11
Paul khatni Guatmei Latdiutatmei nunc
1 Ai mpangmei kumcna sa pw sini nangniw khaengvlou pungh e twna ning e. 2 Ai nangniw ruc khou Ravguangc tuang kadanmei nai e. Kalam thu ai nangniw ta Khrista khang nthanmei tuna ta kumcna tiilou khang karamc bam tuang e. 3 Ai pingmei kiu thu, Evi ta karouc simei nrui tei rui guat kanmei tei kumcna, nangniw lungc nthanna Khrista ta na nzianna bam nimei khou tei rui nangniw lungning tei zay mbiangh pw ramc e twna e. 4 Kalam thu aniw rui dincloumei Jisu tei hamhmei Jisu lam khou dinhmei nunc guang tini nangniw neihlana nuhlou e. Aniw khou rui laaloumei Bumaengc khatni gaychamv tei hamhmei bumaengc khatni gaychamv phungc guang tini nuhlou e!
5 Nangniw rui Latdiutatmei daihmei nunc the twna sa bammei nunc khang tei suangc ai keymei e twna khat sini ning mak e. 6 Ai lat samei khou sa thay mak bam sini, thaymei khou thu thay makmei hamh e. Mi hei kalam katana khou meic guayna khou aniw lyanlou kan the.
7 Ai nangniw khou Ravguangc tuang gaychamv dincloumei khang tei kaphy kadam khat sini laa kan mak e. Nangniw ta tidaiclou khang ai nthyam key the. Mi tei akhang paapc bu cho? 8 Ai nangniw pang khou taanc bam khou tei phwamling baihmei nunc rui ata makuatlou the. Mi tei nangniw ta nkhav khang kaniw tuang asut bam kumh tuang the. 9 Ai nangniw daeng khou bammei ganv khou tei akhang syan dui kage naipui ganv khou, nangniw ta sw katuakc kan mak e; Makedonia thangc rui guangmei chana nunc rui akhang kage naimei guay phungc guang e. Tat kanmei ganv khou kumcna, guang nimei ganv khou ni ai nangniw khou apuatrith tiilou ni tu hamh e. 10 Khrista tuang nchumhmei tei akhou naina samei tuang e: ai mi hei kumcna gaenghswna samei hei Akhaia khou meic gaanv khat na rui sini kiuc hamh e twna sa dat ngam pu lak khe. 11 Mi hei ai nangniw ta nzian makpui zaeng rui cho? Ai nangniw ta nzian e twmei Ravguangc rui thay e.
12 Baihmei "Latdiutatmei nunc" ta tei, aniw rui sw bammei kumcna kaniw ni sw bam de, twna kaniw gaengh swna sa bammei tei tisa mak khang aniw ntaw sw bammei hei kumcna sw bam muai puni. 13 Mi kumhmei mei nunc tei Latdiutatmei ling hamh e—kaniw hei ravtaanv taanhmei khe swmei, Khrista tuang Latdiutatmei khe swmei meic guatmei Latdiutatmei nunc e. 14 Mi khou hei ngak khang maek e. Seitan nganv gaanhmei kauh baanchara khe sw ngam de. 15 Kumna kabangc nunc rui thu ravchaptatmei bangc nunc khe swmei hei kadath datpui tuang hamh e. Nkhamh khou thu kaniw taanv thai kaniw laa puni.
Paul Latdiutatmei Akhat Swna Ryanra Khaengvmei
16 Ai sa kanmei tei kumcna, ai hei mpangmei e twna meic gaanv khat na sini ning mak kan diu. Tiki nangniw mi kumcna ning e thei, ai gaengh sw khath tw nuh khang ata mpangmei lana e twna laalou o. 17 Ai rui ntaw lwmgayna samei hei Poubauhmei rui ata tisa niipui lat hamh e; mi kumcna arana ata sathuancna bammei hei ai hei kachangcna mpangmei kumcna sa tuang e. 18 Meic mpeyna rui mbaanv tuang khang gaengh sw bammei kumcna, ai ni sw puni. 19 Nangniw thu ningtyng lapui zaeng rui mpangmei nunc ta neihlana khaengvlou e. 20 Nangniw ta bangh tiswlou tini, nangniw ta nym tu bam tini, nangniw ta sintu bam tini, nangniw ta mala bam tini, nangniw ta kaphi bam tini nzuhlou dyng the. 21 Zakna zakna sa tuang e: aniw thu mi tei kumcna sw ngam mak dyng e. Tiki thow kumhmei rui gaengh sw bammei lam khou tei thu, mpangmei kumcna sa tuang e: ai ni gaengh sw ngam de. 22 Kaniw Ibrimei cho? Ai ni e. Kaniw Israelmei cho? Ai ni e. Kaniw Abraham kik cho? Ai ni e. 23 Kaniw Khrista siamruaimei cho? Ai mpangmei kumcna sa tuang e: kaniw khang suangc ai mbumei de; kaniw khang suangc ai taanc ranv de; kaniw khang suangc ai kangkai gut geic de; kaniw khang suangc ai baimei zam suc geic de, theihpui tadiucmei bamv kaniw suangc ariw geic de. 24 Jihudimei rui bai luan tamrucna chakiumei luan panguh ai ariw the; 25 Rommei rui ata bai luan kathumh e; ata ntauh kwam luan guay the. Rungh kalaimei aniw luan thumh the, kumna duipui khou zingbangc akhat kalaanv akhat bamlou guay the. 26 Ai nggin geicna tat bammei chaenglwan khou, duidai khou, kwamtumei nunc baanc khou, Jihudimei nunc baanc khou khatni Jentailmei nunc baanc khou theic duak theic duaklou the; kaidai khou, ramvpuk khou, duipui khou, saraemhmei chana nunc baanc khou theic duak theic duaklou the. 27 Lakna taanc the; zip makmei ganv mpeyna ariw the; ndaepc tarimei ariw the; tu khang ni, bamloupui bamv ni, pheybaan ni maekpui ganv mpeyna ariw the. 28 Mi guay ruc khou rui phwamling guay khang kadanmei rui atuang puatcrith sw bam e. 29 Thowkumhmei suan key pwkhou ai ni swan key e; thowkumhmei ta tiphaysuy pwkhou, ai lunghkabiu e.
30 Ai gaengh sw ni tw e thei, aram swan lyanmei bamv khou tei ai gaengh sw puni. 31 Tingsaengzaeng kazanc thuanc bam nimeipu, Poubauhmei Jisu Pu Ravguangc rui ai saraemh mak e twmei thay e. 32 Ai Damaskas khou bam khou, Guangh Aretas bangc khou guanghkhyn rui kaidai tuang raengckat guay tei tirigaanvna ata nym khang sw khwan e. 33 Tiki ata giupaekc khou louna, kaidai raengc tuang kailat akhat khou rui mpat keyna ai kabaanc khou rui duak the.