2
Paul khatni Baihmei Latdiutatmei nunc
1 Tingkwm ruhna padeih tangv, Barnabas lev Tita ta nduanghna ai Jerusalem thangc ngangh khwan e. 2 Mi tei Ravguangc rui tat o twna akhou ndauhloupui thei layna tat tuang e. Kumna ai rui taanclou kanmei khatni taanc bammei guay hei nsa taan pw ramc e twna, ai rui Jentailmei pang khou dinc tat bammei gaychamv kiu mi hei e twmei, kapy nunc ta ariwna raclou the. 3 Ai nduangh tat bammei Tita kamei hei Grikmei bam khwan sini, kamei gihruamc nina e twna sa mak e; 4 tiki meic gaanv saekc rui thu gihruamh khang kahaw the. Mi nunc hei kaniw rui aniw ta bangc tiswlou khang, aniw rui Khrista khou nyngswmei ta tei gwanrum khang lwmmei khe swmei, aniw pang khou tiap gutloumei nunc e. 5 Tiki nchumhmei gaychamv hei nangniw khang nai bam khang, aniw kaniw kut matak khat na sini gutlou kan mak e.
6 Tiki kapy nunc the tw bammei nunc tei—kaniw tabui kumhpui mei ni bam kan diu; mi tei rui akhang ramh khat sini hamh e. Ravguangc thu zawkhu zawru zauh mak e; mi kapy nunc khou tei rui akhang ramh khat sini dinc kasuanlou tuang maek e. 7 Tiki gihruamhmei nunc khou gaychamv dinh khang Pitar khou tiiloumei kumcna, gihruamh makmei nunc khou gaychamv dinh khang akhou tiilou the twmei thu kaniw how kan the. 8 Kalam thu Pitar khou gihruamhmei nunc khang Latdiutatmei swna taanv taancloumeipu rui akhou Jentailmei nunc khang Latdiutatmei swna taanv taanclou the. 9 Kapy nunc swna bammei Jakob, Kephas khatni John kaniw rui ni Ravguangc zauzian rui mi taanv hei akhou tiilou the twmei thaylouna Barnabas aney ta kaniw tuang baanzat baanc sin kariulouna laalou the. Kumna Barnabas aney Jentailmei nunc khou tat khang khatni kaniw gihruamhmei nunc khou tat khang aniw nuhlou the. 10 Kaniw rui aney khou samei kiu thu lungcsimei nunc khang tei thu ningtowlou bam o twmei hei e. Mi tei thu ai rui taanclou nii chuyna bammei tuang e.
Antiokh khou Paul rui Pitar ta Luhmei
11 Tiki Kephas Antiokh khou guang khou ai zaw puanc adyangna kata luh the. Kalam thu kamei baekh baekna nkhuai e. 12 Jakob rui ndiuloumei nunc mi khou tei guang mak khou thu, kamei Jentailmei nunc lev tu nchamc zangv nchamc bam tuang e. Tiki mi nunc tei guangmei tangv thu, Jentailmei ta ni gihruamc nina de twna samei nunc ta ping lapui zaeng rui, kamei Jentailmei nunc lev tu zangv nchamc dat mak khe. 13 Kathei layna Jihudimei gaanv saekc ni mi kakheswmei khou tei kazauh kan the. Kumna kaniw kakheswmei khou tei Barnabas ta ni zay mbiangh tat kan the. 14 Gaychamv nchumhmei khou kaniw tat ntwnna tat mak khe twmei ai how pwkhou, meic guayna hu khou ai rui Kephas khou, "Nang Jihudimei e, tiki Jentailmei nunc kumcna lungc kan the, Jihudimei kumcna lungh mak khe. Kum e thei akumhna nang Jentailmei ta Jihudimei kumcna lungc o twna sa nina cho?" twna sa the.
Jihudimei ta ni Jentailmei ta ni Lwmmei Paan rui Gulou Puni
15 Aniw hei pui bungpuak khou rui Jihudimei e, "Paapcmei" twmei Jentailmei nunc tei hamh e. 16 Tiki aniu ta ravchaptatmei tiswloumei hei Riakdanv ngaekmei paan rui hamh e; Jisu Khrista khou lwmmei paan rui de twmei aniu thay e. Mi zaeng rui, Riakdanv ngaekmei paan rui hamhna, Khrista khou lwmmei paan rui ravchaptatmei tiswlou khang, aniu ni Khrista Jisu khou lwm the. Kalam thu Riakdanv ngaekmei paan rui gaanv khat na sini ravchaptatmei sw ngam mak e. 17 Aniu ravchaptatmei sw khang Khrista khou ngangvlou tiki, aniu ni Jentailmei nunc kumcna paapcmei sw the. Kum e thei Khrista hei paapc tuang taanvruaimei cho? Kiuc hamh e! 18 Ai rui ra key kanmei tei ai rui kasiamh thau dat e thei, ai hei Riakdanv swbakmei e twmei arana rui dinc e. 19 Kalam thu Riakdanv biak thangc thu, ai theic the; mi Riakdanv tei rui ata swluai the. Mi hei ai Ravguangc khang ringc khang e. Khrista theihchouc khou theiclou khou tei ai ni lay theic kazauh the. 20 Kumna ai thu theic the; tiki Khrista akhou ringc bam e. Ntaw ai mi pumc khou ringc bammei hei ata nzianpui zaeng rui kata akhang tii patloumei Ravguangc Nac Mpouh khou lwmmei paan rui ringc bam tuang e. 21 Ai Ravguangc zauzian ta nsa swmaan mak e. Riakdanv paan rui ravchaptatmei sw nuh e thei, Khrista theicloumei hei nsa di the.