15
Khrista Ringcthau Datmei
1 Chana thiu, ai rui nangniw khou dinclou tina, nangniw laalouna, mi khou tei nangniw ding ntipna bammei gaychamv tei ai nangniw khou ntaw tiningtowlou dat nii e. 2 Ai rui nangniw khou dincloumei gaychamv tei ntipna sin bam e thei, mi tei rui nangniw ta gulou the, kum mak e thei nangniw lwm bammei tei nsa de.
3 Ai laatowmei tei nthuk liangmei lat swna ai nangniw khou dinc kadailou kan tuang the: mi kiu thu Nthanmei Latrik khou hyloumei kumcna, Khrista aniu paap khang theiclou the; 4 Nthanmei Latrik khou hyloumei kumcna, kata tarou khou mbeihlouna zaeng neih thumhpui neic kamei ringcthau dat kan the; 5 kumna kamei rui kata Kephas khou khatni Latdiutatmei ruhna kanei khou lyanlou the. 6 Mi tangv chana nunc meic phay panguh mbu khou kadyng akhat na khou lyanlou khwan e. Mi nunc tei kaniw gaanv saekc theic kan sini, meic geihmei ringc bam di he. 7 Mi tangv kamei Jakob khou khatni Latdiutatmei guayna khou lyanlou khwan e. 8 Nkhamh liang khou kating tangh makna a puanhmei nac kumhmei akhou ni lyanlou the. 9 Kalam thu ai hei Latdiutatmei pang khou nthyam liangmei e—ai hei thu Latdiutatmei twna kawlou khang biuhpui mei hamh e; kalam thu ai hei Ravguangc tuang phwamling ta swmaan khang swmeipu khwan e. 10 Tiki ai Latdiutatmei sw tow bammei hei, Ravguangc zauzian paan e, kumna kamei rui ata nzianloumei hei nsa timaan mak e. Tabui cho tiki, Latdiutatmei baihmei nunc suangc ai taanc ranv mbuna ni taanclou dat the. Mi hei ai rui taanh tu hamh e; akhou tiiloumei Ravguangc zauzian paan rui e. 11 Mi zaeng rui, ai rui pwni, kaniw rui pwni, nangniw khou dincloumei khatni nangniw lwmmei kiu mi hei the.
Lwmmei nunc Ringcthau Dat Nimei
12 Khrista hei theihmei khou rui ringcthau dat kan the twmei hei dinc bam e thei, tabui swna nangniw gaanv saekc rui theihmei ringcthau dat mak e twna sa khang naina cho? 13 Theihmei ringcthau dat mak e thei, Khrista ni ringcthau dat kan mak e; 14 Khrista ringcthau dat mak e thei, aniw dinc bammei hei nsa de, nangniw lwm bammei ni nsa de. 15 Mi na hei hamhna, theihmei ringcthau dat mak e twmei hei nchumh e thei, kamei rui tiringcthaulou makmei ta, Ravguangc rui Khrista ta tiringcthaulou dat kan the twna aniw dinc bammei hei, Ravguangc lam khou ni aniw saraemcna sa bam di the. 16 Theihmei ringcthau dat mak e thei, Khrista ni ringcthau dat kan mak e. 17 Khrista ringcthau dat mak e thei, nangniw lwm bammei hei nsa de, kumna nangniw paap khou nangniw bam di he. 18 Kum e thei, Khrista khou lwmmei theic kanmei nunc tei ringh mak e. 19 Kumna Khrista khou aniu lwmgay bammei hei mi kandic panty khang na de, b mi tangv maek khe tw e thei, aniw hei thu mi kandic khou lungc bammei pang khou, sansi liangmei nunc di the.
20 Tiki kaling thu, Khrista ta theic kanmei nunc pang khou rui reymei swna tiringcthaulou kan the. 21 Kalam thu meic gaanv khat zaeng rui theihmei guangmei kumcna, gaanv khat paan rui ringcthau datmei ni guang the. 22 Adam khou meic guayna theihmei kumcna Khrista khou meic guayna ta tiringcthaulou dat puni. 23 Meic katana kamei kamei ringcthau dat nimei ganv naina, mi hei kumcna ringcthau puni: Rey liangmei khou Khrista ringcthau kan the; mi tangv kamei guang pwkhou katuang mei guay ringcthau dat puni. 24 Mi tangv thu kandih luaimei guang puni. Kaipouc sw bammei nunc, ngamv naimei nunc khatni pumtan naimei guay ta Khrista rui ngam lana, Guanghdic Pu Ravguangc khou tiilou puni. 25 Kalam thu Ravguangc rui zauczihmei guay ta ngam lana, kaphaypav bangc khou tini binlou mak saanv, Khrista guangh swna bam puni. 26 Nkhamh liangmei khou ngamlou nimei zauczihmei kiu thu theihmei hei e. 27 "Ravguangc rui ramh guayna kaphaypav bangc khou tini binlou the," twna nthanmei latrik rui sa e. "Ramh guayna" twmei lungc khou hei, ramh guayna ta Khrista phaypav bangc khou tini binloumeipu Ravguangc hei thu kazauh mak e. 28 Ramh guayna Khrista bangc khou lou pwkhou, Ka Nac Mpouh kata hei, ramh guayna ta kabangc khou loumeipu Racguangc bangc khou lou puni. Kumna kaguayna ruc khou Ravguangc rui sin puni. 29 Theic kanmei khang duilupmei nunc tei thu akumh thah? Kaniw tabui ta lwmna mi tei sw tu cho? Theihmei ringcthau dat mak e twna meic gaanv saekc rui samei hei nchumh e thei, tabui swna mi nunc tei theihmei khang duilup bam tu cho? 30 Kum e thei, tabui swna aniw theic khang ping makna tat bam tu cho? 31 Chana thiu, ai tingmik kathuic theic suc nuhmei bamv khou rana tat bam tuang de! Aniu Poubauhmei Khrista Jisu khou, ai nangniw khou gaengh sw khang naimei tei rui mi hei sa tuang e. 32 Maansei lungning kumcna sa e thei, ai Ephesia khou khouringh nunc lev athwng kanmei tei akhang tabui gaeng thena cho? Kumna theihmei ringcthau dat mak e thei, sa bammei kumcna, "Tu di kho, zangv di kho, nthuanh thu aniu theic kan ni tuang de." 33 Nangniw ta tiguat rio. Simei pam rui kheiliak gaymei swmaan tuang e. 34 Nangniw nchumhmei lungning khou guang dat tho, kumna paapc taanc dat ri tho. Nangniw gaanv saekc thu Ravguangc ta thay mak khe. Mi hei nangniw zak nipui tuang e.
