5
Nyngswmei tei Swmaan Rio
1 Nyngsw khang Khrista rui aniu ta tiduaklou the! Mi zaeng rui ding ntip o: bangh puat tei phungc dat ri tho. 2 Nking o! Paul, ai rui sa e: nangniw ta gihruamc khang nuhlou e thei, nangniw khang Khrista hei nsa di the. 3 Gihruamc kanmei nunc khou tei ai rui sa dat e, twmei thu—nangniw Riakdanv kapwm tei ngaek nina e. 4 Riakdanv ngaekmei paan rui ravchaptatmei sw khang karamhmei nangniw tei, nangniw rana nangniw ta Khrista khou rui sw ntamv the. Nangniw Ravguangc zauzian khou rui tat pat the. 5 Aniu rui lwmgaymei thu, Ravguangc rui aniu ta ravchaptatmei tiswlou puni twmei hei e; aniu ramlum khou tei Ravguangc Bumaengc rui taanv swlouna aniu nkhwan bammei kiu mi hei e. 6 Kalam thu Khrista khou thu gihruamhmei, gihruamh makmei rui ramh khat sini hamh e; nthukmei thu nzianmei paan rui taanv swloumei lwmmei hei de.
7 Nangniw pak chuyna pak bam kan tuang de! Nchumhmei khou tat mak khang nangniw ta thow rui akumhna sw kaguakclou thena cho? 8 Mi hei nangniw ta kawloumei Racguangc rui thu hamh the. 9 Katitna suai khou rui kapwmna ta swkasic tuang e. 10 Nangniw baihmei biak thangc tei mbiangh tat pw lak e twmei Poubauhmei khou nangniw ta lwmgaymei nai de. Thow pwni nangniw ta sw kaguakcloupui mei khou tei Ravguangc latzan keylou puni.
11 Alam khou thu, chana thiu, gihruamc khang ai rui dinc tat bam ti thei, tabui swna ata swkasic khang sw bam nina cho? Ai rui mi kumna dinc bam changh ti thei, ai Khrista tuang theihchouc chamv dinhmei khou hei khamvmei nai bam lak ni tuang de. 12 Nangniw ta mi kumna sw kaguakc bammei nunc kiu kaniw pumc siam laa ni tuang e.
13 Chana thiu, nangniw ta thu nyngsw khang kawlou tuang di the. Tiki mi nyngswmei hei nangniw pumc rui kahawmei taanh khang kadouchamei swna thu sinsw rio. Mi phaan tei nzianmei rui nangniw khat khat siamruai sw o. 14 "Nang tuang kaining kaigeimei ta nang ta kumcna nzian nina e," twmei khou hei Riakdanv kapwm nai the. 15 Nangniw khat khat ta akayna swmaan khang sw kary bam e thei, nangniw maan ngam lamc e.
Bumaengh khatni Maansei Lwnlung
16 Ai rui nangniw khou samei kiu mi hei e: Bumaengh paan rui tat o, kumc e thei meic pumc rui kahawmei khou tei tat mak puni. 17 Kalam thu meic pumc rui kahawmei tei Bumaengh rui kahaw makmei e; Bumaengh rui kahawmei tei meic pumc rui kahaw makmei e. Mi kanei hei khat khat ta nuh mak e. Mi kabac kiu thu, nang rui kahawmei tei nang taanc nuh mak e. 18 Bumaengh rui nangniw ta zaylou e thei, nangniw Riakdanv bangc khou bam mak khe.
19 Meic pumc tuang taanv kapaengc khou how patmei kiu thu mi hei e: lungcmaanv lungcmowmei, mphuammei, nthah boulahmei, 20 ravmaengc kalummei, duaih sinmei, karaengmei, agaymei, howtimei, lunghpuamhmei, kakhang na ningmei, lunghchamc makmei, kalangv patmei, 21 howtimei, zouh mbamei, kasau kabaumei khatni mi kumhmei guay hei e. Kahunungc sa kanmei tei kumcna ntaw ni nangniw khou sa tuang e: mi kumna lungc bammei nunc tei Ravguangc Guangcdic khou gut ni tu hamh e.
22 Tiki Bumaengh tuang thay thu: nzianmei, neihlamei, chuzaenghmei, khaengvthaymei, nzianthaymei, gaymei, lwmnuhmei, 23 lungc niamhmei, khatni kapumc sinriapmei hei e. Mi kumhmei ta hei nuh makmei Riakdanv maek e. 24 Khrista Jisu tuang sw kanmei guay tei thu meic pumc tuang swmei tei, meic pumc rui kahawmei tei kazauhna chouhthaengc kan the. 25 Bumaengh hei rui aniu khou ringhmei tiiloupui thei layna, aniu Bumaengh rui zayloupui thei layna tat di kho. 26 Aniu daihriw sw ri kho; khat khat lungpuam ntanv ri kho; khat khat ta howti ri kho.