9
Jihudimei Khristian nunc ta Nkhavloumei Lam
1 Judia khou bammei nthanmei nunc khang nkhavloumei lam khou ai hy dat bam khang kage nai rap mak khe. 2 Nangniw kaniw ta nkhavlou nii bam e twmei ai thay e, kumna mi lam khou ai rui Makedoniamei nunc khou agaengh swna, "Akhaiamei nunc thu nkhavlou khang ntheikwm tei rui chamdaanv bam kan the," twna salou kan the. Nangniw rui mi kumcna swlou nii bammei tei rui kaniw meic mpeyna ta katiu thaulou kan e. 3 Mi kumcna aniw rui gaengh swna salou kanmei tei nsa taan mak khang mi chana nunc ta hei ndiulou tuang the. Tiki, ai sa kanmei tei kumcna nangniw chamdaanvlou bam pungh di the. 4 Tiki Makedoniamei nunc athei lay guang pwkhou, nangniw chamdaanvlou bam mak khwan e thei, nangniw ta hei di lwmgayna salou lana, aniw ni nangniw ni zak pungh the. 5 Mi zaeng rui, ai guang mak khou kaniw tat hu lana nangniw rui tii ni twna saloumei kaipat tei chamdaanvlou khang mi chana nunc ta hei katiulou khang kage nai the twmei ai ning the. Kumna ai guang pwkhou nangniw chamdaanvlou bam e thei, mi tei tii mak nuh makna tii tuang hamhna, tii niina tii tuang e twmei thay puni the. 6 Lingclou raumei nunc tei tay guang rau puni, lingclou geihmei nunc tei tay guang geic puni twmei hei ningtowlou o. 7 Meic katana kamei kamei rui dingloumei thei layna tii kan diu. Nzavna tii mak nuh mak khe twna tii rio; kalam thu neihlana tiipui mei ta tei Ravguangc nzian e. 8 Ravguangc thu nangniw khang kage naimei guay tei nai tanh tanmei ruc khou rui gaymei taanv khou sinsw bam khang mphamh mphahna tiilou ngam e. 9 "Kamei rui lungcsimei khang pariuhna tiilou e; kazauzian thu tingsaengzaeng e," twna hylouna nai e. 10 Lautaanhmei nunc khang kathw tiilouna tu zangv khang tiiloumeipu rui, nangniw khang kage naimei phwn guay tiilou puni, kumna nangniw baanh daihmei thai kathai geicna tiilou puni. 11 Nangniw baanc daicna tii pat tanh tan bam khang kamei rui nangniw ta tilungcgaylou puni, kumna nangniw tuang kaipat aniw rui laatowmei nunc tei rui Ravguangc ta thuancku bam khang e.
12 Mi kumcna nangniw rui taancloumei hei rui Ravguangc mei nunc khang, kaniw khang kage naimei tiiloumei na hamhna, Ravguangc ta thuanckumei ni ti-mbu thau e. 13 Nangniw rui mi hei kumcna taancloumei paan rui, nangniw rui laaloumei Khrista tuang gaychamv tei nangniw piu chuyna bammei khang tei khatni nangniw lungning daicna kaniw khang khatni baih baihmei khang tii pat bammei khang tei meicnunc rui Ravguangc hym thuanc puni. 14 Mi kumcna Ravguangc tuang nkun mbumei zauzian nangniw khou tiiloumei paan rui nangniw ta ningna kaniw rui nangniw khang huayneylou puni. 15 Mi sa dat khang thay lakmei katuang zauzian khang hei Ravguangc ta thuancku kho!