11
Israelmei ruc khou Ravguangc Latzan
1 Kum e thei Ravguangc rui kamei nunc ta ganc pat thena cho? Ganh mak e! Ai kahak hei Israelmei e, Abraham kikta e, Benjamin kaikhwangmei e. 2 Ravguangc kamei rui kapahloumei nunc ta ganc pat mak e. Elija rui Ravguangc khou Israelmei ruc khou sa kanmei latbamv nthanmei latrik khou hylou bammei tei nangniw thay e. Mi khou tei sa e: 3 "Poubauhmei kaniw rui nang tuang muczwng nunc ta swluai kan the khatni nang tuang ravchabamv guay sw ra kan the, kumna nsaekcloumei kiu ai na di the. Kaniw rui ata ni swluai khang sw bam the." 4 Khoutei, "Baal ta kalum makmei meic ching chanei ai rui akhang lou bam de," twna Ravguangc rui sa kan makna cho? 5 Mi tei kumcna, ntaw ni Ravguangc rui kazauzian paan rui kapahloumei gaanv saekc nai de. 6 Kamei rui kaniw ta kadahmei hei kaniw taanv paan rui hamhna kazauzian paan rui de. Taanv paan rui khwan e thei kazauzian tei zauzian ling hamh ni tuang e.
7 Kum e thei akumh thah? Israelmei nunc tei kaniw phu bammei tei laatow kan mak khe. Mi tei kamei rui kapahloumei mei kang katitna rui laatow kan the; baihmei guay ta tei thu kaniw lungc titanc kan the. 8 "Ravguangc rui kaniw lungc khatni kaniw lungning ti-ndylou the; aseic nganv kaniw how mak khe, chu ni chu mak khe," twna nthanmei latrik rui sa e. 9 David rui sa e:
"Kaniw tuang khumngai tei kaniw khang
phah sw kan di tho,
phaysuy bamv sw kan di tho,
riaploupui bamv sw kan di tho!
10 Kaniw how mak khang kaniw mik
zingc kan di tho,
kaniw ngumc nkuanna lungc bam kan di tho."
11 Jihudimei nunc phaysuymei hei bow nzut kan ni thah? Kum ni tu hamh e! Kaniw paap zaeng rui, Jentailmei khang ringhbamv guang the. Mi hei Jihudimei ta timamavlou khang e. 12 Jihudimei paap zaeng rui mbaanv khang suaihiam dai phungc guang the, khatni kaniw suaimei rui Jentailmei khang suaihiam dai phungc guang the. Kum e thei, Jihudimei nunc guang ntanghlou pwkhou thu adih daihmei suaihiam phungc guanglou puni cho!
Jentailmei khang Ringhbamv
13 Ntaw ai rui Jentailmei nangniw khou sa tuang e: Ai Jentailmei nunc khang Latdiutatmei sw bammei zaeng rui atuang taanv ta thuanc bam puni. 14 Mi kumna ai rui Jihudimei ta timamavloumei rui kaniw gaanv saekc ta gulou nuh khang e. 15 Kalam thu kaniw ta ganc patmei rui mbaanv ta Ravguangc khou zaykariulou dat the. Kum e thei kaniw ta laalou dat pwkhou thu, akumh puni thah? Mi tei theihmei khou rui ringhmei sw puni!
16 Ntyan dwm akhat tuang reymei kiak tei Ravguangc khang katlou kan e thei, ntyan dwm kapwm tei nthanmei di the; khatni thing bang akhat tuang kamaan guay tei Ravguangc khang katlou kan e thei, kachy guay tei ni nthanmei di the. 17 Lingcloumei oliv bang tuang chy katap gancna, numbangc oliv chy nsuklou the. Jentailmei nang hei nwmbangc oliv chy tei kumh tuang e, kumna ntaw thu nang Jihudimei tuang suaihiam guay lay laa the. 18 Kumna thing chy katap ganh kumcna ganc pat kanmei Jihudimei ta nang mala nuh mak e. Nang gaengh sw nuh tuang tabui naina cho? Nang thu kachy na de; nang rui kamaan ta makuat tu hamh e; kamaan rui nang ta makuat tu de.
