14
Nang Chana ta Latzan Sw Rio
1 Lwmmei khou suanmei mei ta tei laalou o; kamei rui sw bammei ta tei nsic nangh e. 2 Meic gaanv saekc rui ramh guayna tu nuh de twna lwm e; tiki karam lwm suanmeipu rui gannuy paannu na tu e. 3 Khav zanh thiangh makmeipu tei rui thianghmeipu ta lou key mak kan diu, khatni gannuy paannu na tumeipu tei rui khav zanh tumeipu ta tei latzan sw mak kan diu; kalam thu Ravguangc rui kata ni laalou the. 4 Meickai bangc ta latzan sw khang nang thouc hamh e. Kataanv tei laalou nuhmei, laalou nuh makmei twmei hei kakaipouc nyng de. Laalou puni de, kalam thu Poubauhmei rui kata laalou ngam de.
5 Meic gaanv saekc rui tingmik akhat ta baihmei ta suangc nthukmei swna kakhanh e, khatni meic gaanv saekc rui tingmik guayna nchamc de twna kakhanh e. Meic katana katuang katuang lungning khou kakhanh chuyna kakhanh o. 6 Thow pwni tingmik akhat ta nthukna ningpui mei tei Poubauhmei ta chakhwang swna swpui tuang e; ramh katana tupui mei tei ni Poubauhmei ta chakhwang swna tu tuang e, kalam thu kamei mi taektw khang tei Ravguangc ta thuancku e. Thowkumhmei thiangc bammei tei ni, Ravguangc ta chakhwang swna thiangc bam tuang e, kumna kamei Ravguangc ta thuancku e. 7 Aniu gaanv khat na sini kakhang khang na ringh mak e, kakhang khang na ni theih mak e. 8 Aniu ringc e thei, aniu ringc bammei hei Poubauhmei khang e; aniu theic e thei, aniu theihmei hei Poubauhmei khang e. Kumna aniu hei ringc pwni, theic pwni Poubauhmei khang e. 9 Kalam thu Khrista hei theic kanmei nunc tuang ni, ringc bammei nunc tuang ni, kaipouc sw khang kamei theiclouna ringcthau dat kan the. 10 Kum e thei, tabui swna nang chana ta nang latzan sw bam tu cho? Tabui swna nang chana ta lou key bam tu cho? Aniu meic guayna Ravguangc tuang latzan bamvpaeng hu khou ding puni. 11 Kalam thu mi kumna hylou e:
"Ai hei ringhmei Racguangc e
twmei suai makmei kumcna,
meic katana ahu khou
khuksun key puni
khatni ai hei Ravguangc e
twna meic katana rui sa puni,
twna Poubauhmei rui sa e."
12 Mi zaeng rui, meic katana katuang katuang taanv chakh Ravguangc khou tii puni.
Nang Chana ta Swbow khang Sw Rio
13 Mi zaeng rui, aniu khat khat ta latzan sw taan di kho, kumna aniu chana khat ta tiphaysuy nimei tuang hamh e thei tibow nimei tuang ramh khat sini taanh mak khang lungning ding kho. 14 Poubauhmei Jisu khou bammei akhat swna, taektw khou thu nthan makmei puat maek e twmei ai nthanna thay e. Tiki thowkumhmei rui taektw asaekc ta nthan makmei e twna lwm e thei, mi tei kakhang nthan makmei the. 15 Nang taektw rui nang rui nang chana khat ta tikabiulou e thei, mi tei nzianmei taanv hamh e. Nang twmei taektw rui, kakhang rui Khrista theicloumei gaanv khat ta swmaanlou rio! 16 Nangniw rui gaymei de twmei puat ta tei meicnunc rui sina sa mak khang sw o. 17 Kalam thu Ravguangc Guangcdic hei thu tu zangvmei tuang latbamv hamh e; tiki Bumaengh Nthanmei rui tiimei ravchaptatmei, chuzaenghmei, khatni neihlamei latbamv de. 18 Mi hei kumcna, Khrista siamruai swpui mei ta tei Ravguangc rui pianlou e khatni maansei rui lwanlou e.
19 Mi kumna, chuzaenghmei phungc guang nimei tuang khatni khat khat ta kasiamh thau nimei tuang tei sw khang aniu karamc nina e.a 20 Ravguangc taanv ta taektw zaeng rui swmaan dat ri kho. Taektw guayna nthan de, tiki meic gaanv khat ta tiphaysuy nimei taektw twmei thu nkhuai e. 21 Zanc tu makmei, zouh zangv makmei, tabui pwni nang chana ta tiphaysuy nimei tuang taanh makmei hei rui nchumh e. 22 Mi lam khou hei nang rui lwmmei tei, Ravguangc nang ney kak khou na lou bam o. Kamei rui nchumh de twna ningna taanhmei tei nkhuai e twna lungning khou thay makpui mei tei sangaymei e! 23 Tiki kamei tumei tei lwmsina tu e thei, mi tei nkhuai e; kalam thu kamei lwmmei thei layna taanh mak khe. Lwmmei thei layna taanh makmei taanv guay paapc e.