7
Nowpuc Latgiam
1 Chana thiu, ai rui sa nimei hei nangniw kabah thay puni; kalam thu kariak lam khou nangniw thay e. Kariak rui gaanv khat ta karakmei thu kamei ringc bam saanv na tei de. 2 Sa kidana, mihmei ntumei khat tei kagaanv ringc bam saanv, kariak thei layna kamei mi pu now tei e; tiki mi pu tei theic kan e thei, kamei mi pu now tei de twna kariak rui karak dat mak khe; kanyng di the. 3 Kumna kagaanv ringc bam khou kamei nggaanvmei baihmei lev lungc e thei, kata lungcmaanvmei pui twna sa puni. Tiki kagaanv theic kan e thei, kariak thei layna kamei kanyng di the; kamei meickai now sw dat sini lungcmaanvmei hamh the.
4 Chana thiu, nangniw ni mi tei kumhmei tuang e. Riakdanv khou thu nangniw theic tangv the; kalam thu nangniw thu Khrista tuang pumc dam akhat di the, khatni Ravguangc khang kathai nthai khang ntaw thu nangniw hei theihmei khou rui ringcthau dat kanmeipu tuang di the. 5 Aniu pumc rui kahawmei thei layna aniu lungc bammei douc tei, Riakdanv tei rui paapc taanc niimei lungning aniu pumc khou tipatlouna, theihmei thay nthai nimei taanv aniu taanc bam khwan e. 6 Tiki ntaw thu aniu ta Riakdanv khou rui riclou the; aniu ta bangclou bammei Riakdanv khou tei rui thu aniu theic ntamv the. Kum thena, ntaw aniu Ravguangc siamruai sw nimei hei karaanmei hyloumei latdanv thei tei layna hamhna, Bumaengh tuang riak thanh thei tei layna sw nina the.
Riakdanv khatni Paapc
7 Kum e thei, Riakdanv hei paapc cho? Kiuc hamh e! Tabui tei paapc cho twmei akhou dincloumei thu Riakdanv rui e. "Nang meickai tuang kahaw lak nina e," twna Riakdanv rui sa mak khwan e thei, meickai tuang kahawmei hei simei e twmei ai thay lak ni tuang e. 8 Tiki mi Riakdanv khou phaypan swna paapc rui alung khou meickai tuang ta laa niipui tuang lungning tipat e. Riakdanv maek khou thu paapc hei theihmei de. 9 Ai hei ni kaganv akhat khou akhang Riakdanv maekna ringc bam khwan e; tiki akhang Riakdanv nai guang pwkhou paapc ringcthau the, 10 kumna ai theic the. Ringhmei phungc guang khang tiiloumei Riakdanv tei rui akhang thu theihmei phungc guang the. 11 Paapc tei kakhang kadouchamei laana Riakdanv tei sinswna ata guat the, kumna ata Riakdanv tei rui swluai the.
12 Kumna, Riakdanv khatni latdanv hei nthanmei e, nchumhmei e, khatni gaymei e. 13 Tiki gaymei tei rui ata swluai tuang e twna sa tu cho? Kiuc hamh e! Mi hei sw bammei thu paapc rui de; gaymei ta tei sinswna paapc rui katuang kalingmei lwnlung tei ndauhna akhou theihmei phungc guang the. Mi kumcna, paapc heidikamv si e twmei, Riakdanv paan rui lyanlou the.
14 Riakdanv hei thu bumaengh tuang e twmei aniu thay e; tiki ai thu paapc bangc swmei zanhpumc tuang e. 15 Ai rui taanc bammei ta hei ai kabah thay mak e; kalam thu ai taanc niimei tei ai taanh mak e, ai karaengmei tei ai taanc e. 16 Ai taanc bammei hei ai taanc zihmei e. Mi hei rui lyanmei thu Riakdanv hei thu nchumh e twmei ai nuh the twpui tuang e. 17 Mi hei taanc bammei hei kaling thu ai rui hamh e; akhou nai bammei paapc tei rui e. 18 Akhou, twmei thu apumc khou gaymei taanc ngammei tuang maek e twmei ai thay e. Kalam thu gaymei taanc niimei tuang akhou nai sini, mi tei ai taanc ngam mak e. 19 Ai rui taanc niimei gaymei tei ai taanh mak e; ai rui taanc zihmei simei tei ai taanc e. 20 Ai rui taanc zihmei tei ai taanc bammei hei rui lyanmei thu, mi tei taanc bammei tei ai rui hamh e; akhou nai bammei paap tei rui e. 21 Gaymei taanc niimei chwn akhou nai sini, ai rui taanhmei thu simei taanc rap bammei tuang nai e. 22 Alung syng khou thu Ravguangc tuang Riakdanv ta kahaw e; 23 tiki kalwnlung tuang baihmei latzan akhat akhou taanv sw bammei ta ai thay e. Mi kiu thu alung rui gaymei e twna laaloumei latzan ta tei adow bammei latzan e. Mi hei rui ata apumc khou taanv sw bammei paap tuang latzan bangc tisw the. 24 Ai hei ramh sw thuy lakpui mei di the! Ata theihmei khou zaylou nimei, mi pumc khou hei rui thow rui ata gulou nina cho? 25 Aniu Poubauhmei Jisu Khrista paan rui Ravguangc ta thuancku e! Kumna mi hei atuang lwnlung the: ai alungning rui Ravguangc tuang Riakdanv bangc sw the, kumna akhou naimei mei hei rui paapc tuang kariak latdanv bangc sw the.