14
Bumaengh Kaipat Lam Mbuna Dincloumei
1 Nzianmei hei nangniw khou nai khang karamc o, kumna Bumaengh kaipat khang, nkunna, ravmundinh khang kahaw o. 2 Kadath datmei lat rui sa bammei tei thu Ravguangc khou sa bam tu de, maansei nunc khou hamh e; kalam thu kamei rui sa bammei tei meic rui kabah thay mak e. Kamei meic thay makmei tuang tei Bumaengh paan rui sa bam tu de. 3 Tiki ravmundinhmei tei thu tidaic thau khang, katiulou khang, khatni swmlou khang meicnunc khou sa bam tuang e. 4 Thay makmei lat sa bammei tei thu karana kata kasiamh bam tuang e, tiki ravmundinhmei tei rui phwamling ta tidaic thau khang e. 5 Nangniw meic guayna thay makmei lat samei ta ai kahaw e, tiki nangniw ravmundinhmei ta kahaw ranv e. Phwamling kapwm khang gaeng nuh khang lat kabah dincloumei maek e thei; thay makmei lat samei khang suangc thu, ravmundinhmei rui nthuk e. 6 Mi zaeng rui, chana thiu, ai nangniw khou guangna ramh khat ndauhloumei, tithayloumei, ravmundincloumei khatni nchamloumei tuang maekna, thay makmei lat na sa nganv tat dat kan ti thei, ai guangmei tei nangniw khang tabui gaengna cho?
7 Kabumaengc maekmei nlim, nrah na tei sini kakhwan key key ku ku na dow tii mak e thei, akumhna nlim muan e hamh e thei nrah dow e twmei thay nina cho? 8 Tiangka muanmei tei kalwan chana muan tii mak e thei, thow rui rih adow khang chamdaanv thay nina cho? 9 Mi tei kumcna kadath datpui lat sa bammei tei ni kabah thay nuhmei tuang hamh e thei, mi kumhmei lat sa bam tu e twmei akumhna thay nina cho? Nang lat tei mpwan khou na samc maanna taan kan ni tuang de. 10 Mi mbaanv khou hei lat baih baihmei mpeyna nai e, kumna mi guay tei kabah maekmei lat khat na sini maek e. 11 Meic gaanv khat rui sa bammei lat tei ai kabah thay mak e thei, kamei tei akhang dihpaengcgin di the; ai ni kakhang dihpaengcgin di the. 12 Nangniw Bumaengh kaipat kahawmei thei layna, phwamling ta tidaic thau nimei tuang kaipat tei mbu thau khang karamc nina e. 13 Mi zaeng rui, meic thay makpui lat samei kamei tei mi kabac tei dinc ngam khang ni huayney nina e. 14 Ai meic thay makmei lat rui huayney e thei, abumaengc rui thu huayney the, tiki mi tei alungning khang thu kabah maek khe. 15 Kum e thei, ai tabui kumhna sw nina cho? Ai abumaengc rui huayney puni, kumna alungning ni kazauhna huayney puni; abumaengc rui ai lu suan puni, kumna alungning ni kazauhna swan puni. 16 Nangniw rui thay makmei lat rui Ravguangc ta thuancku bam khou, nang rui sa bammei lat kabac tei thay makmei kamei tei rui akumhna, "Amen" twna nang thuanckumei suai khou tei salou nina cho? 17 Nang rui thu thuancku chuy sihna thuancku bam nuh e; tiki mi tei meic baihmei khang thu gaeng mak e.
18 Ai Ravguangc ta thuancku e, kalam thu nangniw suangc sini ai thay makmei lat sa geic de. 19 Tiki phwamling kariumei khou thu, thay makmei lat rui latkaeng ching ching sa bammei suangc, latkaeng panguh na sini thaymei lat sana nchamlou kan ni de.
