6
1 Kum thena, Ravguangc zauzian nsa swmaan mak khang, kamei lev taanv taanc nchamcmei nunc swna aniw rui nangniw khou huaycha e. 2 Ravguangc rui sa e:
"Ai rui nangniw ta laalou nipui ganv khou tei,
Ai nangniw lat chulou the.
Nangniw ta gulou nipui tingmik khou tei,
Ai nangniw ta nkhavlou kan the." Zauc lo! Laalou nipui ganv kiu ntaw hei the; gulou nipui tingmik kiu aseic hei the!
3 Thowkumhmei aniw tuang taanv khou rui phaysuy kan pu ramc e twna, aniw taanv khou hei khanclou nuhmei tuang nai mak khang karamc bam e. 4 Mi phaan tei, ryanramei, suc nucmei khatni kunghmei azuh ariwpui ganv khou, aniw Ravguangc siamruaimei nunc swna khaengvna lungc lyanlou e. 5 Aniw ta bai the, kangkai khou bangclou the, meic kangdai rui kwam the, aniw taanv ranvna taanc the, zip makna khatni tu zangv makna lunghpui ganv nai the. 6 Aniw tuang Nthanmei panty, kabah thaymei, khaengvthaymei, khatni nzianthaymei rui aniw hei Ravguangc siamruaimei e twmei lyanlou kan the. Mi hei Bumaengh Nthanmei paan rui, nzian changhmei paan rui, 7 nchumhmei latchamv dinc ndauhmei paan rui, khatni Ravguangc pumtan paan rui e. Adow khang khatni akhangv khang ravchaptatmei hei baansyn e. 8 Aniw ta chakhwang swlou e, malana ni swlou e; aniw ta sw zak lou e, thuanckuloumei ni nai e. Aniw ta lat saraemhmei nunc ta kumcna ni swlou e; kum sini aniw nchumhmei sa bam tuang e. 9 Aniw ta meic rui thaylou makmei nunc kumcna swlou e, tiki meic guayna rui thay bam de; theic kan nimei nunc kumcna ning e, tiki nangniw how the—aniw ringc bam e. Riaplou khwan sini aniw theih mak e; 10 aniw lungc tiryanralou khwan sini aniw neihla tanh tan bam e; aniw hei lungcsi tu kumc khwan sini, meic mpeyna ta tilungcgaylou e; aniw tuang ramh khat na sini maek tu kumc khwan sini, aniw khang katana nai e.
11 Korinthmei nunc lev, aniw rui sa nimei tei nangniw khou daeklou makna salou kan the; aniw lungc kapwm rui nangniw ta nzian e. 12 Aniw rui nangniw ta nzian makpui tuang hamh e; nangniw rui aniw ta nzian makpui tuang de. 13 Ai rui nangniw ta anac nunc ta kumcna sa tuang e: aniw rui nangniw ta nzianmei kumcna nangniw ni aniw ta nzian o. Nangniw lungc laanc daic patlou o.
Ravmaengc Kalummei khou rui Ramhthay khang
14 Lwmmei hamhmei nunc lev nangniw boudu kariu riu. Akumhna ravchaptatmei lev latliammei kariu nuh nina cho? Akumhna zinghmei lev gaanhmei bam kariu nuh nina cho? 15 Akumhna Khrista lev Ravsic kariu nuh nina cho? Akumhna lwmmei lev lwm makmei kariu nuh nina cho? 16 Akumhna Ravguangc tuang ravkai lev ravmaengc tuang ravkai kariu nuh nina cho? Aniu hei Ravguangc tuang ravkai e! Kalam thu Ravguangc rui sa e:
"Ai meicnunc pang khou lungc bam puni,
kumna tat nchamc bam puni;
Ai rui kaniw Racguangc sw puni,
"Nangniw kaniw ta mpatlou nina e
kumna kaniw khou rui baic taph tap nina e.
Nthan makmei ta kahi lak nina e,
kum pwkhou ai nangniw ta laalou puni.
18 Ai rui nangniw pu sw puni,
kumna nangniw anac mpouh aluh sw puni,
twna Ngamparimei Poubauhmei rui sa e."