9
Latdiutatmei Akhat tuang Thouc khatni Ngamv
1 Ai anyng sw nuh mak nah cho? Ai Latdiutatmei khat hamh nah cho? Ai aniu Poubauhmei Jisu ta howmeipu hamh nah cho? Nangniw hei ai rui Poubauhmei khang taancloumei taanvthai hamh nah cho? 2 Ai hei meic baihmei khang Latdiutatmei hamh bam sini, nangniw khang thu Latdiutatmei e. Ai Latdiutatmei e twmei nthanna lyanmei kiu thu, nangniw Poubauhmei khou bammei hei the.
3 Ata nsic nimei nunc khou ai mi kumna daw bam tuang e. 4 Aniw ta titu tizangv nipui thouc hamh nah cho? 5 Latdiutatmei baih baihmei, Poubauhmei chana nunc khatni Pitar kanow kanow ta nduanghna tat bammei kumncna aniw ni tat bam nuh mak nah cho? 6 Hamh e thei Barnabas aney thu aney rana aney bung khang ntaanvna tu nipui thouc de twpui tuang nai nah cho? 7 Karana katuang syan dui ntyngna rihmei sw bammei thow naina cho? luairyn lau ruaiclouna kathai rei tu makmei thow naina cho? Lauziu nruaihna kanoudui sunc zangv makmei thow naina cho?
8 Ai sa bammei hei maansei riak na hamh e. Riakdanv rui ni mi hei kumcna sa muai mak nah cho? 9 "Nap ni bammei guaichic ta kamwang karak lak nina e," twna Mousi tuang Riakdanv khou hylouna nai e. Mi khou hei Ravguangc rui sa bammei hei guaih khang na cho? 10 Mi hei aniu khang sa tu hamh nah cho? Mi hei aniu khang hylou tuang e. Lausuakmeipu ni, lautaymeipu ni kathai laa khang lwmgayna taanc bam tuang rana e. 11 Ai rui nangniw khou bumaengh tuang thw nroulou the. Kum e thei nangniw tuang mi mbaanv tuang puat aniw khang tii patmei hei ranv langv bu cho? 12 Mi hei nangniw khou rui laa nipui thouc e twna meic baihmei nunc rui sini ning e thei, aniw thu mi nunc khang tei suangc mbuna, mi kumcna ning nimei thouc hamh nah cho?
Tiki mi tei aney khang tii nina e twna sa mak e. Mi phaan tei Khrista tuang gaychamv chaeng sw khamv pw ramc e twna aney ramh lam katana khou khaengv bam tuang e. 13 Ravkai khou taanv taanhmei nunc tei kaniw tu zangv khang Ravkai khou rui laa e khatni ravchabamv khou thouhsw bammei nunc tei rui kaniw tu zangv khang ravcha khou tei rui laa e twmei nangniw thay bam tuang di the. 14 Mi tei kumcna, gaychamv dinhmei nunc tei ni kaniw ringh khang gaychamv laaloumei nunc khou laa nina e twna Poubauhmei rui salou the.
15 Tiki ai mi tei nangniw khou rui laa mak e, khatni mi tei tii khang ai ntaw hy bam tu hamh e. Mi kumna ai gaengh sw bam nimei tuang tei swmaanloumei suangc theic kanmei rui gay e. 16 Ai gaychamv dinc e twna agaengh sw bam khang maek e; kalam thu mi hei akhou tiiloumei thouc di the. Ai gaychamv hei dinh mak e thei sansimei e dav! 17 Gaychamv dinhmei taanv hei ai taanclou timc e twna taanh tuang e thei, akhang taanv phy laa biuc e; tiki mi hei ai taanh mak nuh makpui thouc tiiloumei tei ai taanh tu de. 18 Kum e thei atuang taanvphy kiu thu tabui tei cho? Gaychamv dinhmei khou ai laa biuhmei dam guay tei laa makna, kaphy kadam maekna gaychamv dinctowmei hei atuang taanvphy kiu the.
19 Ai meic gaanv khat na bangc sini hamh e, aruc khou anyng de; tiki ngammei kamv khuam guang geic nuh khang arana ata meic guayna bangc tiswlou the. 20 Jihudimei pang khou ai tat pwkhou, kaniw ta laatow nuh khang, ai Jihudimei kumcna sw the, kumna Riakdanv bangc khou bammei nunc khou tat pwkhou, kaniw ta laatow nuh khang, ai ni Riakdanv bangc khou bam mak sini, bammei kumcna sw the. 21 Mi tei kumcna ai Jentailmei pang khou tat pwkhou, kaniw ta laatow nuh khang, Jentailmei kumcna, Jihudimei tuang Riakdanv paengc khou bammei swna tat the. Ai Ravguangc tuang Riakdanv piu mak e twna hamh e; ai Khrista tuang Riakdanv bangc khou bam de. 22 Lwmmei khou suanmei pang khou, kaniw ta laatow nuh khang, ai ni kaniw kumcna suanmei sw the. Mi kumcna nuhmei thiak guay sinswna, kaniw gaanv saekc ta thu gulou khang, meic guayna khou meic guayna thiak ai lay sw tat the. 23 Gaychamv suaihiam laa nchamc khang, mi guay hei ai gaychamv khang sw tuang e.
24 Pak akhyammei khou meic mpeyna pak e; tiki kaniw pang khou gaanv khat na swan laa e twmei nangniw thay e. Mi zaeng rui nangniw ni swan laa khang pak o. 25 Talic akhyam nimei nunc tei matak khat na tuang thingnuy pykhim khang na rui sini, kaniw pumc hei di sinriapna chada bam e; tiki aniu thu maan dat lakmei swan khang e. 26 Mi zaeng rui, ai tangclou nipui ryan tei nzwanna pak bam tuang e. Diangc akhyam nipui mei rui kamei rui diangc patmei tei zi mak khang sw bammei tei kumcna sw bam tuang e. 27 Ai hei meic baihmei khou thu dinc tat laki, ai swan laatow mak pw ramc e twna arana apumc ta riapna khatni bangh tiswna bam e.