9
Ravguangc khatni Kamei nunc
1 Ai Khrista mei swna nchumhmei samei tuang e; ai saraemh mak e twmei Bumaengh Nthanmei rui zayloumei si gay thaymei lungc rui ni thay e. 2 Mi kiu thu, azei khatni azancbangv kahak swmei achana nunc khang ai mpeyna lungc ryanrana khatni nthaekc key thuy makna lungh kabiuna bam e. 3 Achana nunc khang Ravguangc syang phungcna Khrista khou rui ganc pat pw sini nuh di the twmei nganv ning tangc the. 4 Kaniw hei Ravguangc mei nunc e; Ravguangc nac sw khang laaloumei nunc e; kaniw khou Ravguangc tuang hymdaihmei lyanloumei nunc e; katuang latryanl khatni katuang Riakdanv tiiloumei nunc e; kalingmei khou kalummei nunc e; Ravguangc latryan guay laatowmei nunc e; 5 Pupouh nunc tuang kikta nunc e; khatni Khrista hei maansei swna kaniw makaemv e. Ramh katana kaipouc Ravguangcm ta tingsaengzaeng thuanc o! Amen
6 Israelmei guayna hei Ravguangc mei sw makpui zaeng rui Ravguangc latryan guang tangh mak khe twna ai sa mak e. 7 Abraham kikta guay hei Ravguangc nac nunc the twna ni ai sa mak e. "Isaak khou rui lungc guangmei nac nunc ta tei nang kikta e twna chak puni," twna Ravguangc rui Abraham khou sa kan e. 8 Mi kabac kiu thu kakhou rui lungc patmei naca guayna tei Ravguangc nac nunc e twna sa mak e; tiki Ravguangc rui nrianhloumei thei layna lungc guangmei nac nunc na ta tei kakikta ling twna laa e. 9 "Nkun mi ganv zaengc khoub ai guang dat puni, mi khou kiu Sara kanac mpouh nai puni," twna nrianhloumei tuang e.
10 Mi na hei hamh e. Rebekka nac mpouh nei tei aniu pupouc Isaak nac rana de. 11 Tiki kaney puanh mak khou rui, simei pwni, gaymei pwni kaney taanh mak khou rui, Ravguangc rui kapahloumei thu taanv thei layna hamhna, kamei rui kawloumei thei layna tat bammei thei layna, 12 "Gaanvdaihmei rui alaucmei siamruai sw puni." twna kapui khou salou khwan e. 13 "Ai Jakob ta nzian the, Esau ta karaeng the," twna hylou the.
14 Kum e thei, Ravguangc hei nchumh mak e twna aniu sa kho cho? Kum mak e. 15 "Ai rui nzianlou niimei ta tei nzianlou puni; ai rui nzianlou niimei khou tei nzianlou puni," twna kamei rui Mousi khou sa khwan e. 16 Mi zaeng rui ramh guayna hei maansei rui kahawmei thei layna hamh e, taanv thei layna ni hamh e; Ravguangc zauzian nyng de. 17 Kalam thu, "Atuang pumtan lyan khang khatni kandih kapwm khou azanc dinc lik khang, ai rui nang ta guangh tiswlou the," twna Pharau khou sa e twna nthanmei latrik khou nai e. 18 Mi kumna Ravguangc kamei rui nzianlou niimei ta tei nzianlou khatni kalung titanclou niimei ta tei titanclou e.
Ravguangc Lungpuam khatni Kazauzian
19 Nangniw rui akhou mi kumna thanv nuh e, "Mi kumc e thei, akumhna Ravguangc rui meic gaanv khat ta nkhuai e twna sa dat ni hena cho? Ravguangc ningmei tei thow taanh mak ngam nina cho?" 20 Tiki Ravguangc ta mi kumna adangv bam khang nang thow cho? Bih lay rui lay kasiamhmeipu ta, "Tabui swna nang ata mi kumcna kasiamhlou tu cho?" twna sa nuh dinah cho? 21 Lai chamaanv rui katuang bic tei kamei rui ning ningmei khou kasiamh khang ngamv nai de, kumna bih dwm akhat na khou rui lay kanei kasiamhna akhat rui nthukmei taanv khou piu khang, akhat rui chiwmei taanv khou piu khang kasiamh nuh de.
22 Ravguangc rui sw kanmei tei ni mi hei kumh tuang e. Kamei rui kalungpuam lyanlou nii khwan e khatni katuang pumtan tithaylou ni khwan e. Kumna kalungpuam keylou nimei nunc khatni sw kamut kamai nimei nunc ruc khou tei ni khaengv saengcna khaengvlou de. 23 Kazauzian laatow nimei, katuang hymdaihmei laa khang chamdaanvloumei aniu khou bun keyloumei katuang padikmei hymdaihmei tei ni lyanlou nii khwan e. 24 Kalam thu aniu hei Jihudimei pang khou rui na hamhna Jentailmei pang khou rui nii kawloumei nunc e. 25 Hosea tuang latrik khou mi kumna hylou e:
"Atuang mei hamh bam khwanmei nunc ta
'Amei nunc' twna ai rui kaw puni.
Ai rui nzian bam mak khwanmei zaat ta
'Ai nzianmei' twna ai rui kaw puni.
26 'Nangniw amei nunc hamh e,'
twna saloumei bamv khou tei,
kaniw ta ringhmei Racguangc
nac mpouh nunc twna kaw puni."
27 Israelmei lam khou Isaia rui mi kumna kauc e: "Israelmei hei duipui syniang zu geic bam sini, meic katitna ta gulou puni; 28 Poubauhmei rui kandih kapwm ta tanhmei latzan sw zaic puni the." 29 Mi hei Isaia rui, "Ngamparimei Poubauhmei rui aniu kikta khang gaanv saekc na ta sini daeklou mak khwan e thei, aniu hei Sodom kumc kan ni tuang the, Gomorra kumc kan ni tuang the," twna saloumei tei the.
Paul rui Israelmei khang Huayneyloumei
30 Aniu rui sa bammei kiu mi hei e: ravchaptat khang karamc makmei Jentailmei nunc ta lwmmei paan rui ravchaptatmei swna chaklou the; 31 tiki Riakdanv piupui paan rui ravchaptatmei sw khang karamhmei Israelmei tei thu ravchaptatmei tei laatow kan mak khe. 32 Tabui zaeng rui cho? Kalam thu kaniw lwmmei khou ngangvlou makna, kaniw taanv khou ngangvlou the. Kumna kaniw "phaysuy tauc" khou phaysuy the. 33 Mi kumna hylou bammei tei pat tuang the:
"Zauc lo, meicnunc ta tiphaysuy nipui tauc,
meicnunc phaysuy nipui tauc
ai rui Zion khou lou kan the.
Tiki kakhou lwmmei mei ta
tichangamclou lak e."