12
Paul tuang Ndawman
1 Gaeng mak sini, ai agaengh rac puni; Poubauhmei rui tiiloumei ndawman khatni ndauhloumei lam khou ai sa puni: 2 Tingkwm ruhna padeih hu thangc Khristamei gaanv khat ta kathumhmei tingkauc khou phungc kuloumei ta ai thay e. (Mi tei kapumc kahak ku tu ni, ndawman ni ai thay mak e; Ravguangc rui thay e.) 3 Mi pu ta tei Paradais khou phungc kulou the twmei ai thay e. (Tiki mi tei kapumc kahak ku tu ni, ndawman ni ai thay mak e; Ravguangc rui thay e.) 4 Khoutei rac dat kadai nuh makmei, maansei rui sa pat nuh makmei tuang kamei chu khwan e. 5 Mi pu lam khou hei ai gaengh sw puni; tiki alam khou thu aram swan khou na tei hamhna ai gaengh sw lak e. 6 Ai gaengh sw nii e thei ni, mi tei rui ata mpangmei tisw rap ni tu hamh e; kalam thu ai sa nimei hei nchumhmei lat e. Tiki ai gaengh sw nii mak e. Kalam thu ai rui taanhmei ta howna khatni samei ta chuna ata thaymei khang tei suangc kauhna meic gaanv khat na rui sini ata ningloumei ta ai laa nii mak e.
7 Charynmei tuang mpeyna akhou ndauhloumei zaeng rui ai agaengh sw twan pw ramc e twna, apumc khou sauh akhat tiilou the, mi ta tei Seitan tuang latdiumei swna sinswna ata gaengh sw mak khang rai bam e. 8 Mi hei akhou rui laa ganclou khang ai Poubauhmei khou huayney luan thumh the. 9 Tiki "Azauzian hei nang khang biuhmei the, kalam thu nang swan pwkhou atuang pumtan tanc e," twna kamei rui dawlou the. Mi zaeng rui aram swan lam khou ai neihlana gaengh sw e. Mi tei Khrista tuang gaekloumei tuang pumtan akhou nai bam khang e. 10 Mi zaeng rui Khrista khang ai swan khou, ata tizak lou khou, ryanramei ariw khou, rai riu khou, kunghmei ariw khou ai neihla e. Kalam thu ai swan pwkhou, ai tanc the.
Paul Korinthmei nunc khang Kadanmei
11 Ai hei mpangmei kumcna sw bam e—mi hei nangniw rui tiswlou tuang e. Alam khou thaymei nunc thu nangniw hei e. Kalam thu ai hei ramh khat sini hamh khwan sini, nangniw tuang "Latdiutatmei daihmei nunc" khang tei suangc keymei thu hamh e. 12 Latdiutatmei akhat e twmei nchinmei tuang charynmei taanv khatni sw nchinmei taanv mpeyna nangniw pang khou mpeyna khaengvmei lev kazauhna ai taanclou kan the. 13 Ai rui nangniw khou syan dui lam khou puatcrith tiilou makmei na tei hamhna, nangniw ta baihmei phwamling nunc ta suangc keyna swlou tuang nai buna cho? Mi nchumh makmei khang tei rui ata kuaklou o!
14 Ai nangniw daeng khou luan thumhmei swna guang khang sw bam e, kumna ai rui nangniw khang puatcrith tiilou ni tu hamh e. Ai rui kahawmei thu nangniw tuang syan lanv ta hamh e; nangniw ta de. Alauc nunc rui kapui kapu khang kaphianhlou nina hamh e, kapui kapu rui kanac nunc khang kaphianhlou nipui thouc de. 15 Nangniw tuang bumaengc khang atuang naimei guay khatni apumc kahak hei ai neihlana piulou puni. Ai nangniw ta nzian tii hay nangniw ata nzian mak hay hay bam nina cho?
16 Ai rui nangniw khang puatcrith tiilou kan mak e twmei nangniw ni nuh puni de. Tiki ai hei arouc si e, kumna guatna nangniw ta manh khang sw e twna gaanv saekc rui sa e. 17 Mi kiu akumhna cho? Ai rui nangniw khou latdiumei ndiu guang kanmei nunc khou tei rui nangniw khou rui guattu khang sw kanmei tuang naina cho? 18 Ai rui Tita ta tat o twna katiulou kan tuang e, kumna chana baihmei gaanv khat ta ni nduangh tat khang katiulou kan tuang e. Tita rui nangniw ta guattu kan the twna nangniw ningna cho? Tita lungning tei ni alungning lev akhat na de, kumna aney rui sw bammei akhat na de.
19 Aniw ta nangniw hu khou sa nchumh khang sw bam tuang e twna nangniw ning bam lana cho? Nzianmei thiu, aniw rui sa bammei guay hei Khrista khou bamna Ravguangc hu khou samei tuang e, khatni aniw rui taanc bammei guay hei nangniw khang e. 20 Ai pingmei thu nangniw daeng khou guang pwkhou nangniw hei ai rui ningmei kumh mak pw ramc e, khatni ai hei nangniw ningmei kumh mak pw ramc e twmei hei e. Ai guang pwkhou nangniw agayna, mamavna, lunghpuamcna, kakhang khang na ningna, khat khat ta sakasicna, nraucna, daic nii akhyamna, khatni latgeicna bam pw ramc e twna ping e. 21 Ai guang dat pwkhou, Ravguangc rui ata nangniw hu khou tizak lou pw ramc e, kumna nthah boulahna tat kanmei ganv khou lungc kanmei nunc tei kaniw taanc kanmei paap guay tuang mphuammei khou rui kaniw lunghlaih makna kaniw ruc khou ata tikaplou pw ramc e twna ai ping e.