7
1 Nzianmei thiu, mi latryan guay hei aniu khang e. Mi zaeng rui, aniu pumc ta ni, bumaengh ta ni sw-mphuam nimei guay khou rui nthanna bam di kho, khatni Ravguangc ta pingna nthan thiakh thiakna lungc di kho.
Paul khang Neihlamei
2 Nangniw lung aniw khang laanc patlou o. Aniw gaanv khat na khou sini nkhuaimei swlou kan mak e. Aniw gaanv khat na ta sini swkasiclou kan mak e, khatni aniw gaanv khat na ta sini guattulou kan mak e. 3 Mi hei ai nangniw ta latzan swna sa tu hamh e; ai rui sa kanmei tei kumcna nangniw hei aniw khang heidikamv nzianmei nunc e, theic nchamc ringc nchamc nimei nunc e. 4 Ai nangniw ta lwmgay de; ai nangniw zaeng rui azaw gay bam tuang e! Ryanramei azuh guang bam sini swmlou e; ai neihlamei padik bam e.
5 Aniw Makedonia khou guangmei tangv nganv aniw khang zaengswloupui ganv maek e. Kabamv katana khou katuakcmei rana, agay agimei rui padik, aniw lungc khou pingmei rui padik e. 6 Tiki lungc tangkhynna bammei nunc ta katiu thauloumei Racguangc rui Tita ta ndiu guangna, aniw ta katiuthaulou e. 7 Aniw ta tineihla thauloumei kiu kamei guangmei na tei hamh e; nangniw rui akumhna kata katiulou cho twmei kamei rui racloumei tei rui ni e. Nangniw ata how niina bam e, nangniw lungh kabiuna bam e, nangniw akhang lunghsuc bam e twmei hei kamei rui aniw khou raclou pwkhou, ntaw thu ai neihla mbu thau the.
8 Atuang tatdyn tei rui nangniw lung swkabiulou khwan sini, mi tei kumcna hy kanmei tei maanv the twna ning mak e. Mi tei rui nangniw lung matak khat na sw kabiulouna taanmei tuang e thei, ai maanv the tw ni tuang e. 9 Tiki ntaw thu ai neihla e. Nangniw lungc sw kabiulou kan the twna hamh e; tiki nangniw lungh kabiumei khou tei rui lunghlaic kanpui zaeng rui e. Mi lungh kabiumei khou tei Ravguangc rui taanv swlouna aniw rui nangniw ta swkasiclou kan mak e. 10 Kalam thu Ravguangc rui taanv swloumei lung ramkabiu rui tilunghlaiclouna guloumei tiguang e—kumna mi khou tei lungc kabiu khang maek e. Tiki mbaanv lung ramkabiu rui thu theihmei tipat e. 11 Nangniw lunghkabiu kanmei khou tei Ravguangc rui akumhna taanv swlou bu cho zauc tho: mi tei rui nangniw khou lunghgutmei tiilouna khuay maekmei sw niimei lungning tiilou the. Mi tei rui nangniw khou lunghpuamhmei khatni pingmei tipatlou kan the; ata how niimei ni tipatlou kan the. Mi tei rui nangniw khou kadanmei khatni nkhuaimei ta riaplou niimei tuang tiilou kan the. Ramh lam guayna khou nangniw nkhuai mak e twmei lyanlou the.
12 Kum thena, mi tatdyn hymei tei nkhuaimei taanhmei nunc zaeng rui ni hamh, meicnunc rui kaniw khou nkhuaimei taancloumei nunc zaeng rui ni hamh e; tiki nangniw Ravguangc hu khou aniw khang adih kadan bam cho twmei nangniw khou tithaylou khang hy tuang e. 13 Mi zaeng rui aniw ta mpeyna katiulou e.
Aniw ta katiuloumei na hamhna, nangniw rui Tita ta tineihlalou tina kamei neihla bammei tei rui aniw ta tineihlalou dat e. 14 Ai nangniw lam khou kakhou agaengh sw bam tuang e, kumna nangniw ata tizak lou mak khe. Aniw rui nangniw khou sa kanmei guayna tei nchumhmei lat rana the; mi tei kumcna aniw rui Tita khou nangniw lam khou gaengh swna sa kanmei tei ni kalingmei lat e. 15 Kamei rui nangniw khou nchamloumei guay tei piu niina piu bammei khatni nangniw rui kata ping kadanna laaloumei, mi guay hei kamei ningtowna kamei nangniw ta nzian ranv ranv bam e. 16 Nangniw hei lwmnuhmei nunc di the twna ai mpeyna neihla the.