13
Nzianmei
1 Ai maansei tuang lat guay khatni kauh baanchara tuang lat guay sa ngam bam nuh e; tiki akhou nzianmei maek e thei, ai rui sa bammei guay tei kakhing bammei mbang khatni syamtuaic tei kumh tuang de. 2 Ai ravmundinc bam nuh e; meic thay makmei tei thaymei akhou nai bam nuh e; chyng but ta nganv tikalaic ngammei ramlum akhou nai bam nuh e; tiki akhou nzianmei maek e thei, ai hei nsa de. 3 Atuang naimei guay ai tii pat bam sini, khatni may ntei khang a apumc ta hei tii pat bam sini, akhou nzianmei maek e thei, mi tei rui akhang gaeng tuang maek e.
4 Nzianmei thu khaengthay e khatni nzianthay e. Nzianmei rui mamav mak e khatni daihlwn sw mak e; 5 nzianmei rui meic nzi mak e, kakhang na ning mak e, ningsumh mak e; nzianmei rui nkhuaimei ta kasing phuh mak e; 6 nzianmei rui simei khou neihla mak e, nchumhmei khou neihla e. 7 Nzianmei rui kaguayna ta khaengvlou e, kapwmna lwm e, kapwmna lwmgay e, kalam kapwmna khou khaengv saengc e. 8 Ravmundinhmei dinc taan kan ni de, thay makmei lat samei nthaekc kan ni de, thaymei ni maan kan ni de; tiki nzianmei hei thu maan dat mak khe. 9 Kalam thu aniu thaymei hei kalangv asaekc na thay e, khatni aniu ravmundinhmei hei kalangv asaekc na de; 10 tiki kapwm tei guang pwkhou, kalangv asaekc na hei thu maan kan ni de.
11 Ai alauc sw bammei douc tei, alatsav, achwn khatni alungning hei alauc tuang khwan e; ntaw thu ai gaanvdaih di the, kumna alauc douc tuang guay tei akhou nai dat mak khe. 12 Ntaw aniu howmei hei thu maengzau paek khou meic maengc tamih mina howmei tei kumh tuang de; tiki zaw lev zaw how puni. Ai ntaw howmei thu kalangv asaekc na de; tiki ata thay nthan thiakmei kumcna ai ni thay nthan thiak puni.
13 Tiki ntaw mi lwmmei, lwmgaymei khatni nzianmei hei thu nai bam puni, kumna mi guay khou hei daic liangmei thu nzianmei e.