8
Bumaengh Nthanmei Paan rui Lunghmei Panty
1 Ntaw thu, Khrista khou bammei nunc ruc khou thu latzan nai dat mak khe. 2 Kalam thu Khrista Jisu khou bampui paan rui aniu khou ringhmei phungc guangmei Bumaengc tuang pumtan tei rui ata a paapc khatni theihmei tuang pumtan khou rui tiduaklou the. 3 Maansei rui swan tipui zaeng rui Riakdanv rui sw ngam makmei tei, Ravguangc rui taanclou the. Kamei rui Kanac Mpouh kahak ta paapcmei maansei kumhmei lwnlung swna ndiu guangna maansei khou naimei paapc ta latzan swna khaeng kuaklou the. 4 Mi hei maansei lwnlung thei layna hamhna, Bumaengh thei layna lungc bammei aniu khang, Riakdanv rui samei guay tei taanc nthuihlou khang, Ravguangc rui taanclou tuang e. 5 Meic pumc rui zaymei thei layna lungc bammei nunc tei, meic pumc rui kahawmei tei rui kaniw lungning tei sinsw the. Bumaengh Nthanmei rui zaymei thei layna lungc bammei nunc tei Bumaengh rui kahawmei tei rui kaniw lungning tei sinsw the. 6 Meic pumc rui sinswmei thai thu theihmei e; tiki Bumaengh rui sinswmei thay thu ringhmei khatni chuzaenghmei e. 7 Meic pumc tuang khou tei kalungning loupui mei tei thu Ravguangc ta zauczihpui mei e; tabui cho tiki kamei Ravguangc tuang kariak latdanv tei piu mak e; kalam thu kamei piu ngam mak e. 8 Kaniw tuang meic pumc rui kahawmei khou tat bammei nunc tei Ravguangc ta tipian ngam mak e.
9 Nangniw lungc khou Ravguangc Bumaengc bam e thei, nangniw hei meic pumc rui kahawmei thei layna tatmei nunc hamh the; Bumaengh rui kahawmei thei layna tatmei nunc the. Thow pwni kakhou Khrista Bumaengc maekpui mei tei thu Khrista mei hamh e. 10 Nangniw khou Khrista bam e thei, paapc zaeng rui nangniw pumc theic sini, ravchaptatmei tiswloumei paan rui nangniw bumaengc ringc e. b 11 Jisu ta tiringcthauloumei Ravguangc Bumaengc tei nangniw khou bam e thei, nangniw khou bammei katuang Bumaengc paan tei rui Khrista ta tiringcthauloumei pu tei rui nangniw tuang theihmei pumc khou tei ringhmei tiilou puni.
12 Mi zaeng rui, chana thiu, aniu hei Bumaengh rui kahawmei thei layna lungc nina the, meic pumc rui kahawmei thei layna lungc nina hamh the. 13 Nangniw tuang pumc rui kahawmei thei layna lungc e thei, nangniw theic puni; tiki nangniw pumc tuang taanv guay ta Bumaengh paan rui titheicna lungc e thei, nangniw ringc puni. 14 Ravguangc Bumaengc rui zayloupui thei layna lungc bammei guay tei Ravguangc nac nunc e. 15 Kalam thu, aniu khou tiiloumei hei bangh swna pingna bam dat nimei tuang Bumaengc hamh e; tiki Ravguangc nac swmei tuang Bumaengc de. Mi zaeng rui kapaan rui aniu Ravguangc ta "Abba, aPu!" twna kauc e. 16 Ravguangc Bumaengc rui aniu tuang bumaengc khou aniu hei Ravguangc nac nunc di the twna sa the. 17 Aniu hei Ravguangc nac nunc e thei, kamei rui kanac nunc khang chamdaanvloumei tei laa nimei nunc the. Mi tei Khrista lev laa nchamc nimei nunc the. Kalam thu aniu Khrista lev ryanramei dam phungc nchamc e thei, katuang hymdaihmei dam laa nchamc puni.
