3
Latdyng Thanh tuang Taanvruaimei nunc
1 Mi hei aniw gaengh swna rac bam tu kumc dat bu he cho? Aniw ta sa chuyloupui tatdyn nangniw khang hy khang, hamh e thei nangniw rui hylou khang, meic baihmei nunc khang kage naimei tei kumcna, aniw khang ni kage nai bu cho? 2 Aniw lam khou hyloumei tatdyn kiu nangniw hei the, meic katana thay khang khatni pac khang aniux lungc khou hyloumei tatdyn kiu the. 3 Aniw tuang taanvthai nangniw hei, Khrista khou rui tii guangmei tatdyn kiu the twmei nthanna lyanlou the. Mi hei nkuangdui rui hy tuang hamh e, ringhmei Racguangc tuang Bumaengc rui e; ntauh paek khou hamh e, maansei lungthw khou hylou tuang e. 4 Ai mi hei Khrista paan rui Ravguangc hu khou baucna sa tuang e. 5 Mi taanv hei aniw taanc biuhmei nunc e twna sa nuhmei tuang aniw khou ramh khat na sini maek e; aniw taanc ngammei hei Ravguangc rui tiilou tuang de. 6 Aniw ta hyloumei Riakdanv tuang hamhna, Bumaengh tuang latryan thanh tuang taanvruaimei nunc sw ngam khang tiiloumei hei Ravguangc kamei rui e. Hyloumei Riakdanv tei rui theihmei phungc guang e; tiki Bumaengh tei rui thu ringhmei tiilou e.
7 Riakdanv tei ntauh paek khou hylou khwan e, kumna mi tei tiilou khou tei Ravguangc hym kachanmei tei lyanlou khwan e. Mousi zaw khou panloumei riw tei kamv key dat kan khou sini, Israelmei nunc tei Mousi zaw zauc adyang ngam mak khwan e. Theihmei phungc guangmei Riakdanv tei tiilou khou sini hei di hymdaicna tiilou e thei, 8 Bumaengh tuang taanv hei thu adih hymdaic puni cho! 9 Latzan swmei tuang tei sini hei di hymdaic e thei, ravchaptatmei phungc guangmei tuang hei thu adih hymdaic puni cho! 10 Ntaw tuang hymdaihmei hei rui reynungc tuang tei suangc mbu taph tappui zaeng rui, reynungc tuang hymdaihmei tei thu maan kan the twna aniu sa nuh the. 11 Kaganv akhat na tuang tei sini mi kumcna hymdaic e thei, tingsaengzaeng tuang thu adih hymdaic puni cho!
12 Aniu khang mi kumcna lwmgaymei hei naipui zaeng rui aniu baucna chamv hei dinc the; 13 kamv keyna maan dat kan nimei kazaw tei Israelmei nac nunc how mak khang Mousi rui kazaw gum kanmei tei kumcna aniu thu gum binlou dat mak khe. 14 Israelmei nunc tuang lungning tei gum binlou the, kum tina latryan guangc tei pac pwkhou, ntaw nganv kaniw lungning tei mi tei rui gum binlou bam muai di he. Khrista khou guanglou pwkhou na rui gumlou bammei tei kakhang laanc patlou e. 15 Ntaw nganv kaniw Mousi tuang Riakdanv hei pac pwkhou kaniw lungning tei gum binlou bam di he. 16 Tiki thow pwni kamei Poubauhmei biak karih pat pwkhou, mi zawgumphey tei laanc patlou e. 17 Poubauhmei kamei hei Bumaengh e, Poubauhmei tuang Bumaengc rui nyngswmei tiilou e. 18 Kum thena, aniu guayna hei, aniu zaw gum makna, Poubauhmei tuang kachanmei hym tei aniu khou how e. Mi Bumaengh swmei, Poubauhmei khou tei rui guangmei hym tei rui aniu ta kata luihmei hymdaihmei khou mbu hay hayna tiguanlihlou e.