11
1 Ai Khrista thei lay nzeicmei kumcna nangniw ni athei lay nzeic o.
Kalum khou Py Gummei Lam
2 Nangniw ata ningtow tanh tan bammei khatni ai rui dinclou kanmei latdyn guay tei piu bammei khang tei ai nangniw ta thuancku e. 3 Tiki Khrista hei nggaanvmei py e, nggaanvmei hei kanow py, khatni Ravguangc hei Khrista py e twmei nangniw thaymei ta kahaw e. 4 Nggaanvmei rui huayney khou hamh e thei ravmundinh khou kapy gum e thei, mi tei kapy singhmei Khrista ta chakhwang sw mak tuang e. 5 Ntumei rui huayney khou hamh e thei, ravmundinh khou kapy gum mak e thei, kapysinghmei kagaanv ta chakhwang sw mak tuang e. Kamei hei kapy guatmei lev nchamc di the. 6 Kapy gum zihmeipui tei thu kapy tiap nina e; tiki ntumei kapy tiapmei, hamh e thei kapy guatmei hei zakpui tuang e thei, kapy gum nina e. 7 Nggaanvmei thu Ravguangc ta luicna damcloumei khatni Ravguangc tuang hymdaihmei tiiloupui mei pui zaeng rui, kapy gum lak nina e. Ntumei thu nggaanvmei tuang hym laamei mei e; 8 kalam thu ntumei hei nggaanvmei khou rui damh tuang e; nggaanvmei hei ntumei khou rui damh tuang hamh e. 9 Nggaanvmei hei ntumei khang damclou tuang hamh e, tiki ntumei hei thu nggaanvmei khang damclou tuang e. 10 Mi zaeng rui, kauh baanchara guay zaeng rui, ntumei rui kagaanv ngamv bangc khou bammei lyanna kapy gum nina e. 11 Kum e tiki, aniu Poubauhmei khou bammei panty khou hei, ntumei ni nggaanvmei kazauh makna nuh mak e, nggaanvmei ni ntumei kazauh makna nuh mak e. 12 Kalam thu ntumei ta nggaanvmei khou rui damh tuang e, kumna nggaanvmei hei ntumei khou rui puanc e. Kumna ramh guayna hei Ravguangc khou rui e.
13 Ntumei rui kapy gum makna Ravguangc khou huayneymei hei kazi ny kazi mak ny, nangniw rana kakhanh o. 14 Nggaanvmei khang sam saenghmei hei zakpui tuang e, 15 tiki ntumei khang sam saenghmei hei kagunc e twmei kalwnlungh rui ni aniu khou dinclou the. Ntumei khang sam saenghmei tiiloumei hei gum khang e. 16 Tiki thowkumhmei rui mi lam khou hei agi nii di he thei, aniw rui ni, Ravguangc phwamling rui ni mi lam khou hei kariak baihmei sa dat khang maek khe.
Poubauhmei Taektw
17 Tiki kabangc khou latbamv hei sa nimei khou hei thu, ai nangniw ta thuancku khang maek e. Kalam thu nangniw guang kariumei tei gay khang hamhna, si khang di the. 18 Rey liangmei khou, nangniw guang kariu bammei khou tei lungc chamc makmei kang nai e twmei ai chu e. Mi tei nchumhmei asaekc nai khuangh the twmei lwm the. 19 (Kalingmei ta nthanna thay pat khang nangniw pang khou kalangv thu nai ni tina the.) 20 Nangniw guang kariu khou tu bammei tei Poubauhmei taektw tu tu hamh e. 21 Kalam thu nangniw tupui ganv khou khat khat ta nkhwan makna, kakhang kakhang tu the, kumna gaanv saekc thu ndaepc bam, gaanv saekc thu zangv mba bam the. 22 Nangniw tu zangvpui bamv khang nangniw kai maekna cho? Hamh e thei, Ravguangc tuang phwamling ta thouhsw makna lungcsimei nunc ta sw zak bam tu cho? Mi lam khou hei ai tabui lat sa o twna cho? Ai nangniw ta sathuanc bam kho cho? Ai nangniw ta sathuanh khang maek e!
23 Ai rui nangniw khou dinclou kanmei tei Poubauhmei rui saloupui lat e. Mi kiu thu: Poubauhmei Jisu, kata tinym nimei zingbangc tei, ntyan dwm akhat laana, 24 Ravguangc ta thuanckulouna, mi tei by bakna, sa the: "Mi hei nangniw khang tii patloumei apumc the. Ata ningtow khang mi hei tu o." 25 Mi tei kumcna, zingbangc nap tu tu tangv pwkhou, kamei rui buangh akhat laana, "Mi hei azei rui swloumei latryan thanh tuang buangc e. Nangniw mi hei zangvpui kathuic ata ningtow khang taanc o," twna sa the.
26 Mi kiu thu, nangniw mi tyan hei tupui kathuic khatni mi buangc hei zangvpui kathuic, Poubauhmei theicloumei ta tei, kamei guang mak saanv dinc ndauh bam tuang e. 27 Mi ruc khou rui, thow pwni Poubauhmei tuang tyan tei tu biuh makna tupui mei khatni katuang buangc tei zangv biuh makna zangvpui mei tei, Poubauhmei pumc khatni kazei ruc khou nkhuaipui mei e. 28 Mi zaeng rui, meic katana kalam kalam khou kathai rey lana ntyan tei tu kan diu khatni buangh tei zangv kan diu. 29 Kalam thu kamei rui Poubauhmei pumc tuang kabac tei thay makna ntyan tei tu pwkhou khatni buangh tei zangv pwkhou, kamei mi tei twmei khatni zangvmei tei rui karana karuc khou latzan phungc guang bam tuang e. 30 Mi zaeng rui, nangniw meic mpeyna nnau suc nuc bam tuang e, kumna meic gaanv saekc thu theic kan the. 31 Aniu rana aniu ta latzan sw rey e thei, aniu khou Ravguangc latzan keylou mak puni. 32 Tiki mi mbaanv ta ganc pat pwkhou, aniu kazauh mak khang, Poubauhmei rui aniu ta latzan sw e, kumna riaplou e.
33 Mi zaeng rui, achana thiu, Poubauhmei tuang taektw tu khang nangniw guang kariupui ganv khou, khat khat ta nkhwan o. 34 Nangniw guang kariumei tei rui nangniw ta latzan khou zaylou mak khang, thow pwni ndaepc e thei, kakai kakai thangc tu o. Kalam baih baihmei tei thu, ai guang pwkhou rui dinclou puni.