8
Khristian Ramtii
1 Chana thiu, Makedoniamei tuang phwamling guay khou Ravguangc rui tiilou bammei zauzian tei nangniw ni thaymei ta laa nii e. 2 Kaniw khou nchanvmei ranv sihna guangna kaniw ryanramei mpeyna ariw kan e; tiki kaniw khou neihlamei heidikamv daicna nai e; twmei kaniw kanganv tangcna lungcsi khwan sini tii patmei khou thu kaniw baanc daic e. 3 Ai mi hei nthanna sa ngam e twmei thu, kaniw ngammei kasang tiimei na hamhna kaniw tii ngammei suangc sini mbuna tii e. Kaniw tii niina, 4 Judia khou bammei Ravguangc mei nunc khang nkhavloumei khou kadouchamei kaniw ni lay laa nii e twna kaniw rui aniw khou sa tuang de. 5 Mi hei aniw ningmei paengc thangc de! Kaniw hei reymei khou kaniw ta Ravguangc khou tiilou the; mi tangv Ravguangc rui ningmei thei layna kaniw ta aniw khou ni tiilou the. 6 Kumna mi taanv hei kahouhloumei Tita ta mi nkunna nzianmei taanv hei nangniw ta taanv nkhav suaklou khang aniw rui katiulou kan the. 7 Ramh lam guayna khou: lwmmei khou, latsav khou, thaymei khou, lunghgutmei khou khatni aniw ta nzianmei khou a nangniw mbu de. Mi tei kumcna mi nzianmei taanv khou hei ni nangniw lungc daiclou o.
8 Ai nangniw khou latdanv swna sa tu hamh e. Tiki meic baihmei nunc ni mi kumcna nkhavlou niina bam e twmei lyanlouna, nangniw tuang kalingmei nzianmei tei thay niina sa bam tuang e. 9 Aniu Poubauhmei Jisu Khrista zauzian tei nangniw thay e; kamei lungcgay khwan sini, nangniw khang kamei lungcsimei swlou khwan e. Mi tei karam lungcsi paan rui nangniw lungcgaymei sw khang e.
10 Mi lam khou hei ai rui nangniw khou sa niimei thu, ntheikwm nangniw kahouh kanmei tei ntaw thu luailoumei gay the. Mi taanv tei taanc niimei lungning ning pat reymei ni, taanc thau reymei ni nangniw de. 11 Kum thena nangniw mi taanv tei luailou tho. Nangniw rui taanclou niina kahouhmei tei tiguang nthuihlou khang, nangniw ngammei thei layna, tii patna taanc suaklou tho. 12 Nangniw rui tii niina tii ti thei, nangniw rui tii khang naina tiimei tei laalou puni; maekmei tei tii o tw tuang hamh e.
13 Ai rui nangniw khou puatcrith tiphungclouna meic gaanv khat puat sw-nthaanlou ni tw tuang hamh e. 14 Ntaw thu nangniw khang thu nai geihpui zaeng rui, maekmei nunc khang nkhavloumei gay e twpui tuang de. Nangniw ni maek datpui ganv khou, kaniw khang nai geic dat e thei, kaniw ni nangniw ta nkhavlou dat puni. Mi kumna sakzakna lungh khang e. 15 Nthanmei latrik rui samei kumcna, "Laalou geihmei tei ni nai geih mak e; laalou raumei tei ni nai nnau mak e.
Tita khatni Kapam nunc
16 Aniw rui nangniw khang kadanmei lungning kahak hei Tita khou ni tiiloumei khang Ravguangc ta thuancku e. 17 Kata aniw rui huaychamei neihlana piuloumei na hamhna, kamei rui kahaw ranvna kamei nangniw daeng thangc tat kan tuang the. 18 Gaychamv dinhmei khou kata phwamling guay rui thuancna bammei chana gaanv khat ta ni kamei lev tat nchamc khang ndiulou kan e. 19 Mi ruc khou tei rui, kamei hei aniw rui nkhavlou nii changhmei lev kazauhna Poubauhmei tuang hymdaihmei khang mi nzianmei taanv taanc bammei dwan khou hei aniw lev tat nchamcna nkhavlou khang phwamling guay rui kapah patna ndiuloumeipu ni e.
20 Mi lungning daicna tii patmei syan dui tamzanhmei khou hei, meicnunc rui khanclou mak khang twmei aniw kadanna sw bam e. 21 Aniw rui ningmei thu Poubauhmei mikzaw khou na hamhna, meicnunc mikzaw khou ni nchumhmei taanh khang twmei hei e. 22 Mi kumcna aniu chana kata hei kaniw thei ndiulou kan the. Aniw kata kaganv mpeyna zauc the, kumna kakhou nkhavlou nii changhmei nai e. Kamei ntaw nangniw ta lwm lapui zaeng rui nkhavlou nii katyn the. 23 Tita lam khou thu, kamei hei ai lev taanv taanc kariumei khatni nangniw ta nkhavloumei khou ata nkhavloumeipu e. Kamei lev tat nchamc kanmei chana nunc lam khou ni, kaniw hei phwamling tuang latdiutatmei nunc e, Khrista ta tihymdaihmei nunc e. 24 Aniw rui nangniw lam khou gaengh sw bammei hei kachangc dyng e twmei phwamling guay rui ni thay kan khang kaniw ta nangniw rui nzianmei tei lyanlou tio.