Korinthmei
KHOU Paul RUI HYMEI REYMEI TATDYN
1
1 Ravguangc rui ningmei thei layna Khrista Jisu tuang Latdiutatmei khang kawloumei Paul khatni chana Sosthenis rui—
2 Korinth kaidai khou naimei Ravguangc tuang phwamling khou, kabamv kathuic khou bammei aniu kaipouc Jisu Khrista zanc saanhmei guay lev Ravguangc mei sw nchamc khang, Khrista Jisu khou bammei paan rui sw nthanloumei nunc khou:
3 Aniu Pu Ravguangc khatni Poubauhmei Jisu Khrista khou rui zauzian khatni chuzaenghmei nangniw khou tiilou pw diu.
Khrista khou Bammei Suaihiam
4 Khrista Jisu khou bammei paan rui nangniw khou tiilou bammei Ravguangc zauzian khang tei ai Ravguangc ta thuancku bam e. 5 Kalam thu Khrista khou bammei paan rui nangniw kalam kathuic khou latsav khou ni, thaymei khou ni mbu thau the. 6 Khrista lam khou nchamloumei tei nangniw khou ntipna kamaan tizangclou the. 7 Twmei thu, aniu Kaipouc Jisu Khrista guang nimei ta chaengphaengcna nkhwan bam khou, nangniw Bumaengh kaipat laatow ntangh the. 8 Jisu Khrista tingmik nungc kiu, nangniw khuay maekmei sw khang, nangniw katwan nganv ntipna bam khang Ravguangc rui nkhavlou puni. 9 Kanac Mpouh, aniu Kaipouc Jisu Khrista lev lungc nchamc khang nangniw ta kawloumei Racguangc hei lwmnuhmei e.
Phwamling khou Chwnchamh Makmei
10 Chana thiu, aniu Kaipouc Khrista Jisu zanc khou ai nangniw khou huaycha e: nangniw meic guayna lat nchamc o, nangniw pang khou kalangv pat rio; nangniw lungc chamc chwn chamcna lungc o. 11 Achana thiu, nangniw pang khou agay agimei nai e twna Khloi kaikhuncmei gaanv saekc rui akhou raclou e. 12 Ai rui samei kiu thu: Nangniw gaanv khat rui, "Ai thu Paul mei de," baihmei rui, "Ai thu Apollos mei de," baihmei rui, "Ai thu Kephas mei de," hamh e thei baihmei rui, "Ai thu Khrista mei de," twna sa e twpui tuang e. 13 Khrista ta kalangv tipat the nah cho? Nangniw khang chouhthaengcloumei tei Paul cho? Nangniw ta Paul zanc khou duiluplou bw nah cho?
14 Krispos lev Gaias ta na hamhna nangniw gaanv khat na ta sini ai duiluplou kan mak e; mi khang tei ai Ravguangc ta thuancku e. 15 Kum mak e thei, azanc khou duiluplou e twna nangniw gaanv saekc rui sa nuh tuang e. 16 Ai rui Stephanas kai kaikhunc ta ni duiluplou kan e; baihmei ta thu ai swlou kanmei ta thay mak e. 17 Khrista rui ata ndiuloumei thu duilup khang hamh e; Gaychamv dinh khang de; maansei tuang ningting latsav rui Khrista tuang theihchouc pumtan swmaan makna dinh khang e.
Ravguangc Ningting
18 Kalam thu theihchouc tuang lat hei maan bammei nunc khang thu kabah maekpui lat e; tiki Ravguangc rui gulou bammei aniu khang thu mi hei Ravguangc pumtan e. 19 "Ningtyngmei nunc tuang ningting ai rui swmaanlou puni, ntakmei nunc tuang takh tei nsa tiswlou puni," twna hylouna nai e. 20 Kum e thei, ningtyngmei tabui thangc thah? Riakdanv tadin tabui thangc thah? Mi kandic tuang latsathaymei nunc tabui thangc thah? Mi mbaanv tuang ningting thu mpangmei de twmei Ravguangc rui lyanlou the. 21 Kalam thu Ravguangc rui katuang ningting khou, mbaanv tuang ningting rui Ravguangc kata thay khang swlou mak e. Mi phaan tei, "mpangmei lat" de twna sa bammei aniw rui dinc bammei latchamv paan hei rui, lwmmei guay ta gulou khang Ravguangc rui ningmei e. 22 Lwm khang Jihudimei rui sw nchinmei taanv khou ngangvlou e, Grikmei rui ningting khou ngangvlou e. 23 Tiki aniw thu, Jihudimei nunc khang phaysuy tauc khatni Jentailmei khang mpangmei lat swmei chouhthaengc kanmei Khrista chamv dinc e. 24 Tiki Ravguangc rui kawloumei nunc khang thu, Jihudimei khang ni, Grikmei nunc khang ni Khrista hei Ravguangc pumtan khatni Ravguangc tuang ningting e. 25 Kalam thu Ravguangc tuang mpangmei tei maansei tuang ningtyngmei suangc ningtyng e, khatni Ravguangc tuang suanmei tei maansei tuang pumtan suangc tanc e.
26 Achana thiu, nangniw ta Ravguangc rui kawmei hei zauc o. Mbaanv mikzaw khou, nangniw pang khou, ningtyngmei azuh mak e, saengc daihmei azuh mak e, lungcgaymei azuh mak e. 27 Tiki ningtyngmei nunc ta tizak khang Ravguangc rui mbaanv mikzaw khou mpangmei nunc ta kapah the, khatni taanhmei nunc ta tizak khang mbaanv mikzaw khou suanmei nunc ta kapah the. 28 Mbaanv rui nthukmei e twna ning bammei ta tei timaan khang, mbaanv rui malana ramh sak makna, ramh khat sini hamhmei khang ninglou bammei nunc ta Ravguangc rui kapah the. 29 Mi hei gaanv khat na sini Ravguangc hu khou gaengh sw mak khang e. 30 Tiki Ravguangc rui nangniw ta Khrista Jisu khou tikariulou the, kumna Khrista hei aniu khang ningting the. Kapaan rui aniu ta ravchaptatmei tiswlou the, nthanmei tiswlou the, khatni aniu ta thuaklou the. 31 Mi zaeng rui, hylou bammei kumcna, "Thow pwni gaengh sw nii e thei, Poubauhmei rui taanclou kanmei khang tei rui gaengh sw nina e."