5
1 Aniu lungc bammei pheykai hei ra kan pwkhou, baanh rui kasiamh makmei, Ravguangc rui kasiamhloumei tingsaengzaeng kai, tingkauh thangc aniu khang nai e twmei aniu thay e.2 Tingkauh thangc aniu lungc nipui kai tabui nungc rui aniu khou piulou nina cho twna aniu huay bam e.3 Mi tei aniu khou piulouna pumtang bam lak e.4 Aniu mi pheykai khou lungc bam khou hei, puatcrith phungcna kahui kasing bam e. Aniu mbaanv pumc hei luak ganc kan nii the twna hamh e; tiki tingkauh tuang tei piu nii the twna de. Mi kiu theic nimei pumc hei theic dat lakmei pumc sw khang e.5 Ravguangc kamei rui mi hei aniu khang chamdaanvlou tuang e, kumna kamei rui aniu khang Bumaengh Nthanmei tiiloumei hei rui aniu khang bumaengh kai tii puni twmei tuang e.
6 Kumna aniu kadan dat mak khe. Aniu mbaanv pumc khou lungc bam saanv, aniu Poubauhmei daeng khou rui ducna bam e twmei aniu thay e. 7 Kalam thu aniu lwmna tat bam tuang e, howna hamh e. 8 Aniu ping dat mak khe, kumna mbaanv pumc hei mpatlouna Poubauhmei daeng khou lungc bam kan nii the. 9 Kumna mbaanv tuang kai khou bam pwni, tingkauh tuang kai khou bam pwni, aniu rui tamhmei kiu thu kata tipianlou khang twmei hei e. 10 Kalam thu aniu meic guayna Khrista tuang latzan bamv khou guang puni. Simei pwni, gaymei pwni aniu mi mbaanv pumc rui taancloumei taanv thay meic katana laa puni.
Khrista Paan rui Ravguangc lev Guatcswmei
11 Mi zaeng rui, Poubauhmei ta pingmei lam khou, aniw khou thaymei naipui zaeng rui, aniw rui meic baihmei guay ta ni sa kwmlou khang karamc bam tuang e. Ravguangc rui aniw ta nthanna thay e, kumna nangniw ni ata nangniw lungsyng khou rui thay kan de twmei lwmgay e. 12 Aniw rana aniw ta sathuancna nangniw khou sa bam khang sw mak e; tiki meic lungc zauh makna, kapaengc zaucna gaengh sw bammei nunc khou tei nangniw latdau khang nai nuh khang, aniw khou nangniw gaengh sw bam nuh khang aniw karamc bam e. 13 Aniw hei mbamei nunc e thei, mi tei Ravguangc khang e; aniw hei mba makmei nunc e thei, mi hei nangniw khang e. 14 Aniw ta thu Khrista ramzian tei rui sin the, kumna gaanv khat rui meic guayna khang theiclou the twmei aniw thay the. Kumna meic guayna kamei theihmei khou tei lay theic kazauh the. 15 Kamei meic guayna khang theiclou the. Mi zaeng rui, ringc bammei guayna hei kaniw rana khang ringc dat nina hamh the; kaniw khang theiclouna ringcthau dat kanmeipu khang ringclou khang the.
16 Ntaw thu aniw meic gaanv khat na ta sini maansei ramchak kumcna chak dat mak khe. Kaganv akhat khou aniw mi kumcna Khrista ta chak bam khwan sini, aniw mi kumcna chak dat mak khe. 17 Mi zaeng rui, thow pwni Khrista khou bampui mei tei, kamei meic kathanc di the; karaan tei tat kan the; kathanc guanh dat the. 18 Mi guay hei, Khrista paan rui aniu ta kakhou zaykariulou datmeipu khatni mi zaykariulou datmei taanv hei taanh khang aniw khou nsinloumeipu Ravguangc kamei rui taancloumei taanv e. 19 Aniw dinc nimei chamv kiu Ravguangc rui mbaanv maansei ta Khrista paan rui a kakhou zaykariulou dat the twmei hei e. Ravguangc rui kaniw paap chak dat mak khe, kumna Ravguangc khou zaykariulou dat nimei chamv hei dinh khang kamei rui aniw khou nsinlou the.
20 Kumna mi zaykariuloumei lat hei sa khang Ravguangc rui aniw ta ndiuloumei thei layna, ntaw thu aniw hei Khrista tuang chaguatpouc nunc e. Mi zaeng rui, aniw rui Khrista phaan nangniw khou huaycha e: nangniw Ravguangc khou guang kariu o. 21 Kapaan rui aniu Ravguangc tuang ravchaptatmei tei laa khang paapc maekmeipu Khrista khou aniu paap mphunlou kan the.