19 "Ngguay kiuc e, tiki kachy tei katap ganc lana aniu ta lou dat lyn tuang di the," twna nang sa nuh e. 20 Mi tei nchumh e. Lwm ti makmei zaeng rui kaniw ta ganc kan the; lwm tipui zaeng rui nang ta lou lyn the. Tiki nang gaengh sw rio; mi phaan tei ping o. 21 Ravguangc rui kabang chy kumhmei Jihudimei ta sini ganc pat e thei, nang ta thu ganc pat dat pw lak khe twna ningna cho? 22 Ravguangc zauzian khatni lungpuam aniu mi khou hei how e. Latliammei nunc ruc khou thu katuang latzan tanhmei keylou the; tiki nang khang thu kazauzian lungc khou bam pwkhou kamei rui kazauzian tiilou the. Tiki nangniw ta ni kakhou bam tii mak e thei, ganc puni de. 23 Jihudimei nunc rui lunghlaicna lwm dat pwkhou, kaniw ta guang duanclou dat puni; kalam thu kaniw ta guang duanclou dat khang Ravguangc kamei ngam de. 24 Jentailmei nang hei thu numbangc oliv chy ta kalwnlungh bang khou rui ram tap pat lana katuang bang hamhmei lingcloumei oliv bangc khou duancloumei tei kumh tuang de. Jihudimei nunc hei lingcloumei oliv bang kumh tuang e. Mi ram ganc kanmei chy nunc ta tei kabangc khou guang duanclou dat khang thu chiwmei de.
Ravguangc rui Meic Guayna ta Zaucnzianloumei
25 Chana thiu, nangniw rana nangniw ta ningtyngmei nunc e twna kakhanh bam mak khang, nangniw mi hei thay kanmei ta ai laa nii e: Israelmei kaniw lungc tanc bammei hei tingsaengzaeng tanc bam ni tu hamh e; Jentailmei nunc Ravguangc khou guang nimei sing guang ntangh mak saanv khang na de. 26 Mi hei kumcna Israelmei guayna ta gulou puni. Nthanmei latrik rui sa e:
"Guloumeipu Zion khou rui guang puni,
kumna simei taanv guay Jakob kikta nunc
khou rui laa ganc puni.
27 Ai rui kaniw paap guay laa ganclou pwkhou,
ai rui kaniw lev mi latryan hei sw puni."
28 Gaychamv lam khou thu Jihudimei nunc hei Ravguangc khang zauczihmei nunc sw the; tiki Jentailmei nangniw khang thu mi tei gaeng the. Kum khwan sini Ravguangc rui kapahloumei lam khou thu kaniw hei kaniw pupouc nunc zaeng rui Ravguangc rui nzianmei nunc e. 29 Kalam thu kamei rui kapahloumei khatni suaihiamloumei nunc lam khou Ravguangc lunghlaic dat mak e. 30 Jentailmei nangniw hei tat kanmei ganv khou Ravguangc lat piu makna bam khwan e; tiki Jihudimei rui lat piu makpui zaeng rui, nangniw Ravguangc zauzian laatow the. 31 Mi tei kumcna, nangniw Ravguangc zauzian laa kanmei zaeng rui Jihudimei ni ntaw a Ravguangc zauzian laa khang ntaw latliam bam tuang e. 32 Kumna Ravguangc rui meic guayna ta latliammei tuang kangmei tiswlou the, mi hei kamei rui meic guayna ta nzianlou dat nuh khang e.
Ravguangc ta Thuanhmei
33 Ravguangc thu gaat tuang nai dat makmeipu e, kaningting khatni karam thay kanganv maek e! Thow rui katuang latzan tei thay tangc ngam nina cho? Thow rui kamei taanc bammei tei kabah thay ngam nina cho? 34 Nthanmei latrik rui sa e:
"Thow rui Poubauhmei tuang
lungning thayna cho?
Thow rui kata ncham ngamna cho?
35 Kamei khangclou dat khang
katuang tii ngammei thow naina cho?"
36 Kalam thu ramh guayna hei kamei rui damclou tuang de, khatni ramh guayna hei kapaan rui khatni kakhang rui nai bam tuang de. Hymdaihmei hei Ravguangc khang tingsaengzaeng sw diu! Amen.