15
1 Tanhmei aniu rui suanmei nunc tuang puatcrith tei phungc nkhavlou nina e. Aniu rui aniu rana ta tipian khang sw lak nina e. 2 Aniu thu aniu chana nunc khang gay khang kakhanhna, kaniw ta kasiamh thau khang kaniw ta tipian khang karamc nina e. 3 "Nang ta sakasicna samei guay tei akhou keylou the," twna hyloumei kumcna, Khrista thu karana kata tipian khang ning mak e. 4 Nthanmei Latrik khou hylou bammei guay hei aniu ta nchamlou khang hylou tuang e, kumna mi paan tei rui aniu khaengvthaymei khatni katiuloumei laatowna lwmgaymei nai khang e. 5 Khaengvthaymei khatni katiuloumei tiiloumei Ravguangc rui nangniw khou, Khrista Jisu thei lay nzeicna khat lev khat lungc chamcna lungc bam khang, tiilou pw diu. 6 Kumna nangniw meic guayna kariuna khwan khat na swna aniu kaipouc Jisu Khrista Pu Ravguangc hym thuanc bam khang e.
Jentailmei khang Gaychamv
7 Kum thena, Khrista rui nangniw ta laaloumei kumcna, Ravguangc ta tihymdaih khang, nangniw khat khat ta laalou o. 8 Ravguangc hei thu nchumhmei e, kaniw pupouc nunc nrianhloumei guay tei tiguang tangclou e twmei lyanna Khrista hei Jihudimei khang siamruaimei swna lungclou the twna ai rui sa tuang e. 9 Mi hei Jentailmei nunc rui ni Ravguangc ta kazauzian khang thuancku khang e. Mi kumna hylouna nai e:
"Kumna ai nang ta Jentailmei
pang khou thuanc puni;
ai nang ta thuancna swan puni."
10 Mi hei sa dat e:
"He Jentailmei nunc, Ravguangc mei nunc lev neihla nchamc o!"
11 Mi kumna ni sa dat e:
"Poubauhmei ta thuanc o,
Jentailmei nunc,
meic guayna kata thuanc o!"
12 Isaia rui ni sa e:
"Jessi kikta lungc guang puni;
kamei Jentailmei nunc ta sin khang guang puni,
kaniw kakhou lwmgay bam puni."
13 Bumaengh Nthanmei pumtan paan rui nangniw tuang lwmgaymei tei mbu thau khang, lwmgaymei tiiloumei Ravguangc rui, nangniw khou lwmmei paan rui, neihlamei khatni chuzaenghmei nangniw khou tipadiklou diu.
Paul rui Baucna Hymei Lam
14 Chana thiu, nangniw khou gaymei khatni thaymei mpeyna nai e, kumna nangniw khat khat ta nchamlou ngam the twmei ai nthanna thay e. 15 Tiki mi tatdyn khou hei, ai rui nangniw ta tiningtowlou dat kanmei latbamv asaekc khou tei, ai baucna sa kan the. Ai baucna sa ngammei hei Ravguangc zauzian rui, 16 Jentailmei nunc khang Khrista Jisu tuang siamruaimei sw khang akhou tiiloumei zauzian paan rui e. Jentailmei nunc ta Ravguangc rui laalou nuhmei puatkat swna Bumaengh Nthanmei paan rui kakhou katlou khang, ai Ravguangc tuang gaychamv dinhmei hei amuh khat kumcna sw bam e. 17 Mi zaeng rui, ai rui Ravguangc khang taanhmei taanv khang hei, ai Khrista khou gaengh sw bam khang e. 18 Jentailmei nunc ta Ravguangc lat piumei khou zaylou khang Khrista rui ata sinswloumei lam hei ai baucna sa puni. Kamei rui mi tei lat khatni taanv paan rui taanclou e— 19 charynmei khatni sw nchinmei taanv khatni Bumaengh Nthanmei pumtan rui e. Kumna, ai Jerusalem khou rui thauna Illurikum nganv tatlouna Khrista tuang gaychamv dinc liklou kan the. 20 Ai rui kahawmei thu, meic gaanv khat rui thwanloumei kaiphwn khou taanhmei hamhna, Khrista ta thay makmei bamv bamv khou Gaychamv hei dinc tat khang twmei hei e. 21 Mi hei,
"Kalam khou dinclou makmei nunc
tei how puni,
chu makmei nunc tei kabah
thay puni,"
twna hylou bammei tei the.
Paul Rom Thangc Tat Nimei Raeng
22 Mi zaeng rui, ai nangniw daeng khou guang khang ning bam sini ata khamv bammei tuang e. 23 Tiki ntaw thu mi ramv gei khou hei ai taanc nimei dwan luai the, kumna ai tingkwm mpeyna nangniw daeng khou guanglou niina bammei tei, 24 ntaw thu guang tangc pungh the twmei ai lwm the. Ai Spain kandic thangc tat nimei chaenglwan khou nangniw daeng khou guang khanvlou nii e, kumna ai nangniw daeng khou bam kanaklouna mi thangc tei tat pwkhou nangniw rui ata nkhavlou pw khang lwmgay e. 25 Tiki aseic luan thu, Jerusalem khou bammei Ravguangc meicnunc ta nkhavlou khang ai Jerusalem thangc tat kan ni he. 1Kor 16.1-4 26 Kalam thu Makedonia khatni Akhaia kandic tuang phwamling guay rui Jerusalem khou bammei lungc ryanramei, Ravguangc mei nunc khang nzianmei kaipat tii khang dinglou tuang nai the. 27 Mi tei kaniw taanclou niina taanclou tuang e. Kaling sa e thei, kaniw mi tei swlou nimei thouc the. Jihudimei nunc rui Jentailmei khang bumaengh tuang suaihiam nzanhlou e thei, Jentailmei guay rui ni kaniw tuang mbaanv puat tuang suaihiam rui Jihudimei nunc khang ni nkhavlou nipui thouc e. 28 Ai mi guay tei kaniw khang tiilou tangna, mi taanv tei luailou kan e thei, Spain kandih thangc tat puni, kumna ai nangniw daeng khou guang khanvlou puni. 29 Ai nangniw khou guang pwkhou, Khrista suaihiam padikna guang puni twmei ai thay e.
30 Chana thiu, aniu Poubauhmei Jisu Khrista paan rui khatni Bumaengh rui tiiloumei nzianmei paan rui, ai rui nangniw khou huaycha e: nangniw ni akhang Ravguangc khou ranvna huayneylou kazauhlou o. 31 Judia khou bammei lwmmei ramhmei nunc khou rui ata gulou khang khatni Jerusalem khou atuang taanv ta lwmmei nunc rui laalou khang huayneylou o. 32 Kumna Ravguangc rui ningmei e thei, ai neihlamei padikna nangniw daeng khou guang khang, khatni nangniw rui achaengc tiringclou khang e. 33 Aniu khang chuzaenghmei tiiloumei Ravguangc rui nangniw guayna ta bam nduanghlou pw diu o. Amen