3
Riakdanv lev Lwmmei
1 He mpangmei Galatiamei thiu! Nangniw lungc thow rui sw chamamv thena cho? Khrista ta chouhthaengc kanmei tei nangniw khou nthanna lyanlou kan the. 2 Nangniw Ravguangc Bumaengc laatowmei tei Riakdanv piupui paan rui ny, gaychamv tei chuna lwmmei paan rui cho, ai thay nii e. 3 Nangniw adih mpang bam tu cho! Nangniw Bumaengh paan rui kahouh lana ntaw thu nangniw rana pumtan rui luailou dat nii the twna cho? 4 Nangniw laatow kanmei guay tei nsa di the nah cho? Kiuc hamh e! 5 Nangniw khou Ravguangc rui katuang Bumaengc tiilouna nangniw pang khou charynmei taanv mpeyna taancloumei tei nangniw Riakdanv piupui paan rui ny, gaychamv hei chuna lwmmei paan rui cho?
6 Abraham ta tei kakhanh o: "Kamei Ravguangc khou lwm the, kum tina kata ravchaptatmei twna chaklou the," twna nthanmei latrik rui sa e. 7 Mi zaeng rui, Abraham kikta nunc ling kiu thu lwmmei nunc tei e twmei nangniw thay nina e. 8 Ravguangc rui Jentailmei nunc ta lwmmei paan rui ravchaptatmei tiswlou puni twmei how rey lana, "Nang paan rui Jentailmei nunc ta suaihiamlou puni," twmei hei Abraham khou gaychamv dinc kasuakcloumei nthanmei latrik khou salou the. 9 Abraham tei lwm the, kumna kakhou suaihiamlou the. Kumna lwmmei guay khou ni Abraham khou tiiloumei suaihiam tei tiilou the.
10 Riakdanv ngaekmei khou ngangvlou bammei guay tei thu syang bangc khou bam e. Kalam thu "Riakdanv khou hyloumei guayna tei piu tanh tan bam makpui mei ruc khou tei syang nai e!" twna nthanmei latrik rui sa e. 11 Riakdanv piumei paan rui gaanv khat na ta sini ravchaptatmei tiswlou mak e twmei nthan the. Kalam thu, "Lwmmei paan rui ravchaptatmei swpui mei tei ringc puni,"a twna nthanmei latrik khou hylouna nai e. 12 Tiki Riakdanv hei thu lwmmei tuang hamh e, kalam thu "Mi guay hei piupui mei tei ringc puni," twna sa e.
13 "Thing khou thaengcloupui mei tei syang phunghpui mei e," twna samei kumcna, Khrista rui aniu syang phungclouna, Riakdanv tuang syang khou rui kamei rui aniu ta thuaklou the. 14 Mi hei, Abraham khou tiiloumei suaihiam tei Khrista Jisu paan rui Jentailmei nunc ni laa nuh khang kamei rui taancloumei taanv e—nrianhloumei Bumaengc tei lwmmei paan rui laa khang e.
Riakdanv khatni Latryan
15 Chana thiu, meic tatpui riak tei champancna sa puni: meic gaanv nei rui ramh lam khat khou chwn chamcna latryan swlou kan e thei, mi tei gaanv khat na rui sini swbak dat nuh mak khe; hap ni hap dat nuh mak khe. 16 Mi latryan hei Abraham khatni kakikta khou swlou tuang e. "Nang kikta guay" twna, meic mpeyna ta sa mak e; "nang kikta" twna gaanv khat na ta sa tuang de. Mi kiu Khrista ta sa tuang e. 17 Ai rui sa bammei kiu thu mi hei e: Tingkwm phay padeih tamruc tangv rui tii guang datmei Riakdanv tei rui Ravguangc rui Abraham khou swlou kanmei latryan ta tei swbakna nsa titaanh mak e.
18 Ravguangc kaipat hei Riakdanv piupui paan rui laa ni tuang khwan e thei, latryan tei thu nsa di the. Tiki Ravguangc rui Abraham khou tiilou kanmei tei thu latryan thei layna tiilou kanmei tuang de.
19 Kum e thei Riakdanv hei thu tabui khang cho? Mi hei haplou datmei thu twanlyammei kiu tabui tei cho twmei lyan khang e. Mi hei kakhou latryan swloumei Abraham kikta kiu guang mak saanv na khang de. Riakdanv hei kauh baanchara nunc rui chakaktatmei gaanv khat khou tii guang tuang e. 20 Tiki gaanv khat na rui taanhmei taanv khou tei thu chakaktatmei kage maek e; Ravguangc karana de.b
Riakdanv tuang Taanv
21 Kum e thei, Riakdanv hei Ravguangc latryan guay ta nuh makmei cho? Kiuc hamh e! Kalam thu ringhmei tiilou nuhmei Riakdanv tiilou bam khwan e thei, mi tei piuna ravchaptatmei sw bam kan ni tuang e. 22 Tiki mbaanv kapwm hei paapc pumtan bangc khou bam e twna Nthanmei Latrik rui sa e. Mi zaeng rui, Jisu Khrista khou lwmmei guay khang tiilou nimei nrianhloumei kaipat hei lwmmei guay khang tiilou khang e. 23 Mi lwmmei paan rui ravchaptatmei tiswloumei tuang hei guang makmei hu khou, Riakdanv hei rui aniu ta kangmei nunc ta kumcna, mi lwmmei tuang hei ndauh pat mak saanv bangclou bam tuang e. 24 Kumna lwmmei paan rui aniu ta ravchaptatmei tiswlou khang, Khrista guang mak saanv, Riakdanv hei rui aniu ta nachaicpeic kumcna makav bam tuang e. 25 Ntaw thu lwmmei tuang hei guang thena, aniu Riakdanv rui makav bammei bangc khou bam dat mak khe.
26 Lwmmei paan rui Khrista Jisu khou nangniw guayna Ravguangc nac nunc di the. 27 Kalam thu Khrista khou duiluplou kanmei nangniw guayna hei Khrista rui pheybaan kumcna duam liamlou the. 28 Mi zaeng rui, Jihudimei khatni Grikmei, bangh khatni nyngswmei, nggaanvmei khatni ntumei twmei nai dat mak khe; Khrista khou bammei nangniw guay akhat na di the.
29 Nangniw Khrista tuang e thei, nangniw Abraham nac nunc the, kumna Ravguangc rui nrianhloumei tei laa nimei nunc the.