2
1 Mi zaeng rui lungc kabiupui zaeng rui ai guang dat lak khe twna alung ding tuang e. 2 Ai rui nangniw lungc tikabiulou pwkhou, thow rui alung tineihla lou dat nimei naina cho? Ai rui kaniw lungc tikabiulou kanmei nunc tei rui tineihlalou dat khang de. 3 Ai guang tina, ata tineihlalou nimei nunc tei rui alung tikabiu lou nimei suangc thu, guang makmei rui gay the twna ai mi tatdyn tei hy kanmei tuang e. Kalam thu ai neihla pwkhou nangniw ni neihla e twmei ai thay e. 4 Ai mi tatdyn tei lungning mpeyna kabiuna khatni lungc ryanrana, mikdui keyna hy kanmei tuang e. Mi tei nangniw lungc tikabiulou khang twna hy tu hamh e; ai nangniw ta adih nzian cho twmei nangniw thay khang e.
Nkhuaipui Mei ta Kuakloumei
5 Thowkumhmei rui meic gaanv saekc lungc tikabiuloumei tei ata hamh e, nangniw guayna ta de; meic guayna lungc tikabiu liklou ngam the. (Ai mi hei samei kabac kiu thu ai kakhou lat tanc langvmei sa nii makpui zaeng rui e.) 6 Nangniw meic guayna rui kata mi tei kumcna riaploumei hei rui biuc the. 7 Nangniw, ntaw thu, kamei kalung kabiu langvna simei rui ngam kan mak khang, kata kuaklou o khatni katiu thaulou o. 8 Kumna nangniw kata nzian changh bam de twmei kakhou lyanlou huaycha e. 9 Nangniw nchanvmei khou ding ngam di ny khatni ai rui samei tei piu nii bam di ny twmei thay niina mi tatdyn tei ai hy tuang e. 10 Nangniw rui kuakloupui mei ta tei ai ni kuaklou the. Ai rui kuaklou khang kage naipui thei layna kuaklou e thei, nangniw khang Khrista hu khou kuaklou tuang e. 11 Mi hei Seitan rui aniu ruc khou kadouchamei laa mak khang e. Kalam thu aniu kathiak tei thay e.
Paul Troa khou
12 Ai Khrista tuang Gaychamv dinh khang Troas khou guang pwkhou, mi khou tei Poubauhmei rui akhang kaikhamv laanclou the twmei ai how the. 13 Tiki mi khou tei chana Tita ta ariw makna alung mpeyna katuakc the. Kumna mi khou tei kaniw ta ramnavlou duc lana Makedonia thangc tat the.
Khrista Paan rui Rihngammei
14 Ravguangc ta thuancku e! Kalam thu Khrista khou bammei aniu rihngammei, Khrista tuang kangmei nunc kanglwan gutmei chaenglwan khou, kamei rui chaeng zaylou bam e, khatni Khrista chamv hei kabamv kathuic khou namh gaymei rym zin lik kumc tithay liklou khang kamei rui aniu ta sinswlou bam e. 15 Kalam thu aniu hei gulou bammei nunc khou ni, maan bammei nunc khou ni, lik sikh sik bammei Khrista rui Ravguangc khang katloumei namh gaymei agaw rym tei e. 16 Kalam thu maan bammei nunc khang thu mi hei theihmei khou rui theic luaic luaicmei rym e; tiki gulou bammei nunc khang thu ringhmei khou rui tiringc katynloumei rym e. Kum e thei, mi kumhmei taanv hei thow rui taanc ngam nina cho? 17 Aniw hei thu Ravguangc lat ta alipui puat swna sinsw bammei baih baihmei nunc tei kumhmei hamh e; tiki Ravguangc rui aniw ta ndiuloupui thei layna, Khrista mei swna aniw lungsyng khou rui Ravguangc hu khou lat tei dinc e.