10
Ravmaengc Kalummei khou rui Tat Pat o
1 Achana thiu, Mousi thei lay tatmei aniu pupouc nunc tei akumh kan tu cho twmei nangniw thaymei ta ai laa nii e. Kaniw ta muangh rui gum liamlou khwan e, khatni kaniw meic guayna duipui chung khou tat kaan khwan e. 2 Kaniw guayna ta muangh lungc khou khatni duipui lungc khou Mousi mei nunc swna duiluplou khwan e. 3 Kaniw meic guayna bumaengh tuang tyan tu nchamc khwan e, 4 khatni bumaengh tuang dui zangv nchamc khwan e. Kaniw ta nduangh tat bammei bumaengh taudaic khou rui puak patmei kaniw zangv khwan e. Mi taudaic kiu Khrista hei e. 5 Kum khwan sini kaniw meic geihmei ta Ravguangc rui pian mak khwan e, kumna kaniw tei tazikramv khou theic zin theic zalou khwan e.
6 Mi guay hei kaniw kumcna simei ta kahaw mak khang ramhthay khang hylou tuang e. 7 Kaniw gaanv saekc rui ravmaengc kalum kanmei kumcna nangniw sw mak khang e. Nthanmei latrik khou hyloumei kumcna, "Meic nunc tei dungc keyna tu the khatni zangv the, kumna boulahna alaemh the." 8 Kaniw boulahmei taanv taancna zaeng neih khat na khou meic ching nchuihna kathumh theic kanmei tei kumcna aniu lungcmaanv lungcmowmei taanv taanc lak nina e. 9 Kaniw gaanv saekc rui Poubauhmei a ta nchanv tina, kaniw ta nrui rui swluai kanmei tei kumcna aniu sw lak nina e. 10 Kaniw gaanv saekc rui Poubauhmei ruc khou tanglum tanglai bam tina, sw luaimei Baanchara rui kaniw ta swluai kanmei tei kumcna aniu sw lak nina e.
11 Mi guay hei meicnunc pingthay khang lyanlou tuang e, kumna mi guay hei nkhamhmei ganv guang nimei khou lungc bammei aniu ramhthay khang hylou tuang e.
12 Mi zaeng rui, thow pwni kamei ding bam de twna ningpui mei tei bow mak khang ramhthay o. 13 Nangniw khou nchanvmei guang bammei guay tei meic baihmei khou ni guang bammei za rana de. Ravguangc thu lwmnuhmei e. Kumna nang ding ngam lak nimei tuang nchanvmei nang khou guang khang nuhlou ni tu hamh e. Nang ta nchanvpui ganv khou, khaengv ngam khang ni kamei rui nang khang pumtan tiilou puni, kumna duak nipui chaeng tiilou puni.
14 Mi zaeng rui nzianmei thiu, ravmaengc kalummei khou rui ducna bam o. 15 Ai rui nangniw ta kabah thaymei nunc de twna mi hei sa tuang e. Ai rui samei hei nangniw kakhanh o. 16 Ravguangc ta thuanckuna zangvmei maniat taektw buangc ta tei makumh o: Mi tei aniu zangvmei tei, aniu Khrista tuang zei khou lay kazauhmei tuang hamh nah cho? Aniu ntyan twmei tei aniu kapumc khou lay kazauhmei tuang hamh nah cho? 17 Aniu hei meic mpeyna bam sini, ntyan dwm tei akhat namei kumcna, aniu hei pumh akhat na di the. Kalam thu ntyan dwm akhat na khou rui aniu tu nchamc the.
18 Israelmei nunc ta tei kakhanh zauc o. Ravkhaengmei zanc tei twmei guay tei ravkhaengmei khou tei kazauh the. 19 Mi hei samei rui ravmaengc khatni mi khang tei khaengloumei ravcha tei ramh khat e twna sa tu cho? 20 Kiuc hamh e! Ravning makmei nunc rui khaengloumei tei ravsic khang e, Ravguangc khang hamh e twna ai sa tuang e. Nangniw ravsic khou kazauh bammei ta ai laa nii mak e. 21 Nangniw Poubauhmei tuang buangc ni zangv, ravsic tuang buangc ni zangv tw bam nuh mak e. Nangniw Poubauhmei kuakpaeng khou ni tu, ravsic kuakpaeng khou ni tu tw bam nuh mak e. 22 Aniu Poubauhmei lung tipuamh khang sw kho nah cho? Aniu kata ngam diw nah cho?
23 "Aniu ramh guayna sw nuh de," twna kaniw rui sa e. Mi tei ni nchumh de; tiki ramh guayna gaymei rana hamh e. "Aniu ramh guayna sw nuh de," tiki ramh guayna gaengmei rana hamh e. 24 Gaanv khat na sini kakhang kakhang na zauc lak nina de; meic baihmei khang ni zauc nina de.
25 Kaithyan khou zuanc bammei zanc guay tei akumhmei zanc cho twmei thanv makna tu o. Mi kumna thanv bam e thei, nang lungning sw-mphuam puni. 26 Kalam thu, "Mi kandic khatni mi khou naimei guay hei Poubauhmei tuang e," twna hylouna nai e.
27 Khristian hamhmei gaanv khat rui nangniw ta nap kaw pwkhou, nangniw lungning sw-mphuam mak khang tabui kumhmei zanc cho twmei thanv makna tu o. 28 Tiki mi tei, "ravkhaengmei zanc e," twna sa pu e thei, mi pu khang tei rui khatni kalungning sw-mphuam mak khang mi tei tu rio. 29 Nang lungning khang ta hamh e, mi pu tuang lungning khang tei sa tuang e.
"Meickai zaeng rui, tabui swna ai sw nuhmei tei sw mak bam nina cho? 30 Ai Ravguangc ta thuanckuna lay tu e thei, tabui swna ai thuanckuna tu bammei taektw khang tei rui ata khanc bam nina cho?" twna thowkumhmei rui sa nuh e.
31 Gay the, nangniw rui swmei guay, twmei pwni, zangvmei pwni Ravguangc hymdaih khang sw o. 32 Jihudimei nunc ta ni, Grikmei ta ni, Ravguangc tuang phwamlingmei nunc ta ni tiphaysuy mak khang sw o. 33 Ai swmei kumcna nangniw ni sw o: ai sw bammei guay hei akhang na zauh makna, meic guayna khang zaucna, kaniw ta ni gulou nuh khang twna meic guayna ta tipian khang karamc e.