10
Paul rui Kalam khou Samei
1 Zaw lev zaw puanc adyang e thei mbuaih e; bam mpaan e thei bauc e twna nangniw rui samei Paul ai rui Khrista tuang lunghzaenghmei khatni niamhmei kazauhna nangniw khou huaycha e: 2 Ai nangniw khou guang pwkhou ata lat tanhmei tisa mak khang sw o. Kalam thu aniw mbaanv chwn phungcna sw bam tuang de twna samei nunc khou tei lat tanhmei sa puni. 3 Aniw mi mbaanv khou lungc bam e; tiki aniw mbaanv chwn khou rui adow bam tu hamh e. 4 Aniw tuang buy baeng hei maansei tuang hamh e; tanhmei raengc guay sw ra ngammei Ravguangc pumtan e. 5 Adangvna agi bammei guay ta tei ngamlou the. Ravguangc ningting ta akhangvna sw khamv namvmei guay ta tei swbak gut the, kumna lungning guay ta tei nym lana Khrista lat tipiulou the. 6 Kumna nangniw lat piu nthuih pwkhou lat piu makmei nunc ta riap khang chamdaanv bam the.
7 Nangniw thu kapaengc lwn tei zauc e. Thow pwni kamei Khrista mei e twna laaloumei nai e thei, kamei Khrista mei swmei tei kumcna aniw ni Khrista mei e twmei kamei ning nina e. 8 Nangniw ta sw ra key khang hamhna kasiamh thau khang, Poubauhmei rui aniw khou tiiloumei ngamv lam khou gaengh sw ranv maihna salou khwan sini, ai zak mak e. 9 Atuang tatdyn guay tei rui ai nangniw ta tiping khang sw bam tu kumcna laaloumei ta ai laa nii mak e. 10 "Paul hei katuang tatdyn guay thu nrit e khatni tanc e; tiki kamei aniu lev bam nchamcna sa e thei kalat mbuaih e, ramh khat sini hamh e," twna gaanv saekc rui sa e. 11 Aniw pumc bam makna tatdyn swna hymei lev aniw pumc kazauhna taanhmei lev tabui baihmei tuang naina cho twmei kaniw thay puni.
12 Kaniw rana kaniw ta sa kauhna bammei nunc tei lev aniw ta sa kida bam bauh mak e. Kaniw mi hei kumcna khat lev khat ta kidana nthyammei, daihmei ndat bammei hei mpangmei taanv e. 13 Aniw khang thu gaengh swlou nuhmei kanganv akhat nai e; Ravguangc rui aniw taanh khang tiiloumei lungc khou na tei de, mi lungc khou hei aniw rui nangniw khou taanclou kanmei taanv guay tei ni kazauh the. 14 Nangniw hei aniw khang tiiloumei lungc khou kazauhpui zaeng rui, aniw rui nangniw khou Khrista tuang gaychamv phungc guang reymei swna guangmei hei taanc twanpui tuang hamh e.
15 Aniw khang Ravguangc rui tiiloumei paengc twan patna meic baihmei rui taancloumei taanv khou tei aniw gaengh sw bam tu hamh e. Tiki aniw rui lwmgaymei thu nangniw lwmmei khou daicthauna nangniw pang khou aniw tuang laupuk hei daic hay hay pat pungh e twmei hei e. 16 Kum pwkhou, nangniw khou na hamhna kandih baih baih thangc ni gaychamv hei dinc tatna meickai laupuk khou taanclou tangmei taanv khang tei rui gaengh sw bam mak khang e.