni muhzwng nunc tuang kaibam khou sw thaumei kai e.a 21 Kai kapwm tei Khrista khou duanc kariulouna, Poubauhmei ta kalumpui kai khang sw thau bam tuang e. 22 Ravguangc Bumaengc lungcloupui kai kasiamh thaumei khou tei, Khrista paan rui nangniw ta ni tikazauhlou the.