Ringcthau Datmei Pumc
35 "Theihmei kiu akumhna ringcthau dat puni cho? Kaniw pumc kiu akumh puni cho?" twna gaanv saekc rui sa puni. 36 Mpangmei! Nangniw rui kandih khou ramh thw akhat lingclou pwkhou, mi thw tei theic makna ringhmei bwan thau dat mak e. 37 Nangniw rui lingcloumei tei thau punimei kabangc kapwm tei lungclou mak e. Gehu pwni, baihmei pwni, kathw na tei lingclou tu de. 38 Ravguangc rui mi thw khang tei kamei ningmei thei layna kabangc tiilou the. Mi tei kumcna ramh thw kathuic khang kakhang kakhang chamei bang tiilou e.
39 Zanh rui kasiamhmei pumc nchamc karei sini, kaguayna nchamc mak e. Maansei zanc baic e, khouringh zanc baic e, nruay zanc baic e, khatni khav zanc baic e.
40 Mi kumcna, tingkauh tuang pumc khatni kandih tuang pumc nai e. Tingkauh pumc tuang hymdaihmei khatni kandih pumc tuang hymdaihmei hei ni nchamc mak e. 41 Neih tuang hymdaihmei akhat nai e, bw hymdaihmei akhat nai e, khatni gaanchuangcna hymdaihmei baic dat di he. Kumna gaanchuangcna pang khou sini, hymdaihmei baic baic e.
42 Theihmei khou rui ringcthau datmei kiu ni mi tei kumh tuang e. Theihmei pumc tei mbeihlou e, ringcthau datmei tei thu theic dat lak nimei pumc e. 43 Zauc karaengmei pumc swna mbeihlou e, hymdaihmei pumc swna ringcthau dat puni. Ramh sw ngam makmei pumc swna mbeihlou e, ngammei pumc swna ringcthau dat puni. 44 Mbaanv pumc mbeihlou tuang e, bumaengh pumc ringcthau dat puni. Mbaanv pumc nai e, mi hei kumcna, bumaengh pumc ni nai e. 45 Kum tina, "Reymei mei Adam ta ringhmei mei swna damclou the," twna nthanmei latrik khou hylou tuang e. Tiki nkhamhmei Adam hei thu ringhmei tiiloumei Bumaengc e. 46 Reymei tei thu bumaengh tuang hamh e, mbaanv pumc tuang de; mi tangv bumaengh tuang guang dat e. 47 Reymei Adam tei thu kandih niang rui kasiamhmei tuang e; tiki kaneimei Adam tei thu tingkauh thangc rui guang tuang e. 48 Mi mbaanv mei guay pumc tei thu niang rui kasiamhmei mei tei kumc the; tingkauh mei guay tei thu tingkauh thangc rui guangmeipu tuang pumc tei kumc the. 49 Ntaw aniu hei niang rui kasiamhmei mei ta tei kumhmei hei kumc rapna, aniu tingkauh mei tei ni kumc puni. c
50 Chana thiu, ai rui samei kabac kiu thu, zei lev zanh rui kasiamhmei pumc hei thu Ravguangc guangcdic laa nuh mak e, khatni theic nimei pumc hei theic makmei pumc laa nuh mak e.
51 Zauc lo! Ai rui nangniw khou akhou dincloumei nthukpui lat akhat salou puni. Aniu meic guayna theic ni tu hamh e, aniu meic guayna ta tigwanlihlou puni. 52 Nkhamhmei tiangka khwan chu pwkhou mikkhipdak khou kalaic puni. Kalam thu tiangka muan pwkhou theic kanmei nunc tei theic dat lakmei swna ringcthau puni, kumna aniu ta ni tigwanlihlou puni. 53 Kalam thu taemc maan nimei hei, taemc maan dat lakmei khou, khatni theic nimei hei theic dat lakmei khou guanlihlou puni. Mi khou kiu,
54 "Rihngamna theihmei ta
swmaan the!"
55 "He theihmei, nang ngamv
tabui thangc tat kan thah?
He theihmei nang sat tabui
thangc tat kan thah?"
twna hyloumei tei guang tangc puni. 56 Theihmei tuang sat thu paapc hei e, paapc pumtan thu Riakdanv hei e. 57 Tiki aniu Poubauhmei Jisu Khrista paan rui, aniu khang rihngammei tiiloumei Racguangc ta thuancku kho! 58 Mi zaeng rui, nzianmei chana thiu, ding ntipna kalung makna bam o. Nangniw rui Poubauhmei khang taancloumei guay tei nsa hamh e twmei thayna, Poubauhmei tuang taanv khou nangniw tyn tanh tan bam o.