Guang Nimei Hymdaihmei
18 Ntaw aniu ryanramei ariw bammei hei thu aniu khang tii punimei hymdaihmei tei lev kida khang biuhpui tuang hamh e twmei ai chak e. 19 Ravguangc rui kanac nunc ta ndauh patlou nimei ta tei damcloumei ravsyam katana rui tarina nkhwan bam e. 20 Kalam thu damcloumei mbaanv ta hei ganc pat tina gaeng makmei sw kan the. Mi hei damcloumei ravsyam kamei rui kahawmei hamh e, Ravguangc rui kum kan di tho twlou tina di the. 21 Tiki mi mbaanv ta hei taemc maan kan nimei bangc khou rui gulou datna Ravguangc nac nunc tuang hymdaihmei nyngswmei khou lay kazauh dat puni twmei rigun thu nai e. 22 Kalam thu damcloumei mbaanv hei meicpui naruimei kumcna, aseic nganv kalangh kahymna bam e twmei aniu thay e. 23 Mi kumcna bammei hei damcloumei ravsyam na hamh e; Ravguangc tuang reymei kaipat Bumaengh Nthanmei laamei aniu ni Ravguangc rui aniu ta kanac nunc tiswlou nimei c khatni aniu pumc ta thuak patlou nimei ta nkhwanna aniu lungc khou kalangh kahym bam e. 24 Kalam thu lwmgaymei rui aniu ta gulou the; tiki aniu lwmgay bammei tei how e thei, mi tei lwmgaymei hamh e. Kamei how bammei ta how puni twna lwmgay bammei thow naina cho? 25 Aniu how makmei ta lwmgay e thei, aniu mi ta tei khaengvthayna nkhwan e.
26 Aniu heidikamv swan tipui zaeng rui, mi hei kumcna Bumaengh rui aniu ta guang nkhavlou the. Aniu akumhna huayney nina cho twmei thay mak tipui zaeng rui, Bumaengh tei rui lat swna sa pat ngam makpui nganv kahui kasingna aniu khang huayneylou bam e. 27 Nthanmei nunc khang Ravguangc ningmei khou huayney bammei Bumaengc tuang lungning khou naimei guay tei aniu lungning thaymei Racguangc rui thay e.
28 Ravguangc rui kata nzianmei, kamei rui ningmei thei layna kawloumei guay khang ramh lam guayna khou gay khang swlou e d twmei aniu thay e. 29 Ka Nac Mpouh tei rui, kachana nunc mpeyna pang khou nareimei swna bam khang, Ravguangc kamei rui kadahloumei nunc ta tei Kanac Mpouh kumh khang reic patlou the. 30 Mi kumna, Ravguangc kamei rui reic patloumei nunc ta tei kaw guang the, kumna kamei rui kaw guangmei nunc ta tei ravchaptatmei swna laalou the, khatni katuang hymdaihmei ni tiilou the.
Khrista Jisu khou rui Ravguangc ramzian
31 Mi kumc e thei, mi kumc bammei khou hei aniu akumhna sa kho cho? Ravguangc rui aniu biak liangc bam e thei thow rui aniu ta ngam dat ni thena cho? 32 KaNac Mpouh kahak ta daeklou makna aniu khang tii pat the! KaNac Mpouh tii patmeipu kamei rui ramh guayna tii pw lak nah cho? 33 Ravguangc rui kapahloumei nunc ta tei nkhuaimei e twna sa dat ngam nimei thow naina cho? Ravguangc kamei kahak rui kaniw ta ti-nzihlou the. 34 Kum e thei, thow rui kaniw ta nkhuaimei de twna sa dat nina cho? Theicloumei na hamhna ringcthau datna Ravguangc baanzat khou bamna aniu khang huaychalou bammei Khrista Jisu rui cho? 35 Kum e thei, Khrista rui nzianmei khou rui aniu ta tabui rui sw ntamv dat ngam nina cho? Ryanra ryanriumei rui ny, rairiumei rui ny, nkow ndaepcmei rui ny, lungcsimei rui ny, theic suhmei rui ny?
36 "Kaganv kathuic aniw nang khang
theic suc nuhmei khou bam e;
aniw ta hei swluai nimei lauziu nunc ta kumcna swlou the,"
twna hylouna nai bammei kumcna, 37 mi guay hei ariw bam sini, aniu ta nzianlou khwanmei kapaan rui aniu hei rihngammei nunc suangc ngammei nunc e. 38 Kamei rui nzianmei khou rui aniu ta ramh khat na rui sini sw-ntamv dat ngam mak khe twmei ai nthanna thay e: theihmei rui ni, ringhmei rui ni; kauh baanchara rui ni, tingkauh kaipouc khatni pumtan nunc rui ni; ntaw pat bammei rui ni, guang punimei rui ni; 39 kauh thangc kandic rui ni, kabangc thangc kandic rui ni; damcloumei puat akhat na rui sini aniu ta aniu Poubauhmei Khrista Jisu paan rui Ravguangc rui aniu ta nzianlou khwanmei ramzian khou rui sw ntamv dat ngam mak khe.