10
1 Chana thiu, Israelmei nunc hei ni guloumei laa kan tu laa niina ai Ravguangc khou huayney bam e. 2 Kaniw khou Ravguangc khang lunghsuhmei nai e twmei ai thay e; tiki mi tei kaniw kabah thayna sw bam tu hamh e. 3 Ravguangc tuang ravchaptatmei tiswloumei chaeng hei kaniw thay mak khe; kaniw rana rui kasiamhmei chaeng khou kaniw tat the, kumna Ravguangc tuang ravchaptatmei tiswloumei chaeng khou tei kaniw gut mak khe. 4 Kalam thu Riakdanv hei Khrista khou nganvlou the, kumna lwmmei kathuic ta ravchaptatmei swna chaklou the.
Ringhbamv hei Meic Guayna Khang e
5 Riakdanv piuna ravchaptatmei lam khou Mousi rui dincna, "Riakdanv piupui mei tei Riakdanv paan rui ringc puni," twna sa e. 6 Tiki lwmmei paan rui ravchaptatmei lam khou, nthanmei latrik rui sa e: "Thow tingkauh thangc ku nina cho twna nang thanv bam nangh e." (Mi hei Khrista ta kaw key khang twna e.) 7 "Thow kangkhunc key nina cho twna ni thanv bam nangh e." (Mi hei Khrista ta theihmei khou rui kaw ku dat khang twna e.) 8 Mi hei sa bammei kabac kiu thu, "Ravguangc lat nang daeng khou nai the, nang mwang khou khatni nang lungc khou nai the," twpui tuang e. Mi kiu thu lwmmei lam khou aniw rui dinc ndauh bammei lat hei the. 9 Mi kiu thu, Jisu hei Poubauhmei e twna nang mwang rui sa ndauh pat e thei khatni Ravguangc rui kata theihmei khou rui tiringcthaulou dat kan the twmei nang lungc rui lwm e thei, nang ta gulou puni. 10 Kalam thu lwmmei paan rui aniu ta ravchaptatmei swna chaklou the; khatni aniu rui sa ndauh patpui paan rui aniu ta gulou the. 11 "Kakhou lwmmei mei ta tei tichangamclou lak e," twna nthanmei latrik rui sa e. 12 Mi hei meic katana khang sa tuang e; kalam thu Jihudimei ta ni, Grikmei ta ni baih mak e; Ravguangc thu meic guayna tuang Kaipouc de, kumna kakhou huaymei katana ta geicna suaihiamlou e. 13 Kalam thu, "Poubauhmei ta kawmei katana ta gulou puni," twna nthanmei latrik rui sa e.
14 Tiki akumhna, kaniw lwm makpui mei ta kaniw kaw nina cho? Kalam khou chu makpui mei ta kaniw akumhna lwm nina cho? Dincloupui mei maekna akumhna chu nina cho? 15 Chamvdinhpui meic ndiulou tii makna akumhna chamv tei dinc tat nina cho? "Gaychamv phungc guangmei nunc phaykaemv tei adih howgay tu cho!" twna nthanmei latrik rui samei tei e. 16 Tiki gaychamv hei meic guayna rui laalou mak e. "Poubauhmei, thow rui aniu lat lwmna cho?" twna Isaia rui samei tei the. 17 Kumna lwmmei hei chumei khou rui guang tuang e, chumei hei Khrista ta dinc ndauhmei khou rui guang tuang e.
18 Kaniw chu lamc makna cho? Kaniw chu kan the. Nthanmei lat rui sa e:
"Kaniw khwan kandih kapwm
tat lik kan the,
khatni kaniw lat mbaanv tintou
tangc kan the."
19 Israelmei nunc hei kabah thay lamc makna cho? Daw reymei swna Mousi rui sa e:
"Amei nunc ta Jentailmei nunc
ruc khou timamavlou puni;
mpangmei mei nunc ruc khou
tilunghpuamclou puni."
20 Baucna Isaia rui sa e:
"Ata phu makmei nunc rui
ata ariw the;
ata kakhi makmei nunc khou
ai rui ata lyanlou the."
21 Tiki, "Latliammei khatni kanu tanhmei mei nunc ta abaanc haemv patna neihmaryn riu bam e," twna Israelmei lam khou kamei rui sa e.