4
Bihlai khou Bumaengh tuang Lanv
1 Ravguangc rui kazauzian paan rui mi taanv hei aniw khou tiilou the, kum thena, aniw lungc kachanh mak e. 2 Nkamhmei zakpui taanv guay tei aniw thu taanh mak e; aniw thu meic guat mak e, Ravguangc lat ta sw kalaih mak e. Mi phaan tei nchumhmei lat ndauh phauna dinc ndauh the, kumna aniw hei nchumh de twmei meic guay rui thay khang Ravguangc mav khou sw bam tuang e. 3 Aniw tuang gaychamv hei gumlou bammei tuang nai e thei, maan bammei nunc khang tei gumlou bam tina e. 4 Lwmmei hamhmei nunc tei thu mi mbaanv tuang rav rui kaniw lungning mik titiatlou tina kaniw khou tigaanclou bammei gaanhmei, Ravguangc kumc kahakmei Khrista tuang hymdaihmei gaychamv khou rui guangmei gaanhmei ta tei kamei rui kaniw ta tihowlou mak e. 5 Aniw rui dinc ndauh bammei hei aniw rana lam khou dinc ndauh bam tu hamh e; aniw rui dinc ndauh bammei thu Jisu Khrista hei Poubauhmei e, aniw hei Jisu khang nangniw bangc nunc e twmei dinc ndauh bam tuang e. 6 "Zinghmei khou rui gaanhmei gaanc pat puni!" twna samei Racguangc hei rui Khrista zaw khou gaanc bammei Ravguangc tuang hymdaihmei tei tithaylou khang, katuang gaanhmei aniu lungc khou tigaanclou e.
7 Mi bumaengh tuang lanv lou bammei aniu hei bihlai kumhmei tuang e; mi hei ramh guayna Ravguangc pumtan khou nai e, aniu khou maek e twmei lyan khang e. 8 Aniw ta kanaek kathuic khou rui chap guang e; tiki chap piak mak e. Swang maekpui tuang mpeyna ariw e; tiki aniw mpat mak e. 9 Aniw ta zauczihmei mpeyna nai e; tiki aniw pam ni nai mak mak e. Bai pun keylou sini; sw luailou mak e. 10 Mi kumna Jisu theihmei tei kaganv kathuic aniw pumc khou phungcna tat bam e; mi hei kamei ringc bammei tei aniw pumc khou rui lyan pat khang e. 11 Aniw panty saanv saengh hei, aniw Khrista khang theic khang tii patlou bam e; mi hei aniw pumc khou rui Khrista ringc bammei tei how khang e. 12 Mi kiu thu, aniw ruc khou taanc bammei thu swluai khang e; tiki nangniw khang taanc bammei thu ringh khang e.
13 "Ai lwmmei zaeng rui sa tuang e," twna nthanmei latrik rui sa e. Mi tei kumcna aniw ni lwmmei zaeng rui sa tuang e. 14 Kalam thu Poubauhmei Jisu ta tiringcthaulou datmei Racguangc rui aniu ta ni Jisu lev tiringcthaulou nchamcna aniu ta kapamv khou laa guanglou puni. 15 Mi guay hei nangniw khang e; Ravguangc zauzian hei meicnunc khou mbu hay hayna zin lik patna, Ravguangc hym thuanhmei mbu thau khang e.
16 Mi zaeng rui, aniw lungh tangkhyn zat mak e. Aniw tuang mbaanv pumc hei swan khith khit key bam sini, aniw tuang bumaengc hei thu tingmik pum kachaengc ringc mbu hay hay thau bam e. 17 Mi kumhmei matak khat na katitna ryanra khaengvloumei khang tii nimei taraina makmei tingsaengzaeng hymdaihmei tei lev kida khang maek e. 18 Kalam thu aniu lungclou bammei hei thu howmei puat khou hamh e, how makmei puat khou de. Howmei puat hei thu matak khat na khang de; tiki how makmei puat hei thu tingsaengzaeng khang e.