2
Theihchouc khou Theicloumei Khrista Chamv
1 Achana thiu, ai nangniw khou Ravguangc lat a dinc ndauh khang guang khou tei ai lat nthuk thukmei sana ningting tuang lat sa kan mak e. 2 Kalam thu ai nangniw daeng khou bam khou tei, Jisu Khrista lam, nkunna kamei theihchouc khou theicloumei lam na hamhna baihmei lam guay thu thay makmei sw kan ni the twna alung dinglou the. 3 Ai nangniw daeng khou bam khou tei, ai suanmei swna, ping kadunhna bam tuang e; 4 kumna ai rui sa bammei khatni dinc ndauh bammei lat guay tei maansei tuang ningting rui munthyam gayna sa kan mak e; tiki Ravguangc Bumaengc pumtan nchinlou kan e. 5 Mi hei rui, nangniw ramlum hei maansei ningting khou hamhna, Ravguangc pumtan khou ngangvlou khang e.
Ravguangc tuang Ningting
6 Tiki lwmmei khou alauc hamhmei nunc khou thu aniw ningting lat ni sa e; tiki mi ningting hei mbaanv tuang hamh e, hamh e thei maan kan nimei mi mbaanv tuang dihsinpouc nunc tuang ningting hamh e. 7 Aniw rui sa bammei ningting hei thu mbaanv damclou mak khou rui aniu ta tihymdaiclou khang chamdaanvloumei, rylou bammei, meic thay makmei, Ravguangc tuang ningting e. 8 Mi ningting hei mi mbaanv tuang dihsinpouc gaanv khat na sini thay mak e. Kaniw thay khwan e thei, hymdaihmei Poubauhmei ta kaniw chouhthaengc lak ni tuang e. 9 Kum e tiki,
"Mik rui how zat kan makmei,
nu rui chu zat kan makmei,
lungning rui ni ning tangc kan makmei,
Ravguangc rui kata nzianmei nunc khang
chamdaanvlou the,"
twna hylouna nai e. 10 Tiki b Ravguangc rui mi tei katuang Bumaengc paan rui aniu khou ndauhlou the. Bumaengh tei rui ramh guayna phu e, kumna Ravguangc tuang kasyng thangc naimei ta nganv thay tangc e. 11 Maansei akhat lungning guay thaymei thu kakhou naimei katuang bumaengc na tei de, mi tei kumcna, Ravguangc lungning guay thaymei thu Ravguangc Bumaengc na tei de. 12 Aniu laatowmei hei mbaanv tuang bumaengc hamh e, Ravguangc rui aniu khang tiiloumei kaipat guay tei kabah thay khang, Ravguangc rui ndiuloumei Bumaengc tei de.
13 Kumna, aniw maansei ningting rui dincloumei lat tei sa mak e, tiki Bumaengh naimei nunc khou c bumaengh tuang lam guay tei, Bumaengh rui dincloumei lat tei rui dinclou tuang e. 14 Kakhou Bumaengh maekpui mei tei thu Ravguangc Bumaengc tuang kaipat guay tei laa ngam mak e; kamei mi guay tei kabah thay mak e; mi guay tei kakhang thu mpangmei tuang de. Kalam thu Bumaengh tuang kabac tei thu kakhou Bumaengh naipui mei na rui thay ngam nina de. 15 Kakhou Bumaengh naimei mei tei thu ramh guayna si gay latzan sw ngam e; tiki maansei rui thu kata latzan sw ngam mak e.
16 "Thow rui Poubauhmei tuang
lungning thayna cho?
Thow rui kata ncham ngamna cho?"
twna hylouna nai e.
Tiki aniu khou thu Khrista tuang lungning nai the.