5
Phwamling khou Lungcmaanvmei Naimei
1 Nangniw pang khou lungcmaanvmei, ravning makmei nunc rui nganv taan numei—kapu now ta zip nduangh bammei nai e twmei ai chu e. 2 Nangniw lungh kabiuna, mi kumhpui mei ta tei nangniw pang khou rui ganc pat nimei phaan, nangniw gaengh sw bam tu cho? 3-4 Apumc nangniw khou rui ducna bam sini, bumaengh khou ai nangniw pang khou bam e; ai nangniw pang khou bam kumcna, mi kumhmei si kanmei taanv taanhpui mei ruc khou tei aniu Poubauhmei Jisu zanc khou atuang latzan keylou kan the. Nangniw guang kariupui ganv khou, abumaengc ni guang kazauh the; aniu khou nai bammei Poubauhmei Jisu tuang pumtan rui, 5 mi pu ta tei, Poubauhmei Tingmik nungc kabumaengc na thu gulou khang, kapumc ta swmaan khang Seitan baanc khou tii patlou nina e.
6 Nangniw mi kumna gaengh sw bammei hei nchumh mak e! Khay katitna rui ntyan dwm kapwm tei tipuang thau e twmei nangniw thay mak nah cho? 7 Nangniw hei khay kazauh makmei nthanmei tyan dwm kathanc sw khang, khay raan tei laa ganc o. Kalingna nangniw hei khay kazauh makmei tyan the, kalam thu Kaanpatpui Ngai tuang lauziu nac Khrista ta khaenglou kan the. 8 Kum thena, karaeng zauczihmei khatni simei khay kazauh makmei, lungc nthanmei khatni nchumhmei rui nthanmei tyan swna, Kaanpatpui Ngai nngay di kho.
9 Ntu nggaanv khou mphuammei nunc ta duang sw riu twna atuang tatdyn khou tei nangniw khou hy kan the. 10 Ai rui sa bammei hei thu, lungcmaanv lungcmow bammei, agaemv bammei, kaihouc laugut bammei, ravmaengc kalum bammei, rav baihmei ta kalummei mbaanv ta tei hamh e. Kum e thei nangniw mi mbaanv khou rui tat pat nina di the. 11 Ai rui samei kiu thu, lwmmei zanc phungcna lungcmaanv lungcmow bammei, agaemv bammei, ravmaengc kalum bammei, latsic latrouc sa bammei, zouh mba bammei, kaihouc bammei—mi kumhmei nunc ta hei kariu karuai bam lak nina e twpui tuang e. Mi kumhmei nunc ta hei tu nchamc zangv nchamcna ni bam lak nina e twpui tuang e.
12 Kalam thu phwamling paengc thangc bammei nunc ta thu latzan sw bam khang athouc hamh e. Phwamling khou bammei nunc ta tei thu nangniw latzan sw nina hamh nah cho? 13 Kapaengc thangc bammei nunc ta thu Ravguangc rui latzan sw kan ni de. "Meic gay makmei ta tei thu nangniw pang khou rui laa ganc o."