4
1 Ai rui samei kiu thu, kapu tampy laa nimei nac tei kamei alauc bam saanv thu, kapu tampy tei katuang bam khwan sini, bangh kumcna bam tuang di he. 2 Kapu rui saloumei ganv tangh mak saanv, langloumei nunc rui kata ni, katuang lanv ni sin bam tuang e. 3 Mi tei kumcna aniu ni, angana sw bammei douc tei mbaanv tuang puat guay riak bangc khou bam khwan e. 4 Tiki kating tangc pwkhou Ravguangc rui kanac mpouh ta ndiu guang the. Kamei ntumei gaanv khat khou rui puancna Riakdanv bangc khou lungclou khwan the. 5 Mi tei Riakdanv bangc khou bammei aniu ta thuaklouna, aniu Ravguangc nac nunc sw khang e.
6 Nangniw kanac nunc tipui zaeng rui, a Ravguangc rui Kanac Mpouh tuang Bumaengc, Ravguangc ta "Abba, Apu" twna kawmei Bumaengc tei aniu lungc khou ndiu guanglou the. 7 Mi zaeng rui, ntaw thu nangniw bangh hamh the, kanac mpouh di the. Kanac mpouh tipui zaeng rui Ravguangc rui kanac nunc khang tii nimei dam tei nangniw khang ni tii puni the.
Paul Galatiamei khang Kadanmei
8 Tat kanmei ganv khou, nangniw Ravguangc ta thay makmei douc tei, rav hamhmei ta rav swna mi kumhmei nunc bangc sw bam khwan e. 9 Tiki nangniw ntaw thu Ravguangc ta thay the, hamh e thei Ravguangc rui nangniw ta thay the. Akumhna nangniw ramh sw ngam makmei suanmei riak khou tei karih tat dat niina ning pat bam tu cho? Nangniw mi kumhmei nunc bangc sw dat nii di hena cho? 10 Nangniw tingmik, bw, kakwm kaganv khatni tingkwm ta ngaek bam e. 11 Nangniw khang ntinglowmei azaeng guay hei nsa maan nina ny twna ping tuang nai e.
12 Chana thiu, ai rui nangniw khou zaenghuay e: ai nangniw kumhmei swmei kumcna nangniw ni ai kumcna sw o. Nangniw akhou ramh khat na sini nkhuaimei swlou mak e. 13 Nangniw khou gaychamv dinclou reymei tei apumc khou suc numei naipui zaeng rui e twmei nangniw thay e. 14 Atuang sw nu tei nangniw ta nchanvmei tuang sw khwan sini, nangniw ata karaengna, hamh e thei malana ganc pat mak e. Mi phaan tei nangniw rui ata kauh baanchara khat ta kumc, Khrista Jisu ta kumc laalou e. 15 Nangniw ramzian tei tabui sw kan thena cho? Nangniw mik lat patna akhang tii nuh tuang ti thei, nangniw tii kan ni tuang dyng the twna ai sa ngam e. 16 Nzihmei lat samei hei rui ai hei nangniw khang zauczihmei sw thena cho?
17 Kaniw tei nangniw khang mamav hakna karamc bam e; tiki mi tei gay khang hamh e. Kaniw rui kahawmei thu nangniw ta akhou rui sw ntamv patna kaniw biak thangc lungc gut bam dat khang tw tuang e. 18 Ai bam khou na hamhna, kaganv katana khou, gay nimei lam khou thu mi tei kumcna lunghgutna bam e thei gay e. 19 Ai nzianmei alaucthiu, nangniw khou Khrista tuang lwnlung kasiamh thau mak saanv, ai nangniw khang meicpui narui kumcna ryanra bam e. 20 Ai ntaw nangniw daeng khou bam e thei gay ni tuang e; ai nangniw ta mi kumcna sa bam nii mak e. Nangniw khang alung mpeyna ryanra e.
Hagar lev Sara ta Champanhmei
21 Riakdanv bangc khou bam niimei nunc nangniw khou ai rui mi kumcna thanv nii e: Riakdanv rui samei tei nangniw chu mak he nah cho? 22 Mi kumna hylou e: Abraham nac mpouh gaanv nei nai e. Gaanv khat rui banghpui nac e, baihmei gaanv khat tei rui nyngswmeipui nac e. 23 Banghpui rui puanhmei nac tei maansei riak thei layna puanhmei nac e; tiki nyngswmeipui rui puanhmei nac tei thu Ravguangc latryan thei layna puanh tuang e. 24 Mi hei latgiam e: Mi meicpui gaanv nei hei latryan kanei tei e. Kanac nunc ta bangh swna puancloumei pui Hagar hei Sinai Chyng khou swloumei latryan tei e. 25 Arabia tuang Sinai Chyng Hagar b hei ntaw tuang Jerusalem hei e. Kalam thu Jerusalem hei kakhou bammei mei guay lev bangh sw bam e. 26 Tiki tingkauh Jerusalem hei thu nyngswmei e. Kamei hei aniu pui e. 27 Kalam thu nthanmei latrik khou mi kumcna hylou e:
"Nakamcpeic, nang neihla o!
Naruimei ariw zat makmeipui,
nang neihlana kauc o!
Kalam thu ganc nruloumeipui rui
kagaanv rui mpatlou makmeipui suangc
kanac geic puni the."
28 Chana thiu, aniu hei thu Isaak kumcna kalatryan thei layna puanhmei nac nunc e. 29 Mi maansei riak thei layna puanhmei nac hei rui Bumaengh paan rui puanhmei nac ta tei swkasic khang sw kanmei kumcna, ntaw ni sw bam muai e. 30 Tiki nthanmei latrik rui akumhna sa bu cho? "Banghpui ta tei kanac tei lev alay ganc o. Kalam thu banghpui nac tei nyngswmeipui nac tei rui kapu tuang tampy laa nimei dam tei lay laa nuh mak e," twna sa e. 31 Mi zaeng rui, chana thiu, aniu thu banghpui nac nunc hamh e; nyngswmeipui nac nunc de.