Korinthmei
KHOU Paul RUI HYMEI KANEIMEI TATDYN
1
Chaengriw Lat
1 Ravguangc rui ningmei thei layna Khrista Jisu tuang Latdiutatmei swmei Paul, khatni aniu chana Timothi khou rui, Korinth khou naimei Ravguangc tuang phwamling khatni Akhaia kapwm khou bammei nthanmei nunc khou:
2 Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiiloumei sw diu.
Paul rui Ravguangc ta Thuanhmei
3 Aniu Poubauhmei Jisu Khrista Pu Ravguangc zauzian thaymei Pu, kalam kapwmna khou nkhavloumei Racguangc hym daic diu! 4 Aniw ryanra bampui ganv khou kamei rui aniu ta nkhavlou e. Mi hei mi paan tei rui aniu rui ni ryanra ryanriu bammei guay ta nkhavlou ngam khang e. 5 Khrista tuang ryanra khaengvmei dam tei aniu ni lay phungc mbupui thei layna Ravguangc rui nkhavloumei ni aniu Khrista paan rui laatow e. 6 Aniw ryanramei ariwmei hei nangniw ta nkhavlou khang e khatni gulou khang e. Aniw ta swmloumei hei, nangniw ta ni swmlou khang e, kumna aniw rui khaengv kanmei tei nangniw ni khaengv ngam khang pumtan tiilou khang e. 7 Kumna aniw rui nangniw ta lwmgaymei kalung makna bam e. Nangniw ni aniw ryanramei khou kazauhmei zaeng rui, aniw ta nkhavloumei kumcna nangniw ta nkhavlou puni twmei aniw thay e.
8 Chana thiu, Asia kandih khou aniw ryanramei ariw kanmei tei nangniw khou tiningtowlou nii e. Aniw ruc khou keyloumei ryanramei tei aniw phungc ngam makna, aniw ringc pat dat pungh e twmei lwm taan khwan the. 9 Aniw ruc khou theic khang latdanv patlou lana khuangh di the twna ning tangc khwan the. Kum e tiki, mi tei aniw rana aniw khou ngangvlou makna, theihmei ta tiringcthauloumei Racguangc khou na ngangvlou khang tii guang tuang bu the. 10 Mi kumhmei theic rap nuhmei bamva khou tei rui kamei rui aniw ta gulou the, khatni gulou puni. Kamei rui aniw ta gulou bam puni de twmei aniw lwmgay e. 11 Nangniw rui aniw khang huayneyloumei tei rui aniw ta nkhavlou nina the. Kumna nangniw rui aniw khang huayneyloumei tei dawlou puni, kum na Ravguangc rui aniw ta suaihiamlou puni. Kum pwkhou meic mpeyna rui aniw khang Ravguangc ta thuancku puni.
Paul Katuang Taanvraeng Kalaihmei
12 Aniw rui gaenghswna samei tuang e: aniw mi mbaanv khou lungc bammei panty, nkunna aniw lev nangniw kak khou nai bammei riang hei, kakheswmei tuang hamh e. Mi hei meicpumc tuang ningting khou rui patmei tuang hamhna, Ravguangc zauzian paan rui kamei rui aniw khou tiiloumei nthanmei, kalip kalei nai dat makmei lungning khou rui patmei tuang e twmei hei aniw lungsyng rui thay e. 13 Nangniw pac thay lak nimei, hamh e thei kabah thay ngam lak nimei tei aniw nangniw khang hy mak e. Luaimei nganv nangniw kabahthay puni ni twmei ai lwmgay e. 14 Nangniw aniw ta katitna thu thay bam nuh the; tiki Poubauhmei Jisu tingmik nungc kiu, nangniw aniw ta nthanna thay puni. Mi khou kiu aniw nangniw zaeng rui neihla nimei kumcna nangniw ni aniw zaeng rui neihla puni twmei aniw lwm e.
15 Mi hei kumcna ai lwmmei zaeng rui, nangniw suaihiam laatow luan nei khang, ai nangniw khou guanglou rey ni the twna raengc thau khwan the. 16 Mi kiu thu ai Makedonia tat nimei chaeng khou nangniw daeng khou guang khanvlou lana, hanc dat ni khou ni, ai Judia tat nimei chaenglwan khou nangniw rui ata nkhavlou khang guang khanvlou dat ni twna ai raengc thau tuang e. 17 Mi raeng kiu alung chalingc ding tuang maekna sw tu kumc bu cho? Ai raeng akhat raengc thaupui ganv khou, mbaanv mei nunc kumcna akhang gaeng khang zaucna "kum ni" tw guay "kum lak e" tw dat guay tw bam tu cho?
18 Ravguangc hu lwmnuhmei e, mi tei kumcna ai rui nangniw khou sa kanmei tei ni "guang ni the" khatni "guang lak e" twna sa kan mak e. 19 Sila rui, Timothi rui, khatni ai rui nangniw khou dinclou kanmei Jisu Khrista, Ravguangc Nac Mpouh hei thu pat pat gut gutmeipu hamh e. 20 Kalam thu kamei hei Ravguangc tuang latryan guay khou tei thu kalaic datmeipu hamh the. Mi zaeng rui, Jisu Khrista paan rui, aniu rui “Amen" twna samei hei Ravguangc hymdaih khang sa tuang e. 21 Aniu ta Khrista khou tiding ntiploumei hei Ravguangc rui e; aniu ta reic patloumei hei Ravguangc rui e. 22 Aniu hei katuang di the twmei thay khang, khatni kamei rui aniu khang chamdaanvlou bammei guay tei suai makna tiilou puni the twmei ndauhmei swna Bumaengh Nthanmei ta sinkhampui syan kumcna aniu khou tiiloumei hei ni Ravguangc kamei rui e.
23 Ravguangc rui thay e! Ai Korinth khou guang dat makmei hei nangniw ta mphut luh bam dat ni makpui zaeng rui e. 24 Aniw rui nangniw ta mi hei lwm o, mi tei lwm rio twna kaipouc swna sa ni twna hamh e; nangniw lwmmei khou ntipna ding bam the twmei aniw thay e. Aniw rui taanc bammei thu nangniw neihla khang de.