3
Ravguangc tuang Siamruaimei nunc
1 Mi zaeng rui, achana thiu, ai rui nangniw khou Bumaengh mei nunc khou samei kumcna sa ngam mak khe; zanhpumc tuang mei, Khrista khou ngasatna sw bammei nunc khou samei kumcna sa tuang e. 2 Ai nangniw khang noucdui na tii the, naptanh tii mak khe. Kalam thu nangniw laalou ngam mak khe. Ntaw nganv nangniw naptanh tu ngam mak he. 3 Kalam thu nangniw zanhpumc tuang mei sw bam di he. Nangniw khat khat ta mamavmei khatni agay agimei nai bammei hei, nangniw zanhpumc tuang mei swna zanhpumc mei kumcna lungc bam tina hamh nah cho? 4 Nangniw pang khou gaanv khat rui, "Ai thu Paul mei de," baihmei gaanv khat rui, "Ai thu Apollos mei de," twna sa bammei hei mbaanv mei swmei lat hamh nah cho? 5 Mi kumc bam khang, Apollos kiu thowna cho? Paul kiu thowna cho? Aney thu nangniw ta Khrista khou lwm khang nkhavloumei Ravguangc tuang siamruaimei de. Aney thu kakhou kakhou Poubauhmei rui tiiloumei taanv tei taanc bam tuang na de. 6 Ai rui lingclou the, Apollos rui kabangc tei dui zwanlou the, tiki tidaic thauloumei thu Ravguangc rui de. 7 Lingcloumeipu khatni dui zwanloumeipu tei thu ramh khat na sini hamh e; tiki nthukmei thu tidaic thauloumeipu Ravguangc tei de. 8 Lingcloumeipu tei lev dui zwanloumeipu tei nchamc de; kataanv kataanv thei layna, kaney khang Ravguangc rui zaengphy tii puni. 9 Aney hei Ravguangc tuang laupuk khou taanv taanc nchamcmei nei e, nangniw hei Ravguangc tuang laupuk e.
Nangniw hei Ravguangc kai ni the. 10 Ravguangc rui akhou tiiloumei kaipat sinswna, taanv thaymei taanvpy akhat kumcna, ai rui kaibam kasiamh thaulou the, kumna meic baihmei gaanv khat rui mi ruc khou tei taanc nsuk thau the. Mi kai tei taanc thau nimei kathuic tei kadanna taanc nina e. 11 Kalam thu duanclou kanmei kaibam, Jisu Khrista tei hamhna, baihmei kaibam duanc dat nuh mak khe. 12 Mi kaibam khou tei thowkumhmei rui kachaekc rui, daandi rui, kamanv kunghmei tauc rui; baihmei gaanv saekc rui thing rui, nngeic rui, napgou rui swlou bam nuh e. 13 Tiki mi taanv tei Khrista tuang Tingmik nungc ndauh pwkhou kiu, kataanv kataanv tei thay puni. Kalam thu tabui rui swlou tu cho twmei mai rui nchanv puni. 14 Mi kaibam ruc khou swloumei tei mai rui nchanv pwkhou, nai bam e thei, kai swmeipu tei kataanvphy laa puni, 15 tiki thowkumhmei tuang taanv tei kaw ngam kan e thei, kakhang maan the; tiki kameipouc ta thu mai khou rui duak pat kumcna gulou puni.
16 Nangniw hei Ravguangc ravkai e; nangniw khou Ravguangc Bumaengc bam e twmei nangniw thay mak nah cho? 17 Ravguangc ravkai ta swkasicpui mei ta tei thu, Ravguangc rui kata ni swmaan puni. Ravguangc ravkai thu nthanmei e, kumna mi ravkai kiu nangniw hei the.
18 Nangniw rana nangniw ta guat rio. Thowkumhmei rui mi mbaanv mikzaw khou kamei hei ningtyngmei e twna ning e thei, kamei ningtyng changhmei sw khang, kamei mpangmei sw kan diu. 19 Kalam thu mi mbaanv rui ningting e twna chakmei tei Ravguangc mikzaw khou thu mpangmei de. "Ravguangc rui ningtyngmei ta kaniw tuang takh khou timanc e," twna hylouna nai e. 20 "Ningtyngmei nunc tuang latkhanv guay tei nsa tuang de twmei Poubauhmei thay e," twna ni hylouna nai e. 21 Mi zaeng rui, nangniw meicnunc lam khou gaengh sw bam dat ri tho. Ramh guayna nangniw khang de: 22 Paul ni, Apollos ni, Kephas ni, mi mbaanv ni, ringhmei ni, theihmei ni, ntaw ni, guang nimei ni—mi guay hei nangniw khang de, 23 kumna nangniw hei Khrista tuang e, Khrista hei Ravguangc tuang e.