20 Chana thiu, nangniw lungning tei alauc lungning sw rio. Simei biak thangc mu alauc sw o; tiki kakhanhmei khou thu gaanvdaih sw o. 21 "Thay makmei lat samei nunc khou rui, ai rui amei nunc khou sa puni, twna Poubauhmei rui sa e. Ginramdic thangcmei nunc mwang khou rui ai rui sa puni; kum tisini amei nunc alat nking ni tu hamh e," twna Nthanmei Latrik khou hylouna nai e. 22 Mi zaeng rui, thay makmei lat samei hei lwmmei hamhmei nunc khang sw nchinmei tuang e; lwmmei nunc khang hamh e. Tiki ravmundinhmei hei thu, lwm makmei nunc khang hamh e; lwmmei nunc khang e.
23 Phwamlingmei guay guang kariuna meic guayna thay makmei lat sa bam khou, kapaengc thangcmei nunc, hamh e thei lwmmei hamhmei nunc guang e thei, nangniw mba ngam the twna sa pw lak nah cho? 24 Tiki meic guayna ravmundinc e thei, kumna mi khou tei ravning makmei, hamh e thei kapaengc thangcmei guangna, kaniw lat tei chuna kapaap lam khou kamei thay pat nuh e. Kumna kamei rui chuloumei lat tei rui kata latzan sw puni, 25 kumna meic thay makmei, kalung tei ndauh patlou tina, "Nangniw pang khou Ravguangc bam changh dyng e!" twna sa ndauhna kamei nkhum keyna Ravguangc ta kalum puni.
Phwamling Kalummei khou
26 Mi kumc e thei, chana thiu, aniu akumhna sw kho cho? Nangniw ravkalum khang guang kariupui ganv khou, gaanv khat khou lu suan khang nai the, gaanv khat khou dinclou khang nai the, gaanv khat khou Ravguangc rui ramh khat ndauhlou tuang nai the, gaanv khat khou thay makmei lat sa khang nai the, khatni gaanv khat khou mi kabac tei dinclou khang nai the. Mi guay tei rui meic guay ta tidaicthau khang sw nina e. 27 Thay makmei lat sa nimei nai e thei, geic nganv gaanv nei gaanv thumh rui liangc swna sa kan diu, kumna kaniw samei tei gaanv saekc rui kabah hanclou nina e. 28 Tiki mi kabac tei hanclou nimei meic maek e thei, kaniw tei reih reina kaniw lev Ravguangc kak khou na sa bam kan diu. 29 Muhzwng gaanv nei, gaanv thumh rui lat sa e thei, baihmei guay tei rui kiuc ni, kiuc hamh ni kaphianh kan diu. 30 Tiki dungc bammei pang khou tei thowkumhmei khou ramh khat ndauhloumei tuang nai e thei, lat sa bam reymei tei nthaekc kan diu. 31 Kumna nangniw meic guayna khat khat swna ravmundincna meic guayna thay khang e khatni meic guayna ta katiulou khang e. 32 Mi kumna muhzwng nunc rui kaniw tuang bumaengc ta sin nina e. 33 Kalam thu, Ravguangc thu kasuakc kaguakcmei ta kahawmeipu hamh e; manimna chuzaenghna swmei ta kahawmeipu de.
Ravguangc mei nunc tuang phwamling guay khou sw bammei kumcna, 34 ntumei guay thu phwamling kariumei khou tei reih reina bam nina e. Kaniw ta lat sa khang nuhlou mak e; Riakdanv rui samei kumcna, lat piumei swna bam kan diu. 35 Kaniw thay nii tuang nai e thei, kaniw gaanv gaanv khou kaniw kai khou thanv kan diu. Ntumei rui phwamling khou lat samei thu zakpui tuang e. 36 Mi hei nangniw nuh zih boh? Ravguangc lat hei nangniw khou rui pat tuang dinah cho? Hamh e thei, Ravguangc lat tiiloumei kiu nangniw khou na di nah cho? 37 Thow pwni kamei muhzwng e, hamh e thei, kakhou bumaengh kaipat nai e twna ning e thei, ai rui nangniw khou hy bammei hei Poubauhmei tuang latdanv e twna kamei laa nina e. 38 Tiki kamei rui mi lat hei laalou mak e thei, kalat ni laa lak nina e.