Ephisiamei
KHOU Paul RUI HYMEI TATDYN
1
Chaengriw Lat
1 Ravguangc rui ningmei thei layna Khrista Jisu tuang Latdiutatmei swmei Paul khou rui—
Lwmnuhmei swna Khrista Jisu khou bammei Ephesasmeia Ravguangc mei nunc khang hymei:
2 Aniu Pu Ravguangc khatni Poubauhmei Jisu Khrista rui nangniw khang zauzian khatni chuzaenghmei tiilou diu.
Khrista khou Naimei Bumaengh Suaihiam
3 Aniu Poubauhmei Jisu Khrista Pu khatni kaRacguangc ta thuancku kho! Kalam thu kamei rui bumaengh tuang suaihiam guay Khrista khou bammei aniu khang tiilouna aniu ta tingkauh kandic khou suaihiamlou the. 4 Khrista Jisu khou bammei paan rui Ravguangc mei sw khang mbaanv damh mak khou rui kamei rui aniu ta kapahlou the. Mi hei aniu kahu khou nthanmei khatni khuay maekmei sw khang e.
Nzianpui zaeng rui, 5 Khrista paan rui aniu ta kanac nunc tiswlou khang Ravguangc kalungdinglou tangna kapahlou the. Mi hei kamei kahawmei khatni ningmei e. 6 Katy kamanv maekna, nzianmei kanac mpouh paan rui nzianloumei hymdaihmei kazauzian khang hei aniu Ravguangc ta thuancku kho! 7 Kalam thu Khrista zei paan rui aniu ta thuak patlou the, twmei thu, aniu paap kuaklou the. Kazauzian daihmei paan rui, 8 kamei rui hei di daicna aniu khang swlou the! Kamei ramh guayna thayna khatni howna, 9 Ravguangc kamei rui sw ni twna dingloumei raeng tei taanc the, kumna Khrista paan rui tiguang tangclou nimei katuang meic thay mak khwanmei raeng tei aniu khou ndauhlou the. 10 Mi kaganv tangc pwkhou tiguang tangclou nimei raeng kiu thu, tingkauh khatni kandih khou nai bammei ramh katana hei zay guang kariuna, Khrista rui kapy bangc khou lou khang e.
11 Ramh guayna hei Ravguangc raeng khatni kamei rui ningloumei thei layna taanc the. Kumna Ravguangc kamei rui thaurey khou rui dingloumei raeng thei layna Khrista khou aniu kamei sw khang Ravguangc rui aniu ta kapahlou the. 12 Mi zaeng rui Khrista khou rigwnmei nai reymei aniu Ravguangc hym thuanc kho!
13 Nchumhmei lat, guloumei tuang gaychamv tei chu lana Khrista khou lwmmei nangniw khou ni nrianhloumei Bumaengh Nthanmei tei tiilouna, nangniw hei katuang mei the twmei ndauhlou the. 14 Bumaengh tiiloumei hei, Ravguangc rui kamei nunc khang nrianhloumei tei aniu suai makna laa puni the twmei tuang e, khatni mi hei rui Ravguangc rui kamei nunc khang nthuihmei thuakloumei tiilou puni twmei tuang e. Aniu kahym thuanc kho!
Paul tuang Huayneymei
15 Mi zaeng rui, nangniw Poubauhmei khou lwmmei ramlum khatni Ravguangc mei nunc ta nzianmei ramzian lam guay tei chu pwkhou, 16 ai huayneymei khou, nangniw zangv khang taek makna thuancku bam e. 17 Nangniw Ravguangc ta thay mbu khang ningting khatni ndauhloumei tiilou nimei Bumaengc nangniw khou tiilou khang, aniu Poubauhmei Jisu Khrista Racguangc hymdaihmei Pu khou ai huayney bam e. 18 Nangniw tuang lungning laanc patlouna, nangniw ta kawloumei hei tabui ta rigwn bam khang cho, Ravguangc rui kamei nunc khang hymdaihmei lanv chamdaanvlou cho, 19 khatni kakhou lwmmei aniu khou adih daihmei pumtan rui taanv taanc bam cho twmei nangniw thay khang ai huayney bam e. 20 Aniu khou taanv taanclou bammei mi pumtan hei, kamei rui Khrista ta tiringcthaulouna tingkauh kandic khou katuang baanzat thangc tidungclou kanmei khou sinswmei ngammei pumtan tei e. 21 Mi mbaanv khatni guang nimei khou naimei ngamv tuang zancphuakh guay khou daic liangmei zancphuakh phungcna mi khou tei Khrista tingkauh tuang dihsinmei nunc, ngamvsinmei nunc, pumtan naimei nunc, khatni kaipouc nunc ruc khou kaipouc swna sin bam e. 22 Ravguangc rui ramh guayna Khrista ngamv bangc khou lou the khatni ramh guayna ta sinmei Khrista kamei phwamling khou kapy sw khang kakhou tiilou the. 23 Phwamling hei Khrista pumc e, kabamv kathuic khou ramh guayna ti-nthuihlou mei Khristaa ta ti-nthuihlou mei pumc e.