4
Khrista tuang Latdiutatmei
1 Kumna nangniw rui aniw ta Ravguangc tuang ntheihloumei tei dinc ndauh khang nsinloumei Khrista latdiumei Ravguangc tuang tamthiwmei nunc e twna laa nina e. 2 Mi kumhmei tamthiwmei kiu thu kakaipouc khang lwmnuhmei mei sw nina e. 3 Nangniw rui pwni, kandih tuang latzan rui pwni, ata latzan sw nimei ta akhang ramh khat sini hamh e. Arana ni ata mi kumna latzan sw mak e. 4 Ai thaymei thei layna thu, ai nkhuai mak e; tiki mi tei rui akhuay maek e tw khang hamh e. Ata latzan sw nimei thu Poubauhmei de. 5 Mi zaeng rui, kaganv tangh mak khou nangniw meickai ta latzan sw riu; nkhamhmei latzan thu Poubauhmei guang pwkhou rui sw puni. Mi nungc kiu zinghmei khou nkamhlou bammei guay gaanhmei khou lav pat puni, khatni meicnunc tuang lungning khou nkamhlou bammei guay ndauh pat puni. Ravguangc rui pianlou biuhmei tuang nai e thei, mi nungc kiu rui thay puni.
6 Achana thiu, "Hylou bammei khou tei rui twan riu," twna samei kabac hei nangniw thay khang, nangniw khang Apollos lev Paul ata zay daancna samei tuang e. Mi kiu thu, nangniw gaanv khat ta ning nthuk, gaanv khat ta lou key twna nangniw gaengh sw bam mak khang e. 7 Thow rui nang ta meic baihmei khang suangc kauhmei e twna sa pwna cho? Nang khou nai bammei guay tei Ravguangc rui tiilou tu hamh nah cho? Kum e thei, nang khou nai bammei tei Ravguangc kaipat hamh kumcna tabui swna nang gaengh sw bam tu cho?
8 Nangniw bung padik the! Nangniw lungcgay the! Aniw ta ganclouna nangniw rana guangh sw the! Nangniw guangh sw changh e thei gay ni tuang e, aniw ni nangniw thei guang lay sw khang! 9 Ravguangc rui Latdiutatmei nunc aniw khou tiiloumei hei, charuangc laa khou zay patna kandih mei khatni kauh baanchara nunc hu khou swluai khang, thei liang khou lou bammei nunc kumc the. 10 Khrista khang aniw hei mpangmei nunc the; tiki nangniw thu Khrista khou ningtyngmei nunc e! Aniw thu swan e; tiki nangniw thu tanc e! Aniw ta thu malalou the; tiki nangniw ta thu chakhwang swlou the! 11 Ntaw kahak hei aniw ndaepc tarina lungc bam e; aniw khang pheybaan maek e; meicnunc rui bai e; aniw kai maek e; 12 aniw baanc rui ryanrana taancna lungc e. Aniw ta sianglou pwkhou, aniw suaihiamlou e; aniw ta rai pwkhou khaengv e; 13 aniw ruc khou latsic salou pwkhou, aniw rui latgay dawlou e. Ntaw aniw hei meicnunc rui ganc patloumei puat kumc the.
14 Ai rui nangniw ta sa bammei hei rui nangniw ta sw zak lou me twna hamh e; tiki ai nzianmei anac kahak ta kumcna luh bam tuang e. 15 Khrista khou nangniw ta nchamlou nimei meic ching ching nai bam nuh e; tiki nangniw pu thu akhat na de. Kalam thu nangniw khou gaychamv phungc guangmei ai hei Khrista khou nangniw pu the. 16 Mi zaeng rui, nangniw athei lay nzeic khang huaycha e. 17 Mi khang ai rui nzianmei khatni lwmnuhmei, Khrista khou anac mpouh swmei Timothi ta ai nangniw khou ndiu guang tuang e. Ai Khrista khou lungc bammei panty lwnlung, twmei thu ai rui phwamling kathuic khou nchamlou tat bammei latdyn guay tei kamei rui nangniw khou tiningtowlou dat puni.
18 Ai nangniw daeng khou guang ni tu hamh e twna ningna nangniw gaanv saekc thu ramh sak makna bam e. 19 Tiki Poubauhmei rui chwnmei e thei, ai asaanh mak khou nangniw daeng khou guang puni. Kumna mi kumna ramh sak makna sa bammei nunc ta kiuc, kaniw khou tabui pumtan naina sa bam tu cho twmei ai thay puni. 20 Kalam thu Ravguangc Guangcdic hei thu lat tuang hamh e, pumtan tuang de. 21 Nangniw tabui tei kahaw bu cho? Ai builwang sinna guang o ni, nzianna khatni lungh zaenghna guang o cho?