16
Lwmmei Makaemv khang Kaipat Tiimei
1 Nthanmei nunc khang nkhavlou khang syan kakhamei lam khou thu, Galatia tuang phwamling guay khou mi kumcna sw o twna ai rui sa kanmei kumcna nangniw ni sw nina the. 2 Ai guang pwkhou kakha dat bam mak khang, kamei kamei rui ntaanv guangmei thei layna neidak tuang reymei nungc nangniw meic katana reic patna lou kaduai bam nina the. 3 Ai guang pwkhou, nangniw rui kadahloumei nunc ta kaniw lam khou atuang tatdyn akhat hylouna, nangniw tuang kaipat tei Jerusalem thangc phungc tat khang ndiulou puni. 4 Ai ni tat tina gay nimei tuang nai e thei kaniw lev tat nchamc nuh de.
Paul tuang Raeng
5 Makedonia tat ruanlou lana ai nangniw daeng khou guang puni. Kalam thu ai Makedonia khou tat ruanlou khang kage nai e. 6 Ai nangniw daeng khou bam kanaklou kho ni nuh e; tingsei dak khou bamlou kho ni nuh e. Kum kan e thei ai tat dat nimei chaenglwan khou kiu nangniw ata nkhavlou khang the. 7 Ai tat ruan guangna nangniw ta matak khat na ariwlouna tat dat rap nii mak e. Poubauhmei rui nuhlou e thei ai nangniw daeng khou bam kanaklou khang lwmgay e.
8 Pentikost luai mak saanv ai Ephesia khou hei bamv kan puni. 9 Ata nuh makmei azuh nai bam sini, ai taanv taanclou khang mi khou hei kaimun laanc daicna laanclou bam e.
10 Timothi guang pu e thei nangniw rui kata laa chuyna laalou o. Kalam thu kamei ni ai kumcna Ravguangc taanv taanhmei akhat e. 11 Meic gaanv khat na sini kata thouhsw makpui tuang swlou gay mak e. Kamei kachaenglwan chuzaenghna tatna adaeng khou guang dat khang kata nkhavlou tio. Kamei chana nunc lev adaeng khou guang datmei ta ai nkhwan bam e.
12 Ntaw, chana Apollos lam khou: chana baih baihmei nunc lev kata ni nangniw daeng thangc tat o twna katiu bam tuang e; tiki kamei ntaw thu tat niimei chwn maekna bam e.a Tiki kadouchamei nai ti thei kamei ni guang puni.
Nkhamhmei Latdyn
13 Ntak nrakna bam o, lwmmei khou ding ntip bam o, bauc o, tanc o. 14 Ramh guayna nzianmei kazauhna taanc o. 15 Stephanas kai kaikhunc hei Akhaia khou Khristian sw pat reymei kai e twmei nangniw thay e. Kakai hei Ravguangc mei nunc ta siamruai swloumei kai e. Chana thiu, ai nangniw khou huaycha e, 16 mi kumhmei nunc khatni baihmei taanvruaimei nunc rui zayloumei bangc khou tei bam chuyna bam o.
17 Stephanas, Phortunata khatni Akhaikas guangmei khou hei ai mpeyna neihla e; kalam thu nangniw guang makna akhang ntangh makna bammei tei kaniw rui tiguang tangclou the, 18 khatni kaniw rui nangniw ta tineihlaloumei tei kumcna ata ni tineihlalou the. Mi kumhmei nunc ta hei nangniw thaylou o.
19 Asia tuang phwamling guay rui nangniw khang dwangay kady e. Akuila lev Priskilla khatni kakai khou kariu bammei phwamling rui nangniw khang Poubauhmei khou dwangay kady e. 20 Mi khou bammei chana guay rui nangniw khang dwangay kady e. Nangniw khat khat ta chakhwang swna dwangay kady o.
21 Mi hei abaanc kahak rui hypui tuang e. Paul rui dwangay kady e.
22 Poubauhmei ta nzian makpui mei khou tei syang keylou kan diu! Maranatha—He Poubauhmei, guanglou tho!
23 Poubauhmei Jisu zauzian nangniw khou naimei sw diu.
24 Khrista Jisu khou atuang nzianmei nangniw khou naimei sw diu.