Galatimei
KHOU Paul RUI HYMEI TATDYN
1
Chaengriw Lat
1 Meic nunc rui ni hamh, meicnunc khou rui ni hamh, tiki Jisu Khrista khatni kata tiringcthaulou datmeipu Ravguangc kahak rui Latdiutatmei swna ndiuloumei Paul, 2 khatni ai lev bam nchamcmei chana guay khou rui Galatia phwamling guay khang hymei: 3-4 Mi mbaanv tuang simei khou rui aniu ta gulou khang, aniu Pu Ravguangc rui ningmei piulouna aniu paap khang karana kata tii patloumeipu Poubauhmei Jisu Khrista khatni aniu Pu Ravguangc rui zauzian khatni chuzaenghmei nangniw khou tiilou diu. 5 Tingsaengzaeng aniu Pu Ravguangc hymdaic diu. Amen.
Kaney Makmei Gaychamv
6 Khrista zauziana paan rui nangniw ta kawloumeipu ta nangniw guayna asaanh makmei dak na khou rui mpatlouna baihmei gaychamv laalou dat bammei khang tei ai ngak e. 7 Kaling thu, gaychamv baihmei maek e; tiki Khrista tuang gaychamv tei sw mbianghna nangniw ta sw kaguakc khang sw bammei nunc naipui zaeng rui sa tuang e. 8 Aniw rui pwni, kauh baanchara tingkauh thangc rui keyna pwni, aniw rui nangniw khou dinclou kanmei gaychamv tei hamhna baihmei dinc e thei, karuc khou syang keylou kan diu! 9 Aniw rui sa kanmei tei ai ntaw sa kaluaih dat e: nangniw laalou kanmei gaychamv tei hamhna baihmei nangniw khou dinhpui mei khou tei syang keylou kan diu!
10 Ai rui sa bammei hei maansei rui lwanlou pw khang sa bam tu cho? Kiuc hamh e! Ai rui kahawmei thu Ravguangc rui lwanloumei ta de! Meic nunc rui lwanlou pw khang sw bam tu cho? Ai mi khang tei sw bam tuang e thei, ai Khrista bangc sw bam ngam khang hamh e.
Paul Akumhna Latdiutatmei Sw Tu Cho
11 Chana thiu, ai rui nangniw khou dinclou kanmei gaychamv tei maansei khou rui hamh e twmei nangniw khou tithaylou nii e. 12 Mi hei ai meic gaanv khat na khou rui sini laa mak e, meic gaanv khat na rui sini akhou nchamlou mak e. Mi tei Jisu Khrista kamei kahak rui akhou dinclou tuang e.
13 Ai Jihudimei ravchap khou bammei douc kheiliak, ai akumhna Ravguangc tuang phwamling ta raina, mi ta hei swmaan khang karamc kanmei tei nangniw chu e. 14 Ai Jihudimei ravchap khou akinmei guay pang khou rui lunghsuc diangc bam khwan e, khatni pupouh riak khou lunghgut diangc bam khwan e.
15 Tiki Ravguangc rui ata apui nacbamv khou rui kazauzian rui kapahlouna kawlou the. 16 Jentailmei pang khou Khrista tuang gaychamv dinh khang kamei rui kanac mpouh ta akhou ndauhlou pwkhou, ai meic gaanv khat na daeng khou sini tatna kaphianh mak e; 17 Jerusalem thangc asuangc Latdiutatmei sw bam reymei nunc ta ni ariw tat mak e. Ai Arabia ramv thangc tatna, Damaskas khou guang dat the. 18 Mi tangv, tingkwm kathumh tangv, Kephas ta ariw khang Jerusalem thangc nganghna kadaeng khou zaeng ruhna panguh bamlou e. 19 Poubauhmei chana Jakob ta na hamhna Latdiutatmei baihmei nunc ta ai ariw mak e.b
20 Ntaw ai nangniw khang hy bammei hei Ravguangc mav khou hy bam tuang e; ai saraemh mak e!
21 Mi tangv ai Suria khatni Kilikia ramv thangc tat khwan e. 22 Mi ganv khou tei Judia tuang phwamling guay tuang mei nunc ata zawthay mak khwan e. 23 Kaniw rui ata thaymei kiu, "Aniu ta raikasic bammeipu tei, ntaw thu kamei rui swmaan ni twna sw bammei Khrista khou lwmmei lam tei kamei dinc bam dat the," twna meicnunc rui sa bammei ta na khwan e. 24 Kumna kaniw azaeng rui Ravguangc ta thuanc bam khwan e.