12
Bumaengh Nthanmei Kaipat
1 Ntaw Bumaengh Nthanmei kaipat lam khou tei, chana thiu, nangniw thay mak bammei ta ai laa nii mak e. 2 Nangniw ravning makmei sw bammei douc tei, nangniw ta kalam mpeyna khou, lat sa thay makmei ravmaengc guay khou zay mbiangh tat bam khwan e twmei nangniw thay e. 3 Kumna Ravguangc Bumaengc rui zayloupui mei rui, Jisu ta siang ngam ni tu hamh e, khatni Bumaengh Nthanmei rui zaylou makna meic gaanv khat na sini, "Jisu hei Poubauhmei e," twna sa ngam ni tu hamh e twmei nangniw thay o. 4 Kaipat kaza mpeyna nai e; tiki mi guay tei tiimei Bumaengc thu akhat na de. 5 Siamruai taanv thu kaza mpeyna nai e, tiki aniu rui siamruai swmei Kaipouc thu akhat na de. 6 Siamruai tuang taanv khou hei kamei kamei rui taanc ngammei baic baicna nai e; tiki mi tei tiiloumei Racguangc thu akhat na de. 7 Bumaengh bam e twmei, mathiuc khang gay nimei thei layna, meic katana khou kathiak baic baicna ndauh pat e. 8 Bumaengh tei rui gaanv khat khou ningting lat sa khang tiilou e, khatni mi Bumaengc tei rui gaanv khat khou thaymei lat sa khang tiilou e. 9 Mi Bumaengc tei rui gaanv khat khou lwmmei tiilou e, baihmei khou tigayloumei kaipat tiilou e; 10 gaanv khat khou Ravguangc pumtan taanc ndauh khang, baihmei khou ravmundinh khang, baihmei khou kaipat tei Bumaengh Nthanmei tuang ni, baihmei tuang ni thay khang tiilou e. Gaanv khat khou thay makmei lat zaat sa khang tiilou e, khatni baihmei gaanv khat khou mi lat kabac tei dinh khang tiilou e. 11 Mi guay hei Bumaengh akhat na rui, kamei rui ningmei thei layna tiilou tuang e.
Meic Pumc tuang Latgiam
12 Meic pumc khou hei nanw mpeyna nai e; tiki mi guay tei pumh akhat na de. Khrista hei ni mi tei kumh tuang e. 13 Kalam thu aniu meic guayna ta Jihudimei ta ni, Grikmei ta ni, bangh ta ni, nyngswmei ta ni Bumaengh tei rui pumh akhat khou lup kariulou the, kumna aniu meic guayna khou, mi Bumaengc tei tiilou nchamc de.
14 Pumh akhat hei nanw akhat na rui sw mak e, mi khou tei nanw mpeyna nai e. 15 Phay rui, "Ai thu baanh hamh dinah, pumh tuang hamh e," twna sa tina, mi tei pumh tuang nanw sw taan mak e. 16 Khatni nukuanc rui, "Ai thu mik hamh dinah, pumh tuang hamh e," twna sa tina mi tei pumh tuang sw taan mak e. 17 Meic pumc hei mik khwan e thei, akumhna chu nina cho? Meic pumc hei nukuanc khwan e thei, akumhna ramh rym namh nina cho? 18 Ravguangc kamei rui ningmei thei layna meic pumc tuang nanw guay hei nai bammei hei kumcna duanc kariulou the. 19 Kapwmna hei nanw akhat na rap khwan e thei, pumh swna akumhna nai nina cho? 20 Nai bammei hei kumcna, aniu pumc khou nanw mpeyna nai e, tiki pumh akhat na de.
21 Kumna, mik rui baanh ta, "Nang akhang kage maek e," twna sa nuh mak e. Py rui ni phay ta, "Nang akhang kage maek e," twna sa nuh mak e. 22 Meic pumc khou ramh sw ngam lak ni kumhmei nanw tei ni kage nai de; 23 aniu rui gaeng thuai rap makmei de twna ningmei nanw guay tei aniu rui kadan ranvna swloumei nanw sw de; howsimei nanw ta tei ni howsi mak khang swlou e; 24 kumna how gaymei nanw khou thu mi tei kumcna swlou khang kage maek e. Kumna Ravguangc rui tichingkhiuhlou khang kage naimei nanw ta tei tichingkhiuhlou khang meic pumc nanw guay ta, mi kumna duanc kariulou e. 25 Mi kumna, meic pumc nanw guay hei khak langh tuang maekna, khat khat khang kadan karyna lungc e. 26 Meic pumc nanw akhat suc ti thei, baihmei guay tei ni lay suc e; nanw akhat ta thuanckulou ti thei, baihmei guay tei ni lay neihla e.
27 Nangniw meic guayna hei Khrista tuang pumc e, kumna gaanv khat khat hei nanw khat khat e. 28 Ravguangc rui phwamling khou reymei khou Latdiutatmei nunc lou the; kaneimei khou muhzwng nunc, kathumhmei khou latdinhmei nunc; mi tangv charynmei pumtan taanv taanhmei nunc; mi tangv tigayloumei nunc; nkhavloumei nunc; taanvpy sinmei nunc; thay makmei lat samei nunc tiilou the. 29 Kaniw guayna tei Latdiutatmei rana hamh e; muhzwng rana hamh e; latdinhmei rana hamh e. Meic guayna Ravguangc pumtan taanv taanhmei nunc rana hamh e; 30 tigaymei kaipat naimei rana hamh e; thay makmei lat samei rana hamh e; khatni mi kabac tei dinc ngammei rana hamh e. 31 Kumna nangniw gay liangmei kaipat tei kahaw o. Gay liangmei kiu ai nangniw khou dinclou puni.